Mga Hukom 9
9
Si Abimelec
1Si Abimelec nga anak ni Gideon nagkadto sa banwa sang Siquem sa diin nag-estar ang mga kaparientehan sang iya iloy. Ginsingganan niya sila 2sa pagpamangkot sa mga tawo sang Siquem, “Sa diin bala ang luyag ninyo sining duha: nga pagagamhan kamo sang setenta ka mga anak nga lalaki ni Gideon, ukon isa lang ang magagahom sa inyo? Dumdoma ninyo nga ako inyo kaugalingon nga unod kag dugo.” 3Ang mga pariente sang iya iloy naghambal sa mga tawo sang Siquem nahanungod sini para kay Abimelec. Nagpamat-od sila sa pagsunod kay Abimelec, tungod kay pariente nila sia. 4Ginhatagan nila sia sing setenta ka bilog nga pilak halin sa templo ni Baal-berit. Ini nga mga pilak ginsuhol niya sa mga hurong sa pagsunod sa iya. 5Nagkadto sia sa balay sang iya amay sa Opra, kag sa ibabaw sang isa ka bato ginpamatay niya ang iya setenta ka mga utod nga lalaki nga mga kaanakan ni Gideon. Pero si Jotam, ang kamanghuran nga anak ni Gideon, nagpanago kag wala mapatay. 6Dayon ang tanan nga mga tawo sang Siquem kag Betmilo nagtipon sing tingob, kag nagkadto sa balaan nga kahoy nga terebinto sa Siquem, sa diin ginhimo nila si Abimelec nga hari.
7Sang pagkabati ni Jotam nahanungod sini, nagkadto sia kag nagtindog sa putokputokan sang Bukid sang Gerizim, kag nagsinggit sa ila, “Mga taga-Siquem, pamatii ninyo ako, kag kabay nga ang Dios magpamati sa inyo! 8Sang una anay, ang mga kahoy nagtipon sa pagpili sang isa ka hari para sa ila kaugalingon. Nagsiling sila sa kahoy nga olivo, ‘Maghari ka sa amon.’ 9Ang kahoy nga olivo nagsabat, ‘Kinahanglan nga untatan ko anay ang paghimo sang lana nga ginagamit sa pagpasidungog sa mga dios kag mga tawo, agod maggahom sa inyo.’ 10Dayon ang mga kahoy nagsiling sa kahoy nga higera, ‘Dali ka kag maghari sa amon.’ 11Pero nagsabat ang kahoy nga higera, ‘Kinahanglan untatan ko anay ang pagpamunga sang maayo kag matam-is nga bunga agod maggahom sa inyo.’ 12Gani ang mga kahoy nagsiling sa balagon sang ubas, ‘Dali ka kag maghari sa amon.’ 13Pero nagsabat ang balagon sang ubas, ‘Kinahanglan untatan ko anay ang paghimo sang bino nga nagalipay sa mga dios kag sa mga tawo agod maggahom sa inyo.’ 14Dayon nagsiling ang tanan nga mga kahoy sa kahuykahoy nga tunokon, ‘Dali ka kag maghari sa amon.’ 15Nagsabat ang kahuykahoy nga tunokon, ‘Kon luyag gid ninyo nga ako ang inyo manginhari, ti dali kamo kag magpasilong sa akon landong. Kon indi kamo, magagwa ang kalayo sa akon tunokon nga mga sanga kag magasunog sang mga sedro sang Libano.’”
16Nagpadayon si Jotam sa pagsiling, “Gani karon, sinsero kag matuod gid bala ang inyo paghimo kay Abimelec nga hari? Husto bala ang inyo ginhimo kay Gideon kag sa iya panimalay kag nakahimo bala kamo sa iya sing nagakabagay suno sa iya mga ginhimo? 17Dumdoma ninyo nga ang akon amay nagpakig-away para sa inyo. Gintaya niya ang iya kabuhi sa katalagman sa pagluwas sa inyo sa mga Midianhon. 18Pero karon ginkontra ninyo ang panimalay sang akon amay. Ginpamatay ninyo ang iya setenta ka mga anak nga lalaki sa isa ka bato, kag ginhimo ninyo nga hari sang Siquem si Abimelec nga anak niya sa iya ulipon nga babayi, tungod kay sia inyo pariente. 19Gani karon, kon sinsero kag husto ang inyo ginhimo kay Gideon kag sa iya panimalay karon nga adlaw, dayon magmalipayon kamo sa kay Abimelec, kag sia man magmalipayon sa inyo. 20Pero kon indi, kabay maggwa ang kalayo kay Abimelec kag sunogon ang mga tawo sang Siquem kag Betmilo. Kabay maggwa ang kalayo sa mga tawo sang Siquem kag Betmilo kag sunogon si Abimelec.” 21Dayon nagdalagan si Jotam sa pagpalagyo. Nagkadto sia sa Beer kag didto nag-estar tungod kay nahadlok sia sa iya utod nga si Abimelec.
22Gingamhan ni Abimelec ang Israel sa sulod sang tatlo ka tuig. 23Dayon ginpalain sang Dios ang kaangtanan ni Abimelec kag sang mga tawo sang Siquem, kag nagrebelde sila batok kay Abimelec. 24Nahanabo ini agod si Abimelec kag ang mga tawo sang Siquem, nga nagpaisog sa iya sa pagpamatay sang setenta ka anak nga mga lalaki ni Gideon, magbayad tungod sang ila sala. 25Ang mga tawo sang Siquem nagbutang sing mga tawo sa mga putokputokan sang bukid sa paglambat kay Abimelec, kag ginkuha nila ang mga pagkabutang sang tagsatagsa nga nagaagi didto. Ginsugiran si Abimelec nahanungod sini.
26Dayon si Gaal nga anak ni Ebed nag-abot sa Siquem upod sa iya mga utod nga lalaki, kag nagsalig sa iya ang mga tawo sang Siquem. 27Nagkadto sila sa uma kag nagpamupo sing mga ubas sa katamnan sang mga ubas kag naghimo sila sing bino, kag naghiwat sila sing piesta. Nagsulod sila sa templo sang ila dios, sa diin nagkinaon sila kag nag-ininom, kag ginyaguta nila si Abimelec. 28Nagsiling si Gaal, “Ngaa bala nagaalagad kita kay Abimelec? Ano bala kita nga klase sang mga tawo sa Siquem? Kag sin-o gid bala sia? Anak sia ni Gideon! Kag nagaalagad sa iya si Sebul! Ngaa dapat kita mag-alagad sa iya? Mag-unong kamo sa inyo tigulang nga si Hamor, nga amo ang ginhalinan sang inyo kabarangayan! 29Kon ako lang kuntani ang nagapangulo sini nga mga tawo, tapuson ko gid ini si Abimelec! Singganan ko sia,#9:29 Ang isa ka dumaan nga pagbadbadSingganan ko sia; sa HebreoNagsiling sia. ‘Padamoa ang imo mga hangaway, maggwa ka kag magpakig-away!’”
30Si Sebul, ang pangulo sang siudad, naakig sang mabatian niya ang ginsiling ni Gaal. 31Nagpadala sia sing mga mensahero kay Abimelec sa Aruma nga nagasiling, “Si Gaal nga anak ni Ebed, kag ang iya mga utod nga lalaki nag-abot sa Siquem, kag indi ka nila pagpasudlon sa siudad. 32Gani karon, ikaw kag ang imo mga tinawo maglakat sa gab-i, kag magpanago sa kaumhan. 33Bangon ka sa pagbutlak sang adlaw buas sa aga, kag salakaya sing kibot ang siudad. Dayon kon magbato si Gaal kag ang iya mga tinawo sa inyo, himua ang tanan nga masarangan ninyo batok sa ila!”
34Gani si Abimelec kag ang tanan niya nga mga tinawo nagbangon sa kagab-ihon, kag nagpanago sila sa gwa sang Siquem sa apat ka mga grupo. 35Sang makita ni Abimelec kag sang iya mga tinawo nga naggwa si Gaal kag nagtindog sa pwertahan sang siudad, naggwa sila sa ila mga ginapanaguan. 36Sang makita sila ni Gaal, nagsiling sia kay Sebul, “Tan-awa! May mga tawo nga nagadulhog halin sa mga putokputokan sang bukid!”
Nagsabat si Sebul, “Mga landong lamang ina sa kabukiran, kag indi mga tawo.”
37Nagsiling liwat si Gaal, “Tan-awa! May mga tawo nga nagadulhog sa gintung-an sang bukid, kag ang isa ka grupo nagapadulong sa dalanon halin sa kahoy nga terebinto sang mga manugbabaylan!”
38Dayon nagsiling si Sebul sa iya, “Diin na karon yadtong dalagku mo nga mga sugid? Ikaw ang nagsiling kon ngaa mag-alagad kita sa sining tawo nga si Abimelec. Amo ini ang mga tawo nga imo ginhikayan. Lakat na, kag awaya sila.” 39Ginpangulohan ni Gaal ang mga kalalakin-an sang Siquem, kag gin-away nila si Abimelec. 40Ginlagas sia ni Abimelec, kag nagpalagyo si Gaal. Madamo ang napilasan, bisan sa may pwerta sang siudad. 41Nagpabilin si Abimelec sa Aruma, kag gintabog ni Sebul si Gaal kag ang iya mga kautoran nga lalaki pa gwa sa Siquem agod nga indi na sila makaestar didto.
42Sang madason nga adlaw ang mga pumoluyo sang Siquem naggwa pakadto sa kaumhan, kag ginsugiran si Abimelec nahanungod sini. 43Gani gindala niya ang iya mga tinawo, ginpartida sa tatlo ka grupo, kag nagpanago sila sa kaumhan sa paghulat. Sang makita niya ang mga tawo nga nagapagwa sa siudad, naggwa sia sa iya ginapanaguan kag ginpamatay sila. 44Samtang si Abimelec kag ang iya grupo nagdalidali pakadto sa pwerta sang siudad kag ginbantayan ini, ang duha ka grupo nagsalakay sa mga tawo sa kaumhan kag ginpamatay sila tanan. 45Nagpakig-away si Abimelec sa mga tawo sang siudad sa bug-os sadto nga adlaw. Gin-agaw niya ang siudad kag ginpamatay ang mga tawo. Ginlaglag niya ang siudad, kag ginsab-ugan sing asin ang duta.
46Sang pagkabati sang tanan nga kinilala nga mga tawo sang Tore sang Siquem nahanungod sini, nagkadto sila sa pamakod sang templo ni El-berit agod indi sila maano. 47Ginsugiran si Abimelec nga nagtipon sila didto sing tingob. 48Nagtaklad sia sa Bukid sang Salmon upod sa iya mga tinawo. Nagdala sia sing wasay, nag-utod sang sanga sang kahoy, kag iya ini ginpas-an. Ginsingganan niya ang iya mga tinawo nga magdalidali kag maghimo sing amo man. 49Gani ang tagsatagsa nag-utod sang sanga sang kahoy, nagsunod sila kay Abimelec kag gintumpok nila ini sa gwa sang pamakod sang templo. Gintutdan nila ini samtang ang tawo yadto didto sa sulod, kag ang tanan nga mga tawo sang Tore sang Siquem nagkalamatay. Ang ila kadamuon mga 1,000 tanan ka mga lalaki kag mga babayi.
50Dayon nagkadto si Abimelec sa Tebes, ginkibon niya ini, kag gin-agaw. 51May mapag-on didto nga tore, kag ang tagsa ka lalaki kag babayi sa siudad, lakip ang ila mga pangulo, nagpanago sa amo nga tore. Ginbaralan nila ini sang makasulod sila, kag nagkadto sila sa atop. 52Nag-abot si Abimelec kag ginsalakay ang tore. Nagkadto sia sa pwertahan agod tutdan ang tore. 53Pero#2 Sam. 11:21. may babayi nga naghulog sang galingan nga bato sa iya ulo kag naglitik ang iya ulo. 54Dayon gintawag niya sing dalidali ang pamatan-on nga lalaki nga nagadala sang iya mga armas kag ginsingganan, “Gabuta ang imo espada kag patya ako. Indi ako gusto nga sugiron nga ang isa ka babayi nagpatay sa akon.” Gani ginbuno sia sang pamatan-on nga lalaki kag napatay sia. 55Sang makita sang mga Israelinhon nga patay na si Abimelec nagpauli sila tanan.
56Gani ginpabayad sang Dios si Abimelec tungod sang sala nga iya ginhimo batok sa iya amay sa iya pagpamatay sang iya setenta ka mga utod nga lalaki. 57Ginpaantos man sang Dios ang mga tawo sang Siquem tungod sang ila mga kalautan, suno sa ginsiling ni Jotam, nga anak nga lalaki ni Gideon, sang iya ginpakamalaut sila.
Currently Selected:
Mga Hukom 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
