Mga Hukom 10
10
Si Tola
1Sang mapatay si Abimelec, si Tola nga anak nga lalaki ni Pua kag apo ni Dodo, nag-abot sa pagluwas sang Israel. Naggikan sia sa tribo ni Isacar, kag nag-estar sa Samir sa kabakuloran sang Efraim. 2Nanginhukom sia sang Israel sa sulod sang baynte tres ka tuig, kag sa tapos sini napatay sia kag ginlubong sa Samir.
Si Jair
3Sa tapos kay Tola, nag-abot si Jair halin sa Galaad. Nanginhukom sia sang Israel sa sulod sang baynte dos ka tuig. 4May traynta sia ka mga anak nga lalaki nga nagasakay sa traynta ka mga asno. May traynta sila ka mga siudad sa duta sang Galaad, nga ginatawag sa gihapon nga kabarangayan ni Jair. 5Napatay si Jair kag ginlubong sa Kamon.
Si Jepte
6Sa liwat ang mga Israelinhon nagpakasala batok sa Ginoo. Nagsimba sila sa mga Baal kag sa mga Astarot, sa mga dios sang Siria, sang Sidon, sang Moab, sang Amon, kag sang Filistia. Ginsikway nila ang Ginoo, kag nag-untat sila sa pagsimba sa iya. 7Gani naakig ang Ginoo sa mga Israelinhon, kag ginpalutos niya sila sa mga Filistinhon kag mga Amonhon. 8Sa sulod sang desi-otso ka tuig ginpigos kag ginpabudlayan nila ang tanan nga mga Israelinhon nga nag-estar sa sidlangan sang Suba sang Jordan sa Galaad, sa diin nag-estar ang mga Amornon. 9Ang mga Amonhon nagtabok man sa Jordan sa pagpakig-away sa mga tribo nanday Juda, Benjamin, kag Efraim. Tungod sini ginbudlayan gid sing tama ang Israel.
10Dayon nagpanawag ang mga Israelinhon sa Ginoo, kag nagsiling, “Nagpakasala kami batok sa imo, kay nagbiya kami sa imo nga amon Dios, kag nagsimba kami sa mga Baal.”
11Nagsabat ang Ginoo sa mga Israelinhon: “Ang mga Ehiptohanon, Amornon, Amonhon, Filistinhon, 12Sidonhon, Amaleknon, kag Maonhon nagpigos sa inyo sang una, kag nagpangayo kamo sing bulig sa akon. Wala ko bala kamo pagluwasa sa ila? 13Pero sa gihapon ginsikway ninyo ako, kag nagsimba kamo sa iban nga mga dios, gani indi ko na kamo pagtabangan liwat. 14Kadto kamo kag magpanawag sa mga dios nga inyo ginpili. Kon yara kamo sa mga kapiutan, magpatabang kamo sa ila.”
15Pero ang mga Israelinhon nagsiling sa Ginoo, “Nagpakasala kami. Himua ang luyag mo, pero kon mahimo luwasa kami karon nga adlaw.” 16Gani ginsikway nila ang ila mga dumoluong nga mga dios, kag nagsimba sila sa Ginoo, kag ang Ginoo natublag tungod sang kalisdanan sang Israel.
17Dayon ang mga hangaway sang Amonhon naghanda sa pag-away kag naghimo sing ila mga tolda sa Galaad. Nagtipon man sing tingob ang mga Israelinhon kag naghimo sing ila mga tolda sa Mispa sa Galaad. 18Nagpamangkutanay ang mga tawo kag ang mga pangulo sang mga tribo sang Israel nga nagasiling, “Sin-o bala ang magapangulo sa pagpakig-away batok sa mga Amonhon? Manginpangulo sia sang tanan nga nagaestar sa Galaad.”
Currently Selected:
Mga Hukom 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
