Mga Hukom 8
8
Ang Bug-os nga Pagkalutos sang mga Midianhon
1Dayon nagsiling ang mga tawo sang Efraim sa kay Gideon, “Ngaa nga wala ninyo kami pagtawga sang inyo paglakat sa pagpakig-away sa mga Midianhon? Ngaa amo ini ang ginhimo ninyo sa amon?” Ginbasol nila sia sing tudo gid tungod sini.
2Pero nagsiling si Gideon sa ila, “Ang akon ginhimo diutay gid lang kon ipaanggid sa inyo ginhimo. Bisan ang diutay nga ginhimo ninyo nga mga kalalakin-an sang Efraim, sobra pa sang tanan nga ginhimo sang akon kabarangayan. 3Ang#Sal. 83:11. Dios nagtugyan sa inyo sang mga pangulo sang mga Midianhon nga amo sanday Oreb kag Seeb. Ano bala ang nahimo ko nga makatupong sini?” Sang makasiling sini si Gideon naghaganhagan ang ila kaakig.
4Si Gideon kag ang iya 300 ka mga tinawo nakaabot sa Suba sang Jordan kag nagtabok sila. Kapoy na gid sila, pero ginalagas pa nila ang ila mga kaaway. 5Nagpangayo si Gideon sa mga tawo sang Sucot, “Kon mahimo, hatagi ninyo ang akon mga tinawo sing tinapay. Kapoy na gid sila, kag ginalagas ko si Seba kag si Salmuna, ang mga hari nga Midianhon.”
6Pero nagsiling ang mga pangulo sang Sucot, “Ngaa maghatag kami sing mga pagkaon sa imo mga hangaway? Wala pa gani nimo madakop si Seba kag si Salmuna.”
7Gani nagsiling si Gideon, “Kon amo ina, kon matugyan na sang Ginoo sa akon sanday Seba kag Salmuna, pagatuhoktuhokon ko gid ang inyo mga unod sang mga tunokon nga mga kahuykahoy sa desierto!” 8Nagpadayon si Gideon sa Penuel, kag nagpangabay sing amo man sa mga tawo didto, pero ang mga tawo sang Penuel nagsabat sang pareho man nga sabat sang mga tawo sa Sucot. 9Gani nagsiling si Gideon sa ila, “Magabalik ako nga indi maano, kag kon magbalik ako, rumpagon ko ini nga tore!”
10Sanday Seba kag Salmuna yadto didto sa Karkor upod sa ila mga hangaway. Sa bug-os nga mga hangaway sang mga tribo sa desierto, mga 15,000 lamang ang nabilin, kay ang 120,000 ginpamatay na. 11Nagpadayon si Gideon sa paglakat sa dalan sa higad sang desierto sa sidlangan sang Noba kag Jogbeha, kag ginsalakay sing kibot ang mga hangaway nila. 12Ang duha ka mga hari nga Midianhon nga amo sanday Seba kag Salmuna nagpalagyo, pero ginlagas sila ni Gideon kag gindakop. Ginpasalasala niya ang ila bug-os nga hangaway.
13Dayon si Gideon nga anak ni Joas, nagbalik halin sa inaway kag nag-agi sa Taklaran sang Heres. 14Gindakop ni Gideon ang isa ka pamatan-on nga lalaki nga taga-Sucot kag ginpamangkot sia. Ginsulat sang pamatan-on nga lalaki para kay Gideon ang mga ngalan sang setentay siete ka mga pangulo kag mga katigulangan sang Sucot. 15Dayon nagkadto si Gideon sa mga tawo sang Sucot kag nagsiling, “Nadumdoman bala ninyo ang inyo pagyaguta sa akon? Nagsiling kamo nga indi kamo maghatag sing pagkaon sa akon kapoy nga mga soldado, tungod kay wala pa nakon madakop sanday Seba kag Salmuna. Karon, yari na sila!” 16Nagkuha sia sing mga tunokon nga mga kahuykahoy sa desierto, kag gingamit niya ini sa pagsilot sa mga pangulo sang Sucot. 17Ginrumpag man niya ang tore sa Penuel kag ginpamatay ang mga kalalakin-an sang siudad.
18Dayon ginpamangkot niya si Seba kag si Salmuna, “Daw ano bala ang hitsura sang mga lalaki nga inyo ginpamatay sa Tabor?”
Nagsabat sila, “Daw pareho sa imo. Ang tagsatagsa sa ila daw anak sang hari.”
19Nagsiling si Gideon, “Mga kautoran ko sila nga mga lalaki, mga anak sang akon kaugalingon nga iloy. Nagpanumpa ako nga kon wala ninyo sila pagpatya, indi ako magpatay sa inyo.” 20Kag nagsiling sia sa kay Jeter, ang panganay niya nga anak, “Tindog kag pamatya sila.” Pero ang bata nga lalaki wala maggabot sang iya espada. Nahadlok sia, tungod kay bata pa sia.
21Dayon si Seba kag si Salmuna nagsiling kay Gideon, “Sigi, ikaw ang magpatay sa amon. Kinahanglan isa ka lalaki ang maghimo sini.” Gani ginpatay ni Gideon si Seba kag si Salmuna, kag ginkuha niya ang mga adorno sa liog sang ila mga kamelyo.
22Sa tapos sina, nagsiling ang mga tawo sang Israel kay Gideon, “Ikaw na lang ang magpangulo sa amon—ikaw, ang imo anak nga lalaki, kag ang imo apo nga lalaki. Ginluwas mo kami sa mga Midianhon.”
23Nagsabat si Gideon, “Indi ako ang magpangulo sa inyo, ukon ang akon anak nga lalaki. Ang Ginoo amo ang magapangulo sa inyo.” 24Pero nagpadayon sia sa pagsiling, “Amo lang ini ang akon ginapangayo sa inyo. Ang kada-isa sa inyo maghatag sa akon sang mga aritos nga inyo naagaw.” (Ang mga Midianhon may mga aritos nga bulawan, kay sila mga taga-desierto.)
25Nagsabat sila, “Ihatag namon ini sa imo sing kinabubot-on.” Naghumlad sila sing bayu kag ang tagsatagsa ka tawo nagbutang sang mga aritos nga bulawan nga iya naagaw. 26Ang mga aritos nga bulawan nga ginpangayo ni Gideon nagbug-at sing sobra sa desi-otso ka kilo. Wala labot ini sang mga adorno, mga kulintas, kag ang mga bayu nga granate nga ginsuksok sang mga hari nga Midianhon, kag sang mga baliog sang ila mga kamelyo. 27Naghimo si Gideon sing diosdios gikan sa bulawan, kag ginbutang niya ini sa iya banwa sa Opra. Ang tanan nga mga Israelinhon nagsikway sa Dios, kag nagkadto didto sa pagsimba sa diosdios. Nangin-isa ini ka siod sa kay Gideon kag sa iya panimalay.
28Gani ang Midian ginlutos sang mga Israelinhon, kag indi na sila nanginmakatalagam. May kalinong sa duta sa sulod sang kwarenta ka tuig, tubtob napatay si Gideon.
Ang Pagkapatay ni Gideon
29Nagpauli si Gideon kag nag-estar sa iya kaugalingon nga balay. 30May setenta sia ka mga anak nga lalaki, tungod kay madamo ang iya mga asawa. 31May babayi man sia sa Siquem, kag may anak sila nga ginhingalanan kay Abimelec. 32Si Gideon, ang anak ni Joas napatay nga tigulang na gid kag ginlubong sia sa lulobngan sang iya amay nga si Joas sa Opra, ang banwa sang kabarangayan ni Abieser.
33Sang mapatay si Gideon, ang mga tawo sang Israel nangindi-matutom naman sa Dios kag nagsimba sa mga Baal. Ginhimo nila si Baal-berit nga ila dios. 34Wala na sila mag-alagad sa Ginoo nga ila Dios, nga nagluwas sa ila sa ila mga kaaway sa palibot nila. 35Kag wala gid sila magbatyag sing kabalaslan sa panimalay ni Gideon, sa tanan nga kaayuhan nga ginhimo niya para sa Israel.
Currently Selected:
Mga Hukom 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
