Mga Hukom 16
16
Si Samson sa Gaza
1Isa ka adlaw nagkadto si Samson sa Gaza, isa ka siudad sang mga Filistinhon, sa diin nakita niya ang isa ka babayi nga nagabaligya sang iya dungog, kag naghulid sia sa babayi. 2Nahibal-an sang mga taga-Gaza nga si Samson yadto didto, gani ginlibutan nila ang lugar kag ginbantayan nila sia sa bug-os nga gab-i sa pwertahan sang siudad. Naghipos lamang sila sa bug-os nga gab-i, nga nagahunahuna sa ila kaugalingon, “Mahulat kita tubtob mag-aga, kag aton dayon sia patyon.” 3Pero naghigda si Samson tubtob lamang sa tungang gab-i. Dayon nagbangon sia kag ginkaptan ang pwerta sang siudad kag gingabot ini dala ang mga sera, mga haligi kag mga trangka kag ang tanan nga bahin sini. Ginpas-an niya ini kag gindala palayo sa ibabaw sang bakulod nga nagaatubang sa Hebron.
Si Samson kag si Delila
4Sa tapos sini, naghigugma si Samson sang isa ka babayi nga taga-Kapatagan sang Sorek, nga ang iya ngalan si Delila. 5Ginkadtuan si Delila sang lima ka mga hari sang mga Filistinhon kag ginsingganan, “Utisa sia, kag usisaa kon diin nagahalin ang iya pagkakusog kag kon sa ano nga paagi namon sia madaog kag magapos agod indi na sia makabato sa amon. Ang kada-isa sa amon magahatag sa imo sing 1,100 ka bilog nga pilak.
6Gani nagsiling si Delila kay Samson, “Kon mahimo sugiri ako kon ngaa man tama gid kakusog sa imo. Ano ang himuon sang isa ka tawo nga luyag maggapos sa imo agod indi na ikaw makabato?”
7Nagsabat si Samson, “Kon gapuson nila ako sing pito ka bag-o kag lab-as nga mga banting sang pana, manginmaluya ako subong sang iban.”
8Gani gindalhan sang mga hari sang mga Filistinhon si Delila sing pito ka bag-o kag lab-as nga mga banting sang pana, kag gingapos sini ni Delila si Samson. 9May mga tawo nga ginpahulat niya sa isa ka kwarto, gani nagsinggit sia, “Samson! Yara na ang mga Filistinhon!” Pero ginpangbugras ni Samson ang mga banting sang pana subong sang pagkabugto sang hilo kon sindutan sang kalayo. Gani wala pa gid nila mahibal-i ang sekrito sang iya pagkakusog.
10Ginsingganan ni Delila si Samson, “Nahibal-an ko nga ginainto mo lang ako kag ginabutigan. Kon mahimo, sugiri man ako kon sa ano nga paagi magapos ikaw.”
11Ginsingganan sia ni Samson, “Kon gapuson nila ako sang bag-o gid nga mga kalat nga wala pa gid magamit, manginmaluya ako pareho sang iban.”
12Gani nagkuha si Delila sing bag-o nga mga kalat, kag gingapos niya si Samson. Dayon nagsinggit sia, “Samson! Yara na ang mga Filistinhon!” May mga tawo nga nagahulat sa pihak nga kwarto. Pero ginpangbugras ni Samson ang mga kalat sa iya mga butkon subong sang hilo.
13Nagsiling si Delila kay Samson, “Ginainto mo gihapon ako kag ginabutigan. Sugiri ako kon ano ang paagi sang paggapos sa imo.”
Ginsingganan sia ni Samson, “Kon ihabol mo ang pito ka salapid sang akon buhok sa teral kag hugton mo ini sa palpal, manginmaluya ako subong sang iban.”
14Dayon ginpatulog sia ni Delila, kag ginhabol niya sa teral ang pito ka salapid nga buhok ni Samson. Ginhugot niya ini sa palpal, kag nagsinggit, “Samson! Yara na ang mga Filistinhon!” Pero nagbugtaw si Samson kag ginpalos niya ang iya buhok sa teral.
15Gani nagsiling si Delila sa iya, “Ngaa man nga nagasiling ka nga ginahigugma mo ako, nga may ginalikom pa ikaw sa akon? Katatlo mo na ako intuon, kag wala mo pa ako masugiri kon ngaa kakusog gid sa imo.” 16Nagpadayon sia sa pagpamangkot kay Samson adlaw-adlaw. Tinak-an gid si Samson kag kinapoy sang pagpamilit sa iya ni Delila sa bagay nga 17sang ulihi, ginsugiran na lang niya si Delila sang kamatuoran. Nagsiling si Samson, “Wala gid maguntingi ang akon buhok, kay ginhalad ako sa Dios subong isa ka Nazareo#16:17 NAZAREO: Tan-awa ang 13:5. halin sa akon pagkatawo. Kon guntingan ang akon buhok, madula ang akon kusog, kag manginmaluya ako pareho sang iban.”
18Sang mahibal-an ni Delila nga ginsugiran sia ni Samson sang matuod, nagpadala sia sing mensahe sa mga hari sang mga Filistinhon kag nagsiling, “Balik kamo sing makaisa na lang, kay ginsugiran na niya ako sang matuod.” Dayon nag-abot sila nga may dala nga kwarta. 19Ginpatulog ni Delila si Samson sa iya mga paa, kag nagtawag sang isa ka tawo nga naggunting#16:19 nga naggunting: Sa Hebreokag sia (Delila) naggunting. sang pito ka salapid nga buhok ni Samson. Dayon nagsugod si Samson sa pagpangluya#16:19 Dayon nagsugod si Samson sa pagpangluya: Sa HebreoGinsakit niya sia. kag nadula ang iya kusog. 20Nagsinggit si Delila, “Samson! Yara na ang mga Filistinhon!” Nagbugtaw sia kag naghunahuna sa iya kaugalingon, “Manginpadlos ako kag manginhilway pareho sang una.” Wala sia makahibalo nga ginbayaan na sia sang Ginoo. 21Gindakop sia sang mga Filistinhon kag ginlukat nila ang iya mga mata. Gindala nila sia sa Gaza, kag ginkadenahan sang bronsi nga kadena. Ginpaobra nila sia sa galingan didto sa prisuhan. 22Pero nagsugod sa pagtubo liwat ang iya mga buhok.
Napatay si Samson
23Nagtipon sing tingob ang mga hari sang mga Filistinhon sa pagsaulog kag sa pagdulot sang daku nga halad sa ila dios nga si Dagon. Nagkanta sila, “Ginpadaog kami sang amon dios batok sa amon kaaway nga si Samson!” 24-25Nagkinasadya sila, gani nagsiling sila, “Dalha ninyo diri si Samson agod lingawon niya kita!”#16:24-25 lingawon niya kita: ukonyagutaon naton sia. Sang mapagwa nila sia sa prisuhan ginlingaw niya sila#16:24-25 ginlingaw niya sila: ukonginyaguta nila sia. kag ginpatindog nila sia sa gintung-an sang mga haligi. Sang makita sia sang mga tawo, nagkanta sila sing pagdayaw sa ila dios: “Ginpadaog kami sang amon dios batok sa amon kaaway nga naglaglag sang amon duta kag nagpamatay sang madamo sa amon.” 26Nagsiling si Samson sa bata nga lalaki nga nagatuytoy sa iya, “Patanduga ako sa mga haligi nga nagatukod sini nga templo. Luyag ako magsandig sa sini.” 27Nagaginutok ang mga babayi kag mga lalaki sa amo nga templo. Ang lima ka mga hari nga Filistinhon yadto didto, kag may mga 3,000 ka mga lalaki kag babayi sa ibabaw sang atop, nga nagatan-aw kay Samson nga nagalingaw sa ila.#16:27 nagalingaw sa ila: ukonginyaguta nila.
28Dayon nagpangamuyo si Samson, “O Ginoo nga Gamhanan, kon mahimo dumdoma ako. Kon mahimo, O Dios, hatagi ako sing kusog bisan makaisa na gid lang, agod nga makatimalos ako sa mga Filistinhon nga naglukat sang akon duha ka mga mata.” 29Gani gin-uyatan ni Samson ang duha ka mga haligi nga yara sa tunga nga nagatukod sang templo. Ang iya duha ka mga kamot nga yara sa duha ka mga haligi nagduso sini 30kag nagsinggit, “Bisan mapatay ako, basta upod lang sa mga Filistinhon!” Sa bug-os niya nga kusog iya ginduso ang mga haligi, kag nalusod ang templo sa lima ka mga hari kag sa tagsatagsa nga yadto didto. Mas madamo pa nga mga tawo ang iya napatay sang mapatay sia sang sa mga tawo nga napatay niya sang buhi pa sia.
31Dayon nagdulhog ang iya mga kautoran nga lalaki kag ang iya bug-os nga panimalay sa pagkuha sang iya bangkay. Gindala nila ang iya bangkay pauli kag ginlubong nila sia sa gintung-an sang Zora kag Estaol, sa lulobngan sang iya amay nga si Manoa. Nanginhukom sia sang Israel sa sulod sang baynte ka tuig.
Currently Selected:
Mga Hukom 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
