Mga Hukom 17
17
Ang mga Diosdios ni Miqueas
1May isa sadto ka tawo nga ang iya ngalan si Miqueas nga nag-estar sa kabakuloran sang Efraim. 2Ginsingganan niya ang iya iloy, “Sang kawaton ang imo 1,100 ka pilak, ginpakamalaut mo ang nagkawat kag nabatian ko gid ang imo pagpakamalaut. Tan-awa, yari sa akon ang mga pilak. Ako amo ang nagkawat sadto.”
Nagsiling ang iya iloy, “Kabay nga bendisyunan ka sang Ginoo, anak ko!” 3Gin-uli niya sa iya iloy ang 1,100 ka pilak. Ang iya iloy nagsiling, “Agod indi mahulog sa imo ang pagpakamalaut, anak ko, ako gid magahalad sini nga mga pilak sa Ginoo. Pagagamiton ini sa paghimo sing diosdios nga kahoy kag pagahaklapan ini sing pilak. Gani karon, iuli ko ini sa imo.” 4Pero gin-uli man niya ang mga pilak sa iya iloy. Nagkuha ang iya iloy sing 200 ka pilak, kag ginhatag niya sa platero, nga naghimo sing diosdios nga kahoy nga tinigban, kag ginhaklapan ini sing pilak. Ginbutang ini sa balay ni Miqueas.
5Ining tawo nga si Miqueas may kaugalingon nga lugar sa diin sia nagasimba. Naghimo sia sing mga diosdios kag mga bestidora#17:5 BESTIDORA: Tan-awa ang Lista sang mga Pulong. para sa ila, kag ginhimo niya ang isa sang iya mga anak nga lalaki nga iya pari. 6Wala sing hari sa Israel sadto nga tion. Ang tagsatagsa nagpagusto lang sang iya luyag nga himuon.
7Sa amo man nga tion, may isa ka pamatan-on nga lalaki nga nagaestar sa banwa sang Betlehem sa Juda. Isa sia ka Levita halin sa panimalay ni Juda. 8Naghalin sia sa Betlehem sa pagpangita sang iban nga lugar nga pagaestaran. Sang nagapanglakaton sia nakaabot sia sa balay ni Miqueas sa kabakuloran sang Efraim. 9Ginpamangkot sia ni Miqueas, “Diin ka bala maghalin?”
Nagsabat sia, “Ako isa ka Levita nga taga-Betlehem sa Juda. Nagapangita ako sing lugar nga sarang maestaran.”
10Nagsiling si Miqueas, “Diri ka na lang estar upod sa akon. Himuon ko ikaw nga akon manuglaygay kag pari, kag hatagan ko ikaw sing napulo ka bilog nga pilak kada tuig, mga bayu, kag pagkaon.” 11Nagpasugot ang pamatan-on nga Levita sa pag-estar upod kay Miqueas, kag nanginsubong sia sang isa ka anak ni Miqueas. 12Ginhimo sia ni Miqueas nga iya pari, kag nag-estar sia sa balay ni Miqueas. 13Nagsiling si Miqueas, “Karon nahibal-an ko nga himuon sang Ginoo ang tanan nga maayo para sa akon, kay may pari ako nga isa ka Levita.”
Currently Selected:
Mga Hukom 17: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
