Isaias 3
3
Kinagamo sa Jerusalem
1Karon ang Ginoo, ang Ginoo sang mga hangaway, magakuha sa Jerusalem kag Juda sang tanan nga mga butang kag sang tagsatagsa nga ginasaligan sang mga tawo. Kuhaon niya ang ila kalan-on kag ang ila tubig, 2ang ila mga baganihan kag ang ila mga soldado, ang ila mga hukom kag ang ila mga propeta, ang ila manughimalad kag ang ila mga pangulo, 3ang pangulo sang ila mga hangaway kag gubyerno, ang ila mga politiko, kag ang tanan nga mga manugbabaylan. 4Tugotan sang Ginoo nga dumalahan ang mga tawo sang payaon nga mga lalaki. 5Ang tagsatagsa magapamintaha sa isa kag isa. Ang mga pamatan-on indi magtahod sa ila mga tigulang, kag ang huroshuros nga mga tawo indi magtaha sa mga labaw sa ila.
6Magaabot ang tion nga ang mga katapo sang isa ka panimalay magapili sang isa sa ila kag magsiling, “May bayu pa ikaw imo nga inugsuksok, gani ikaw lang ang magpangulo sa amon sa sining tion sang kagamo.”
7Pero magasabat sia, “Indi ako! Indi ako makabulig sa inyo. Wala man ako sing kalan-on ukon bayu. Indi ninyo ako paghimua nga pangulo!”
8A, nagakamusmos na ang Jerusalem! Nagakapukan ang Juda! Ang tanan nga ila ginasiling kag ginahimo batok sa Ginoo. Ginapasipalahan nila sing hayag ang Dios. 9Magapanabat sila sang ila mga pagpasulabi. Nagapakasala sila sing hayag subong sang ginhimo sang mga tawo sa Sodoma. Malaglag sila, kag sila man ang nagdala sang ila kaugalingon nga kalaglagan.
10Ang matarong nga mga tawo magamalipayon,#3:10 Ang matarong nga mga tawo magamalipayon: Sa HebreoIsiling sa mga matarong. kag ang tanan mahapos lang sa ila. Magakalipay sila tungod sa ila ginpangabudlayan. 11Pero ang malaut nga mga tawo pagasilutan, magabayad sila sang ila ginhimo.
12Ang mga manugpahulam sing kwarta nagapigos sang akon mga tawo kag ang mga manugpautang nagadaya sa ila.
Mga tawo ko, ang inyo mga pangulo nagapatalang sa inyo, gani indi kamo kahibalo kon diin kamo makadto.
Ang Ginoo Nagahukom sa Iya mga Tawo
13Ang Ginoo handa na sang iya panumbongon. Handa sia sa paghukom sang iya mga tawo.#3:13 Ang iban nga dumaan nga mga pagbadbadiya mga tawo; sa Hebreomga katawhan. 14Ang Ginoo magahukom sang mga katigulangan kag mga pangulo sang iya mga tawo. Amo ini ang iya panumbongon: “Ginkawatan ninyo ang talamnan sang ubas, kag ang inyo mga balay napuno sang inyo ginpanguha sa mga imol. 15Wala kamo sing kinamatarong sa pagpigos sang akon mga tawo kag sa pagpamintaha sa mga imol. Ako, ang Ginoong Dios sang mga hangaway, naghambal sini.”
Paandam sa mga Babayi sa Jerusalem
16Ang Ginoo nagsiling, “Tan-awa kon daw ano ka bugalon ang mga babayi sa Jerusalem! Nagatanga gid kon maglakat. Pirme lang nagapangilay. Nagakiaykiay sila kag nagakilingkiling ang mga pulseras sa ila mga tiil kon maglakat. 17Pero silutan ko sila. Padalhan ko sila sang balatian sa ila mga ulo kag manginkalbo sila.”
18Ang adlaw magaabot nga kuhaon sang Ginoo ang tanan nga ginapabugal sang mga babayi sa Jerusalem, ang tanan nga mga adorno nga ila ginagamit sa ila mga tiil, sa ila mga ulo, sa ila mga liog, 19kag sa ila mga butkon. Kuhaon niya ang ila mga tabon sa guya, 20kag ang ila mga takdong; ang ila mga pulseras kag ang ila mga paha nga may mga anting-anting; 21ang mga singsing sa ila mga tudlo kag sa ila mga ilong; 22ang tanan nila nga malahalon nga mga bayu, mga kapa, mga kunop, kag mga kahita; 23ang ila nagasihag nga mga bayu, ang ila mga panyo nga lino, kag ang ila mga baliog kag ang ila malaba nga mga takurong.
24Sa baylo nga magagamit sila sing mga pahamot, magabaho sila; sa baylo sang matahom nga mga paha, magagamit sila sing baraghal nga mga kalat; sa baylo sang matahom nga buhok, magakalbo sila; sa baylo sang matahom nga mga bayu, magagamit sila sing mga lapat; ang ila katahom manginkahuloy-an!
25Ang mga lalaki sa siudad, bisan ang labing isganan nga mga lalaki magakalamatay sa inaway. 26Ang mga pwerta sang siudad magalalaw kag magahibi, kag ang siudad mismo manginkaangay sang babayi nga nagalumpiga sa duta nga ginhublasan.
Currently Selected:
Isaias 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
