Isaias 2
2
Ang Walay Katapusan nga Paghidait
(Miq. 4:1-3)
1Yari ang mensahe#2:1 mensahe: ukonpalanan-awon. nga ginpahayag sang Dios kay Isaias nga anak ni Amoz nahanungod sang Juda kag Jerusalem:
2Sa palaabuton nga mga inadlaw,
ang bukid nga ginatindugan sang Templo
amo ang mangin labing mataas sa tanan nga mga kabukiran,
kag pagabayawon labaw sa tanan nga mga kabakuloran.
Madamo nga mga kapungsoran ang magadugok sa iya,
3kag ang ila mga tawo magasiling,
“Mataklad kita sa bukid sang Ginoo,#2:3 BUKID SANG GINOO: Bukid sang Sion, ang bukid sa Jerusalem nga ang bahin sini ginpatindugan sang Templo.
pakadto sa Templo sang Dios sang Israel.
Pagatudloan niya kita kon ano ang luyag niya nga aton himuon,
magalakat kita sa mga dalan nga iya ginpili para sa aton.
Kay ang pagtudlo sang Ginoo nagagikan sa Jerusalem,
gikan sa Sion nagahambal sia sa iya mga tawo.”
4Husayon#Joel 3:10; Miq. 4:3. niya ang mga kasuayon sang gamhanan nga mga pungsod.
Ipasalsal nila ang ila mga espada nga mangin-arado,
kag ang ila mga bangkaw nga mangin-inughagbas.
Ang mga kapungsoran indi na gid mag-ilinaway,
ukon maghanda liwat para sa inaway.
5Karon, mga kaliwat ni Jacob, maglakat kita sa kapawa nga ginahatag sang Ginoo sa aton!
Pagalaglagon ang Pagkabugalon
6O Dios, ginsikway mo ang imo mga tawo, ang mga kaliwat ni Jacob! Ang duta puno sang mga hilikuton sang mga babaylan halin sa Sidlangan, kag halin sa Filistia. Ang mga tawo nagasunod sa kinabatasan sang mga dumoluong. 7Ang ila duta puno sing pilak kag bulawan, kag wala nagakaubos ang ila mga manggad. Ang ila duta puno sing mga kabayo, kag indi maisip ang ila mga karwahi sa inaway. 8Ang ila duta puno sing mga diosdios, kag nagasimba sila sang mga butang nga ginhimo sang ila mga kamot.
9Ang tagsatagsa pauboson kag pakahuy-an. Indi sila pagpatawara, O Ginoo!
10Magapanago#Bug. 6:15; 2 Tes. 1:9. sila sa mga kweba sa dalagku nga mga bato sa bakulod, ukon magakutkot sila sing buho sa duta sa pagpalagyo gikan sa kaakig sang Ginoo, kag magapanago sa iya gahom kag himaya! 11Ang adlaw magaabot nga magauntat ang bugal sang mga tawo, kag ang pagkamatinaastaason sang tawo masumpo. Dayon ang Ginoo lamang amo ang dayawon. 12Sa sadto nga adlaw ang Ginoo sang mga hangaway magapaubos sang tagsatagsa nga gamhanan, ang tagsatagsa nga bugalon kag matinaastaason. 13Laglagon niya ang tanan nga matag-as nga mga kahoy nga sedro sang Libano, kag ang tanan nga mga kahoy nga terebinto sa duta sang Basan. 14Tapanon niya ang mataas nga mga bukid kag mga bakulod, 15ang tagsa ka mataas nga tore, kag ang mga pader sang tagsa ka pamakod. 16Lunoron niya bisan ang pinakadaku kag pinakamatahom nga mga sakayan. 17Ang bugal kag ang pagkamatinaastaason sang mga tawo magauntat. Ang Ginoo lamang amo ang pagadayawon kon mag-abot ina nga adlaw, 18kag ang mga diosdios madula sing bug-os.
19Ang mga tawo magapanago sa mga kweba sa dalagku nga mga bato sa mga bakulod, ukon magakutkot sila sing buho sa duta sa pagpalagyo gikan sa kaakig sang Ginoo, kag magapanago sa iya gahom kag himaya, kon magaabot sia sa pag-uyog sang duta. 20Kon mag-abot ina nga adlaw, ipanghaboy nila sa mga ilaga kag sa mga kabog ang mga diosdios nga bulawan kag pilak nga ila ginhimo para sa ila kaugalingon agod simbahon. 21Kon mag-abot ang Ginoo sa pag-uyog sang duta, ang mga tawo magapalanago sa mga buho kag mga kweba sa dalagku nga mga bato sa mga bakulod agod makapalagyo gikan sa iya kaakig, kag sa pagpalanago gikan sa iya gahom kag himaya.
22Indi kamo magsalig sa mamalatyon nga mga tawo. Ano gid bala ang ila kapuslanan?
Currently Selected:
Isaias 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
