Isaias 24
24
Ang Ginoo Magasilot sang Duta
1Ang Ginoo magalaglag sang duta kag himuon niya ini nga mamingaw. Iya pabaliskaron ang duta kag paalaplaagon ang iya mga pumoluyo. 2Amo ini ang maabutan sang tagsatagsa—mga pari kag mga pumoluyo, mga ulipon kag mga agalon, mga manugbakal kag mga manugbaligya, mga manugpautang kag mga manug-utang, mga manggaranon kag mga imol. 3Ang duta mawagwag kag mabilin sa kalaglagan. Ang Ginoo amo ang naghambal kag matuman ini.
4Ang duta magamala kag malaya ang mga tanom, ang bug-os nga kalibutan magaluya, ang duta kag ang langit madunot. 5Ang mga tawo nagdagta sang duta paagi sa ila paglapas sang mga kasugoan sang Dios kag sa ila wala pagtuman sang kasugtanan nga wala sing katapusan nga iya ginhimo sa ila. 6Gani ang Dios nagpadala sang pagpakamalaut sa paglaglag sang duta. Ang iya pumoluyo nagabayad tungod sang ila ginahimo. Magaamat-amat diutay ang mabilin nga buhi. 7Ang mga balagon sang ubas magakalaya, kag ang bino magaiwat. Ang mga nagakalipay sang una karon magakasubo, 8kag ang masadya nga tinukar sang ila mga arpa kag mga bombo magauntat. 9Wala na sing kinanta sa ila pag-ininom, wala na sing makatilaw sang kanami sini. 10Ang bug-os nga siudad puno sang kagamo, ang tagsa ka balay sirado agod wala sing makasulod nga tawo. 11Ang mga tawo nagasinggit sa mga kalsada tungod kay wala na sing bino. Wala na gid sing kinasadya, nadula ang kinalipay sa duta. 12Ang siudad nalaglag kag ang iya mga pwerta nagkalaguba. 13Amo ini ang matabo sa tagsa ka pungsod sa bug-os nga kalibutan. Manginkaangay ini sang pagkatapos sang pagpangdugos, nga ang tagsa ka olivo naubosan sang iya mga bunga kag ang katapusan nga mga ubas naipo na.
14Ang mga mabilin nga buhi magakanta sa kalipay. Ang mga yara sa Nakatundan magasugid sang pagkagamhanan sang Ginoo, 15kag ang mga yara sa Sidlangan magadayaw sa iya. Ang mga tawo nga nagaestar sa baybayon magadayaw sa Ginoo, ang Dios sang Israel. 16Gikan sa malayo nga mga bahin sang kalibutan mabatian naton ang mga ambahanon sang pagdayaw sa Israel, ang matarong nga pungsod.
Pero ako wala sing paglaom! Nagakag-as ako! Ang mga traidor magapadayon sa pagluib, kag ang ila pagluib magalala nga magalala. 17Mga pumoluyo sang duta, magpamati kamo sa akon! May mga kakugmat, may mga tugalbong, kag mga siod nga nagahulat sa inyo. 18Ang bisan sin-o nga maglikaw sa kakugmat mahulog sa tugalbong, kag ang bisan sin-o nga maglikaw sa tugalbong madakpan sa siod. Ang madamol nga ulan magatupa halin sa langit, kag ang mga sadsaran sang duta magatay-og. 19Ang duta magalitik kag mabuka, kag mapihak. 20Ang duta mismo magadulingduling kaangay sang hubog, kag magauyog kaangay sang payag nga ginahuyop sang bagyo. Ang kalibutan ginabug-atan sang iya mga sala, mapukan ini kag indi na magbangon liwat.
21Ang tion magaabot nga ang Ginoo magasilot sang mga kagamhanan sa ibabaw kag sang mga pangulo sa duta. 22Ang Dios magatipon sang mga hari kaangay sang mga priso sa isa ka buho. Pagabilangguon niya sila tubtob sa tion sang pagsilot sa ila. 23Ang bulan magadulom, kag ang adlaw indi na magsiga, kay ang Ginoo sang mga hangaway amo ang manginhari. Magagahom sia sa Jerusalem sa Bukid sang Sion, kag ang mga pangulo sang mga tawo makakita sang iya himaya.
Currently Selected:
Isaias 24: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
