Isaias 23
23
Ang Mensahe Nahanungod sa Fenicia
1Amo#Ezeq. 26:1–28:19; Joel 3:4-8; Amos 1:9-10; Zac. 9:1-4; Mat. 11:21-22; Luc. 10:13-14. ini ang mensahe nahanungod sa Tiro.
Magpanalambiton kamo sa kasubo, kamo nga mga sakayanon sa kadagatan! Ang inyo pantalan sa Tiro naguba na; ang iya mga bodega kag ang iya dulongkaan nagkalaguba. Samtang ang inyo mga sakayan nagabalik halin sa Cipre, mabatian ninyo ang balita. 2Magpanalambiton kamo, mga negosyante sang Sidon! Ang inyo mga ahente inyo ginpabyahe 3sa dagat sa pagbakal kag pagbaligya sang mga patubas sang Ehipto kag sa pagnegosyo sa tanan nga mga kapungsoran.
4O siudad sang Sidon, nahuy-an ka! Ang dagat kag ang kadadalman sang kadagatan indi na mag-angkon sa imo nga nagasiling, “Wala gid ako nakaangkon sing mga anak. Wala gid ako makasagod sing mga anak nga lalaki ukon babayi.”
5Bisan ang mga Ehiptohanon makibot kag magakahadlok kon ila mabatian nga naguba na ang Tiro.
6Magpanalambiton kamo sa kasubo, mga pumoluyo sang Fenicia! Tinguha kamo sa pagpalagyo sa España! 7Amo bala ini ang malipayon nga siudad sang Tiro nga ginpasad sang una nga panahon? Amo bala ini ang siudad nga nagpadala sang mga tawo sa pag-estar sa mga lugar sa tabok sang dagat sa pagpasad sang mga banwa nga mangin-ila sakop? 8Sin-o bala ang nagplano sini tanan batok sa Tiro, inang gamhanan nga siudad, nga ang iya mga negosyante nga mga pangulo amo ang labing dungganon nga mga tawo sa duta? 9Ang Ginoo sang mga hangaway amo ang nagplano sini. Ginplano niya ini sa pagsumpo sang ila bugal tungod sang ila ginhimo, kag sa pagpakahuya sang ila dungganon nga mga tawo.
10Lakat kamo kag magpanguma sa duta, kamo nga mga tawo nga nagpasad sang mga banwa sa España! Wala na sing isa nga magaapin sa inyo. 11Ang Ginoo nag-untay sang iya kamot sa ibabaw sang dagat kag nagtumba sang mga ginharian. Nagsugo sia nga ang mga sentro sang negosyo sa Fenicia pagagub-on. 12O siudad sang Sidon, ang imo kalipay tapos na. Ang imo mga tawo ginapigos, kag bisan magpalagyo sila sa Cipre may katalagman man sila sa gihapon.
13Indi ang mga taga-Asiria kundi ang mga taga-Babilonia amo ang nagpasalakay sang Tiro sa mga sapat nga talunon. Ang mga taga-Babilonia amo ang nagpatindog sang mga tore nga amo ang gamiton sa pagsalakay, ginpangguba nila ang mga pamakod sang Tiro, kag ginlaglag nila ang siudad.
14Magpanalambiton kamo sa kasubo, kamo nga mga sakayanon sa kadagatan! Ang siudad nga inyo ginasaligan naguba na.
15Ang tion magaabot nga ang Tiro malimtan sa sulod sang setenta ka tuig, nga amo ang kalawigon sang kabuhi sang isa ka hari. Kon matapos na yadtong mga tinuig, ang Tiro manginkaangay sang isa ka babayi nga nagabaligya sang iya dungog nga ginasiling sa sini nga ambahanon:
16Dalha ang imo arpa, maglibot sa banwa,
nalimtan kag malain nga babayi!
Magtukar ka kag magkanta liwat,
sa pagpabalik sang imo mga kahagugma.
17Kon matapos ang setenta ka tuig, ang Ginoo magapabalik sa Tiro sa iya daan nga mga negosyo, kag pabayaran niya ang iya kaugalingon sa tanan nga mga ginharian sang duta. 18Ang kwarta nga iya maganansya paagi sa negosyo idulot niya sa Ginoo. Indi niya pagtaguon ini, pero ang nagasimba sa Ginoo magagamit sang iya kwarta sa pagbakal sang kalan-on kag bayu nga ila kinahanglan.
Currently Selected:
Isaias 23: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
