Ezequiel 24
24
Ang Tuktokon nga Kawa
1Sa ika-10 nga adlaw sang ika-10 nga bulan sang ikasiyam nga tuig sang kami ginbihag, ang Ginoo naghambal sa akon, 2“Tawo#2 Hari 25:1; Jer. 52:4. nga mamalatyon, isulat ang petsa karon nga adlaw, tungod kay amo ini ang adlaw nga ang hari sang Babilonia magasugod sa pagkibon sang Jerusalem. 3Sugiri ang akon mga tawo nga mabinatuon nahanungod sini nga paanggid nga ako, ang Ginoo nga Gamhanan, nagasiling sa ila:
Ibutang ang kawa sa kalayo,
kag pun-a ini sing tubig.
4Ibutang mo sa sini ang labing maayo nga hiniwa sang karne,
ang mga abaga kag ang mga paa,
pun-a ini sang pinili nga mga tul-an.
5Gamita ang karne sang pinakaali nga karnero,
gatungi ini sing mga kahoy.#24:5 kahoy: Sa Hebreomga tul-an.
Pabukala ang tubig,
lagaa ang mga tul-an kag mga karne.”
6Gani, amo ini ang ginasiling sang Ginoo nga Gamhanan: “Ang siudad sang mga manugpatay malaglag! Kaangay ini sang tuktokon nga kawa nga indi na gid matinluan. Ginhaw-as ang tagsa ka hiwa sang karne kag wala na gid sing nabilin. 7May patyanay sa siudad, pero wala mag-agay ang dugo sa duta sa diin ang yab-ok makatabon sini, kundi nag-agay ini sa bato. 8Ginbutang ko didto ang dugo sa diin indi ini matago kag nagakinahanglan sing pagtimalos.”
9Amo ini ang ginasiling sang Ginoo nga Gamhanan: “Ang siudad sang mga manugpatay malaglag! Ako gid ang magatumpok sang mga gatong. 10Dugangi pa gid ninyo ang mga gatong! Kuyabi ang kalayo! Lagaa ang karne! Pamalhi gid tubtob mabatok ang mga tul-an! 11Karon itungtong ang bronsi nga kawa nga wala sing unod sa mga baga kag pabagaha ini. Dayon ang mga tuktok makuha, kag ang kawa manginmatinlo liwat. 12Pero ang tanan nga tuktok indi makuha sang kalayo. 13O Jerusalem, ang imo mga pagpakighilawas nagdagta sa imo. Nagtinguha ako sa pagpaputli sa imo, pero nadagtaan ikaw sa gihapon. Indi ikaw magputli liwat tubtob matilawan mo ang akon nagabalingaso nga kaakig. 14Ako, ang Ginoo, naghambal sini. Nag-abot na ang tion nga himuon ko ini. Indi ko pagpabay-an ang imo kalautan, kag indi ako magkaluoy. Pagasilutan ko ikaw tungod sang imo ginhimo.” Ang Ginoo nga Gamhanan naghambal sini.
Ang Pagkapatay sang Asawa sang Propeta
15Ang Ginoo naghambal sa akon, 16“Tawo nga mamalatyon, sa hinali lang kuhaon ko ang imo gid pinalangga. Indi ka magreklamo ukon maghibi ukon magpatulo sing luha. 17Indi pag-ipabati ang imo pagnguyngoy. Indi ka maglakat nga wala sing tabon ang imo ulo ukon wala sing sandalyas ang imo mga tiil subong tanda sang imo paglalaw. Indi pagtabuni ang imo guya ukon magkaon sang kalan-on nga ginakaon sang mga nagalalaw.”
18Sang aga pa, nagpakighambal ako sa mga tawo. Pagkagab-i napatay ang akon asawa, kag sang pagkaaga gintuman ko ang sugo sa akon. 19Ang mga tawo nagpamangkot sa akon, “Ngaa nga daw wala ka imo nagakalisod?”
20Gani nagsiling ako sa ila, “Ang Ginoo naghambal sa akon kag nagsugo sa akon 21sa paghatag sa inyo nga mga Israelinhon sini nga mensahe: Nagapabugal kamo sang kapag-on sang Templo. Luyag kamo magtan-aw kag magkadto sa sini. Pero ang Ginoo magapasipakpak sini, kag ang inyo mga kabataan nga nabilin sa Jerusalem magakalamatay sa inaway. 22Dayon himuon ninyo ang akon ginhimo. Indi ninyo pagtabunan ang inyo mga guya ukon magkaon sang kalan-on sang mga nagalalaw. 23Indi kamo maglakat nga wala sing tabon ang inyo mga ulo ukon wala sing sandalyas ang inyo mga tiil. Indi kamo maglalaw ukon maghibi. Magakag-as kamo tungod sang inyo mga sala, kag magaugayong kamo sa isa kag isa. 24Dayon ako mangin-isa ka tanda sa inyo. Himuon ninyo ang tanan nga akon ginhimo. Ang Ginoo nagasiling nga kon mahanabo ini, makilala ninyo nga sia amo ang Ginoo nga Gamhanan.”
25Ang Ginoo nagsiling, “Karon, tawo nga mamalatyon, kuhaon ko sa ila ang mapag-on nga Templo nga ila ginapabugal kag ginakalipayan, nga luyag nila tan-awon kag kadtuan. Kag kuhaon ko ang ila mga anak nga lalaki kag babayi. 26Sa adlaw nga himuon ko ini, ang tawo nga makapalagyo sa kalaglagan magaabot kag magasugid sa imo nahanungod sini. 27Sa amo man nga adlaw makahambal na ikaw liwat kag indi na mangin-apa kag makapakighambal ikaw sa iya. Sa sini nga paagi mangintanda ikaw sa mga tawo, kag makilala nila nga ako amo ang Ginoo.”
Currently Selected:
Ezequiel 24: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
