Ezequiel 23
23
Ang Mag-utod nga mga Babayi nga Makasasala
1Ang Ginoo naghambal sa akon, 2“Tawo nga mamalatyon, sang una anay may duha ka mag-utod nga mga babayi. 3Sang pamatan-on pa sila, nag-estar sila sa Ehipto, kag didto napierde ang ila pagkadalaga, kag nangin mga babayi sila nga nagabaligya sang ila mga dungog. 4Ang magulang ginhingalanan kay Ohola,#23:4 OHOLA: Sa Hebreo ini nga ngalan nagakahulogan “iya santuaryo.” sia amo ang Samaria; kag ang manghod, si Oholiba,#23:4 OHOLIBA: Sa Hebreo ini nga ngalan nagakahulogan “ang akon santuaryo yara sa iya.” sia amo ang Jerusalem. Ginpangasawa ko sila nga duha, kag nagpanganak sila. 5Bisan si Ohola akon asawa, sa gihapon nagpadayon sia sa pagbaligya sang iya dungog, kag naila sia sa iya mga kahagugma nga mga taga-Asiria. 6Ini sila mga soldado nga nagauniporme sing pula, gamhanan nga mga tawo kag mataas nga mga opisyales, tanan sila mga gwapo kag pamatan-on nga mga opisyales nga nagasakay sa kabayo. 7Ginbaligya niya ang iya pagkababayi sa ila tanan, kag ang iya kaulag nagtulod sa iya sa pagdagta sang iya kaugalingon paagi sa pagsimba sang mga diosdios sang mga taga-Asiria. 8Nagpadayon sia sa pagbaligya sang iya dungog nga iya ginsugoran didto sa Ehipto, sa diin napierde ang iya pagkadalaga. Sang dalagita pa lang sia, ginhuliran sia sang mga lalaki, kag ginhimuslan sia subong isa ka babayi nga nagabaligya sang iya dungog. 9Gani gintugyan ko sia sa iya mga kahagugma nga mga Asiriahanon nga ginabuangan niya. 10Ginhublasan nila sia, ginkuha nila ang iya mga anak nga lalaki kag babayi, kag dayon ginpatay nila sia paagi sa espada. Ang iya dinangatan ang ginahambalan sang mga kababayin-an.
11“Nakita ini sang iya utod nga si Oholiba, pero mas sobra pa sia ka lain sang sa iya utod sa iya pagpatuyang bilang isa ka babayi nga nagabaligya sang iya dungog. 12Sia man naluyag gid sa mga gamhanan nga mga tawo kag mga opisyales nga taga-Asiria—mga soldado nga nagauniporme—kag sa mga soldado nga nagasakay sa kabayo. Tanan sila mga gwapo kag pamatan-on nga mga lalaki. 13Nakita ko nga tuman sia kalain nga babayi, kag pareho gid sila sang iya utod nga babayi.
14-15“Nagdugang pa gid ang iya pagkalain. Naganyat sia sang mga imahen sang mga opisyales nga taga-Babilonia nga nasinsil sa pader nga napintahan sing pula, nga may mga wagkos sa ila mga hawak kag matahom nga mga turbante sa ila mga ulo. 16Sang makita niya sila, naila gid sia sa ila, kag nagpadala sia sing mga mensahero sa ila sa Babilonia. 17Ang mga taga-Babilonia nag-abot sa pagpakighilawas sa iya. Ginhimuslan nila sia, kag nagpaayaw-ayaw sa iya tubtob nga sang ulihi tinak-an sia sa ila. 18Naghublas sia sa atubangan sang mga tawo kag ginpakilala niya sa tagsatagsa nga sia isa ka malain nga babayi. Ginkangil-aran ko sia subong sang akon pagkangil-ad sa iya utod nga babayi. 19Nagdugang pa gid ang iya kalain sa pagbaligya sang iya dungog subong sang iya ginhimo sang pamatan-on pa sia didto sa Ehipto. 20Naila gid sia sa mga lalaki nga sobra ka makihilawason nga ang ila kaibog sa unod kasubong sang kaibog sang asno ukon sang kabayo. 21Gani, Oholiba, luyag mo himuon liwat ang imo sala nga amo ang pagpakighilawas didto sa Ehipto sang ikaw pamatan-on, sa diin ang mga lalaki naghikap sang imo dughan kag nagpierde ang imo pagkadalaga.
Ang Paghukom sang Dios sa Manghod nga Babayi
22“Gani karon, Oholiba, ako, ang Ginoo nga Gamhanan, nagasiling sa imo: Natak-an ka na sang imo mga kahagugma, pero paakigon ko sila sa imo kag dalhon ko sila agod libutan nila ikaw. 23Dalhon ko diri ang tanan nga mga taga-Babilonia kag taga-Caldea, mga tawo halin sa Pekod, Soa, Koa, kag ang tanan nga mga taga-Asiria. Tanan sila mga gwapo kag pamatan-on nga mga opisyales kag gamhanan nga mga tawo. Sila tanan mga opisyales nga may mataas nga palangakuan sa gubyerno kag mga opisyales nga nagasakay sa kabayo. 24Magasalakay sila sa imo halin sa aminhan nga may madamo nga mga hangaway nga may mga karwahi sa inaway kag may mga karo nga nakargahan sang ila mga balon. Nasangkapan sila sing mga taming kag mga helmet, kag libutan nila ikaw. Itugyan ko ikaw sa ila, kag hukman nila ikaw suno sa ila kaugalingon nga mga kasugoan. 25Tungod sang akon kaakig sa imo, patilawon ko ikaw sang ila kasingkal. Pagautdon nila ang imo ilong kag ang imo mga dulonggan kag pamatyon ang imo mga kabataan. Huo, kuhaon nila ang imo mga anak nga lalaki kag babayi kag sunogon sila nga buhi. 26Hublasan ka nila sang imo bayu kag kuhaon nila ang imo mga alahas. 27Pauntaton ko ang imo pagkaulag kag pagkamakihilawason nga imo ginhimo halin pa sang didto ikaw sa Ehipto. Indi ka na maghandom sang mga diosdios ukon magpanumdom pa nahanungod sang Ehipto.”
28Amo ini ang ginasiling sang Ginoo nga Gamhanan: “Itugyan ko ikaw sa mga tawo nga imo ginadumtan kag ginakangil-aran. 29Kag tungod kay ginadumtan nila ikaw, kuhaon nila ang tanan nga imo ginpangabudlayan, kag bayaan nila ikaw nga hublas. Mabuyagyag ang imo pagkahublas subong sang isa ka malain nga babayi. Ang imo kaulag kag pagpakighilawas 30amo ang kabangdanan sini. Nanginmalain ikaw nga babayi para sa iban nga mga pungsod kag gindagtaan mo ang imo kaugalingon sang ila mga diosdios. 31Nagsunod ikaw sang ginhimo sang imo utod nga babayi, gani silutan ko ikaw pareho sa iya.”
32Ang Ginoo nga Gamhanan nagasiling,
“Magainom ka sa kupa sang imo utod nga babayi,
isa ka kupa nga daku kag madalom.
Ang tagsatagsa magayubit kag magayaguta sa imo,
ang kupa puno.
33Mahubog ka sini kag mapun-an sing kasubo,
ini ang kupa sang kahadlok kag kalaglagan,
ang kupa sang imo utod nga Samaria.
34Pagaimnon mo ini tubtob ang iya mga labod,
dayon mabuka ini
kag magapilas sang imo dughan.
Ako, ang Ginoo nga Gamhanan, amo ang naghambal sini.”
35Gani, amo ini ang ginasiling sang Ginoo nga Gamhanan: “Tungod kay nagkalipat kag nagtalikod ka sa akon, magaantos ka tungod sang imo pagkaulag kag pagpakighilawas.”
Ang Paghukom sang Dios sa Mag-utod nga Babayi
36Ang Ginoo nagsiling sa akon, “Tawo nga mamalatyon, handa ka bala sa paghukom kay Ohola kag kay Oholiba? Isumbong sila tungod sang makahuloya nga mga butang nga ila ginhimo. 37Nagpakighilawas sila sa mga diosdios kag nagpamatay sang mga anak nga lalaki nga ginpanganak sa akon. Ginhalad nila ang akon mga anak nga lalaki sa ila mga diosdios. 38Kag indi lamang amo ini ang ila ginhimo. Ginpasipalahan nila ang akon Templo kag ginlapas ang Adlaw nga Inugpahuway nga akon gintangdo. 39Sa tapos nila mapamatay ang akon mga kaanakan subong mga halad sa mga diosdios, nagkadto sila sa akon Templo sa amo man nga adlaw kag ginpasipalahan nila ini.
40“Kapila gid sila nagpasugat sing mga lalaki halin sa malayo nga lugar, kag nag-abot sila. Ang duha ka mag-utod nga babayi nagpaligo kag nagpatahom sang ila mga mata kag nagsuksok sing mga alahas. 41Nagpungko sila sa matahom nga katre, kag sa atubang nila may naaman nga lamisa nga may maayo nga mga butang lakip ang insyenso kag lana sang olivo nga akon ginhatag sa ila. 42Nabatian ang hinugyaw sang madamo nga mga tawo nga gindala halin sa desierto. Ginpasuksokan nila sing mga pulseras ang mga babayi kag ginbutangan sila sang matahom nga mga korona. 43Kag nagsiling ako nga nagapakighilawas sila sa babayi nga nagdaku sa pagpakighilawas. 44Nagbalikbalik sila sa sini nga mga babayi nga nagabaligya sang ila dungog. Nagbalikbalik sila kay Ohola kag kay Oholiba, yadtong malain nga mga babayi. 45Ang matarong nga mga tawo magakondenar sa ila tungod sang ila pagpakighilawas kag pagpamatay tungod kay mga makihilawason sila kag ang ila mga kamot namansahan sang dugo.”
46Amo ini ang ginasiling sang Ginoo nga Gamhanan: “Magpatawag ka sing madamo nga mga tawo sa paggubat kag sa pagkuha sang ila mga pagkabutang. 47Pabay-i sila nga batuhon kag hatukhatokon paagi sa espada, kag pamatyon ang ila mga kabataan, kag sunogon ang ila mga balay. 48Pauntaton ko ang mga pagpakighilawas sa bug-os nga duta subong nga paandam sa tagsa ka babayi nga indi magpakighilawas subong sang ila ginhimo. 49Kag kamo nga duha ka mag-utod nga babayi pagasilutan ko tungod sang inyo pagpakighilawas kag pagsimba sa mga diosdios. Dayon makilala ninyo nga ako, amo ang Ginoo nga Gamhanan.
Currently Selected:
Ezequiel 23: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
