Ezequiel 22
22
Ang mga Sala sang Jerusalem
1Ang Ginoo naghambal sa akon, 2“Tawo nga mamalatyon, handa ka bala sa paghukom sang siudad nga puno sang mga manugpatay? Sugiri sia sang tanan nga makahuloya nga mga butang nga iya ginhimo. 3Sugiri ina nga siudad nga ako, ang Ginoo nga Gamhanan nagsiling: Tungod kay ginpamatay mo ang madamo sang imo kaugalingon nga mga tawo, kag gindagtaan mo ang imo kaugalingon paagi sa pagsimba sa mga diosdios, magaabot ang tion nga silutan ko ikaw. 4May salabton ikaw sadto nga pagpamatay kag nadagtaan ikaw tungod sang mga diosdios nga imo ginhimo, kag ang adlaw sa pagsilot sa imo yari na. Tion mo na ini! Gani gintugotan ko ang mga kapungsoran sa pagyao-yao sa imo, kag ang tanan nga mga pungsod nagayaguta sa imo. 5Ang mga kapungsoran sa malapit kag sa malayo nagayaguta sa imo tungod sang sobra nga kalautan nga imo ginahimo. 6Ang tanan nga mga pangulo sang Israel nagasalig sa ila kaugalingon nga kusog kag nagapamatay. 7Wala#Exo. 20:12; Deut. 5:16; Exo. 22:21-22; Deut. 24:17. sing isa sa siudad nga nagataha sa iya mga ginikanan. Ginadayaan mo ang mga dumoluong, kag ginapigos ang mga balo kag mga ilo. 8Wala#Lev. 19:30; 26:2. ka nagataha sang mga lugar nga balaan, kag wala mo ginatuman ang Adlaw nga Inugpahuway. 9Ang iban sang imo mga pumoluyo nagabutangbutang sa iban agod ipapatay sila. Ang iban sa ila nagakaon sang mga ginhalad sa mga diosdios. Ang iban nagapatuyang sa kailigbon sang ila unod. 10Ang#Lev. 18:7-20. iban sa ila nagapakighilawas sa asawa sang ila amay. Ang iban sa ila nagapilit sa pagpakighilawas sa mga babayi nga yara ang ila pamulanon. 11Nagapakighilawas sila sa mga asawa sang iban kag sa ila mga umagad ukon sa ila mga utod nga babayi sa amay ukon iloy. 12Ang#Exo. 23:8; Deut. 16:19; Exo. 22:25; Lev. 25:36-37; Deut. 23:19. iban sang imo mga pumoluyo nagapamatay tungod sa suhol. Ang iban nagapahulam sing sakaan sa ila kapareho nga mga Israelinhon kag nagapamanggaranon paagi sa pagpamintaha sa ila. Nalimtan nila ako.” Ang Ginoo nga Gamhanan amo ang naghambal sini.
13“Ipukpok ko ang akon inumol sa imo mga pagpangawat kag mga pagpamatay. 14May kaisog pa bala ikaw nga mabilin ukon kusog nga sarang makaalsa sang imo kamot sa tapos ako magsilot sa imo? Ako, ang Ginoo, nagsiling sini, kag himuon ko ang akon ginasiling. 15Palaplaagon ko ang imo mga pumoluyo sa tanan nga mga kapungsoran sa bug-os nga duta kag pauntaton ko ang imo malaut nga mga ginahimo. 16Kag ang iban nga mga kapungsoran magapasipala sa imo, pero magakilala ikaw nga ako amo ang Ginoo.”
Ang Hornohan sang Dios nga Nagapapuraw
17Ang Ginoo nagsiling sa akon, 18“Tawo nga mamalatyon, ang mga Israelinhon wala sing pulos para sa akon. Kaangay sila sang lugdang sang metal—saway, lata, salsalon, kag tingga—nga nabilin sa tapos mapapuraw ang pilak sa hornohan. 19Gani karon, ako, ang Ginoo nga Gamhanan, nagasiling sa ila nga pareho sini ang ila pagkawala sing pulos. Tipunon ko sila sing tingob sa Jerusalem 20pareho sang pagbutang sang pilak, saway, salsalon, tingga, kag lata sa hornohan nga nagapapuraw. Ang akon nagabalingaso nga kaakig magatunaw sa ila kaangay sang metal sa kalayo. 21Huo, tipunon ko sila sa Jerusalem, dabukan ko sila sing kalayo, kag matunaw sila sa akon kaakig. 22Pagatunawon sila sa Jerusalem kaangay sang pagtunaw sang pilak sa hornohan, kag dayon makilala nila kag mabatyagan ang kaakig sang Ginoo.”
Ang mga Sala sang mga Pangulo sang Israel
23Ang Ginoo naghambal liwat sa akon, 24“Tawo nga mamalatyon, singgana ang mga Israelinhon nga sila isa ka pungsod nga di-balaan gani ginasilutan ko sila sa akon kaakig. 25Ang mga pangulo#22:25 Ang isa ka dumaan nga pagbadbadAng mga pangulo; sa HebreoAng plano nga malaut sang iya mga propeta. kaangay sang mga leon nga nagangurob samtang ila ginagus-ab ang ila mga biktima. Nagapamatay sila sing mga tawo, ginakuha nila ang tanan nga kwarta kag mga pagkabutang nga sarang nila makuha, kag sa ila pagpamatay madamo ang nabalo. 26Ang#Lev. 10:10. mga pari nagalapas sang akon kasugoan kag wala sila nagataha sang mga butang nga balaan. Para sa ila pareho lang ang tanan, ang balaan kag di-balaan. Wala sila nagatudlo sang kinatuhay sang matinlo kag di-matinlo nga mga butang, kag wala sila nagasapak sang Adlaw nga Inugpahuway. Tungod sini, ang mga tawo sang Israel wala nagatahod sa akon. 27Ang mga pangulo sang banwa kaangay sang mga lobo nga nagakusnit sang mga sapat nga ila ginpamatay. Nagapamatay sila agod magmanggaranon. 28Ang mga propeta nagtabon sini nga mga sala kaangay sang mga tawo nga nagapaputi sang pader. Ang ila mga palanan-awon indi matuod kag nagatagna sila sing binutig. Nagasiling sila, ‘Amo ini ang ginasiling sang Ginoo nga Gamhanan,’ bisan nga ako, ang Ginoo, wala maghambal sa ila. 29Ang mga manggaranon nagapangdaya kag nagapangawat. Ginapigos nila ang mga imol kag nagapamintaha sa mga dumoluong. 30Nagpangita ako sang isa ka tawo nga makapatindog sang pader, kag makatindog sa mga lugar sa diin nagkalaguba ang mga pader sa pag-apin sang duta kon ang akon kaakig buot na maglaglag sini, pero wala ako sing nakita. 31Gani iula ko ang akon kaakig sa ila, kag kaangay sang kalayo laglagon ko sila tungod sang ila ginhimo.” Ang Ginoo nga Gamhanan amo ang naghambal sini.
Currently Selected:
Ezequiel 22: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
