Ezequiel 15
15
Ang Palaanggiran nahanungod sang Isa ka Balagon sang Ubas
1Ang Ginoo naghambal sa akon, 2“Tawo nga mamalatyon, ano bala ang kinaayo sang balagon sang ubas sang sa isa ka kahoy? Ano bala ang kinaayo sang isa ka sanga sang balagon sang ubas sang sa iban nga mga kahoy sa talon? 3Sarang mo bala ini magamit sa paghimo sang bisan ano? Makahimo ka bala gikan sa sini sing isa ka bugsok nga sab-itan sang bisan ano nga butang? 4Maayo lang ini igatong sa kalayo. Dayon kon ang iya duha ka punta masunog kag ang sa tunga maupos, makahimo ka bala bisan ano gikan sa sini? 5Sang wala pa ini masunog wala ini sing pulos. Karon kay ang kalayo nagsunog kag nag-upos sini, naglabi pa gid nga wala ini sing pulos.”
6Karon amo ini ang ginasiling sang Ginoo nga Gamhanan: “Subong nga ang balagon sang ubas ginakuha sa talon kag ginasunog, kuhaon ko man ang akon mga tawo nga nagaestar sa Jerusalem 7kag silutan sila. Nakapalagyo sila sa kalayo, pero karon ang kalayo magasunog sa ila. Kon silutan ko sila, makilala ninyo nga ako amo ang Ginoo. 8Indi sila matutom sa akon, gani himuon ko nga desierto ang pungsod.” Ang Ginoo nga Gamhanan naghambal sini.
Currently Selected:
Ezequiel 15: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
