Ezequiel 14
14
Ang Dios Nagapakamalaut sa Pagsimba sang mga Diosdios
1Ang pila ka mga pangulo sang mga Israelinhon nag-abot sa pagpamangkot sa akon konano ang kabubot-on sang Ginoo. 2Dayon ang Ginoo naghambal sa akon, 3“Tawo nga mamalatyon, ini nga mga tawo nagahigugma sa mga diosdios kag ginatugotan nila ang mga diosdios sa pagdala sa ila sa pagpakasala. Nagahunahuna bala sila nga sabton ko sila?
4“Karon hambal ka sa ila kag singgana sila nga ako, ang Ginoo nga Gamhanan nagasiling sini sa ila: Ang tagsa ka Israelinhon nga nagahigugma sa mga diosdios kag nagapasugot sa ila sa pagdala sa iya sa pagpakasala, kag dayon magpamangkot sa propeta, pagasabton ko. Ang sabat amo ang nagakabagay sa iya madamo nga mga diosdios! 5Ina tanan nga mga diosdios nagpahilayo sang mga Israelinhon sa akon, pero paagi sa akon sabat, nagalaom ako nga mapabalik ang ila katutom sa akon.
6“Gani karon, sugiri ang mga Israelinhon nga ako, ang Ginoo nga Gamhanan, nagasiling sini: Balik kamo kag bayai ang inyo makangilil-ad nga mga diosdios.
7“Kon ang isa sang mga Israelinhon ukon isa sang mga dumoluong nga nagaestar sa katilingban sang Israel magbiya sa akon kag magsimba sa mga diosdios, kag dayon mamangkot sia sa isa ka propeta, ako, ang Ginoo, magasabat sa iya! 8Ako magasumpong sa iya. Himuon ko sia nga tanda sa pagpaandam sa iban. Pagakuhaon ko sia sa katilingban sang akon mga tawo, agod makilala ninyo nga ako amo ang Ginoo.
9“Kon ang isa ka propeta madayaan sa paghatag sang isa ka di-matuod nga sabat, ini tungod kay ako, ang Ginoo, nagdaya sa iya. Pagakuhaon ko sia sa mga tawo sang Israel. 10Ang propeta kag ang tawo nga nagapamangkot sa iya magabaton sing pareho nga silot. 11Himuon ko ini agod ang mga Israelinhon indi magbiya sa akon kag indi sila magdagta sang ila kaugalingon paagi sa ila pagpakasala. Mangin-akon sila mga tawo kag ako mangin-ila Dios.” Ang Ginoo nga Gamhanan amo ang naghambal sini.
Si Noe, si Daniel, kag si Job
12Ang Ginoo naghambal sa akon, 13“Tawo nga mamalatyon, kon ang isa ka pungsod magpakasala kag indi magmatutom sa akon, lambuton ko kag laglagon ang ila ginakuhaan sing pagkaon. Padalhan ko sila sing gutom kag magakalamatay ang mga tawo kag mga kasapatan. 14Bisan yadtong tatlo ka mga tawo nga amo sanday Noe, Daniel,#14:14 Daniel: ukon Danel (Tan-awa ang 28:3), isa ka baganihan sang una nga nabantugan tungod sang iya matarong nga kabuhi. kag Job magkabuhi didto, ang ila pagkamatarong makaluwas lamang sang ila kaugalingon nga mga kabuhi,” siling sang Ginoo nga Gamhanan.
15“Ukon magpadala ako sing mga sapat nga talunon sa pagpamatay sang mga pumoluyo, kag himuon ko nga manginmakatalagam ang duta sa bagay nga wala sing isa nga makaagi sa sini, 16kag bisan yadtong tatlo ka mga tawo mag-estar didto, subong nga ako gid ang Ginoo nga Gamhanan, ang Dios nga buhi, indi sila makaluwas bisan sang ila kaugalingon nga mga anak. Ang ila lamang maluwas amo ang ila kaugalingon nga mga kabuki, kag ang duta mangindesierto.
17“Ukon ako magapadala sing inaway sa sina nga pungsod kag magapadala sing makahalalit nga mga hinganiban sa pagpapas sang mga pumoluyo kag sang mga kasapatan, 18kag bisan yadtong tatlo ka mga tawo mag-estar didto subong nga ako gid ang Ginoo nga Gamhanan, ang Dios nga buhi, indi sila makaluwas bisan sang ila mga anak, kundi ang ila lamang kaugalingon nga mga kabuhi. 19“Kon ako magpadala sing mga pamalatian sa sina nga pungsod, kag sa akon kaakig madamo nga mga kabuhi ang madula, nga nagapamatay sang mga pumoluyo kag mga kasapatan, 20bisan sanday Noe, Daniel, kag Job mag-estar didto, subong nga ako gid ang Ginoo nga Gamhanan, ang Dios nga buhi, indi sila makaluwas bisan sang ila kaugalingon nga mga anak. Ang ila pagkamatarong magaluwas lamang sang ila kaugalingon nga kabuhi.”
21Amo#Bug. 6:8. ini ang ginasiling sang Ginoo nga Gamhanan: “Ipadala ko ang akon apat ka labing mabug-at nga mga silot sa Jerusalem—inaway, gutom, talunon nga mga sapat, kag pamalatian—sa pagpamatay sang mga pumoluyo kag mga kasapatan. 22Kon may mabilin nga buhi kag magluwas sang iya mga kabataan, tan-awa sila kon magpalapit sila sa imo. Makita mo kon daw ano ang ila kalaut, kag magapati ka nga ang silot nga akon ginapadala sa Jerusalem nagakabagay. 23Dayon mahibal-an mo nga may rason ako sang tanan nga akon ginhimo.” Ang Ginoo nga Gamhanan amo ang naghambal sini.
Currently Selected:
Ezequiel 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
