Ezequiel 16
16
Ang Pagkadi-matutom sang Jerusalem
1Ang Ginoo naghambal liwat sa akon, 2“Tawo nga mamalatyon, ipakilala sa Jerusalem ang makangilil-ad nga mga butang nga iya ginhimo. 3Sugiri ang Jerusalem sang ginasiling sa iya sang Ginoo nga Gamhanan:
“Natawo ikaw sa duta sang Canaan. Ang imo amay isa ka Amornon, kag ang imo iloy isa ka Hethanon.#16:3 AMORNON…HETHANON: Ang mga Israelinhon nagkabig sini nga mga tawo nga makihilawason kag nagasimba sa mga diosdios. 4Sang imo pagkatawo, wala sing may nag-utod sang imo pusod, wala sing may naghugas sa imo, ukon naghaplas sa imo sing asin, ukon nagputos sa imo sing lampin. 5Wala gid sing may nagkaluoy sa paghimo sa imo sini nga mga butang. Sang imo pagkatawo wala gid sing may naghigugma sa imo sa bagay nga gintapok ka nila sa wayang.
6“Sang maagyan ko ikaw, nakita ko ikaw nga nagaligidligid sa imo kaugalingon nga dugo. Nabulit ka sang dugo, pero indi ko mapabay-an nga mapatay ikaw. 7Ginpatubo ko ikaw subong sang isa ka matambok nga tanom. Nagdaku ka kag nagtaas kag nangin-isa ka dalaga. Nagdaku ang imo mga suso, kag naglaba ang imo buhok, pero hublas ikaw.
8“Sang maagyan ko ikaw liwat, nakita ko nga bagay na ikaw sa paghigugma. Gintabunan ko ang imo hublas nga lawas sang akon kunop, kag nagsaad ako nga higugmaon ko ikaw. Huo, naghimo ako sang kasugtanan sa pagpangasawa sa imo, kag ikaw nangin-akon.” Amo ini ang ginasiling sang Ginoo nga Gamhanan.
9“Dayon nagkuha ako sing tubig kag ginhugasan ang dugo sa imo lawas. Ginhaplasan ko ang imo panit sing lana sang olivo. 10Ginpabayuan ko ikaw sing binordahan nga trahe kag ginpasuksokan ko ikaw sing sandalyas nga panit, isa ka turban nga lino, kag seda nga kunop. 11Ginhatagan ko ikaw sing mga alahas nga isuksok: mga pulseras kag mga kulintas. 12Ginhatagan ko ikaw sang singsing para sa ilong, kag mga aritos, kag isa ka matahom nga korona para sa imo ulo. 13Napunihan ka sing bulawan kag pilak, kag ang imo mga bayu nabordahan nga lino kag seda. Ang imo kalan-on nahimo gikan sa labing maayo nga harina, kag wala ikaw mawad-i sing dugos kag lana sang olivo. Labi ang imo katahom kag nanginrayna ikaw. 14Tungod sang imo katahom nabantugan ikaw sa tagsa ka pungsod. Himpit ini kay ako ang nagpatahom sa imo.” Amo ini ang ginasiling sang Ginoo nga Gamhanan.
15“Pero ginhimuslan mo ang imo katahom kag pagkabantog sa pagpakighilawas sa kay bisan sin-o nga nagaagi. 16Gingamit mo ang iban nimo nga mga bayu sa pagpatahom sang mga lugar nga ginasimbahan, kag didto ginhatag mo ang imo kaugalingon subong sang isa ka babayi nga nagabaligya sang iya dungog sa kay bisan sin-o. 17Ginkuha mo ang pilak kag bulawan nga mga alahas nga akon ginhatag sa imo, gingamit mo sa paghimo sing mga estatwa nga mga lalaki, kag nagpakighilawas ka sa ila. 18Ginkuha mo ang binordahan nga mga bayu nga ginhatag ko sa imo kag ginpabayu mo ini sa mga imahen, kag ginhalad mo sa mga estatwa ang lana sang olivo kag insyenso nga ginhatag ko sa imo. 19Ginhatagan ko man ikaw sing kalan-on nga nahimo gikan sa labing maayo nga harina, lana sang olivo, kag dugos, pero gindulot mo ini subong isa ka halad sa paglipay sa mga diosdios.” Amo ini ang ginasiling sang Ginoo nga Gamhanan.
20“Dayon ginkuha mo ang mga anak nga lalaki kag babayi nga imo gin-anak sa akon, kag gindulot mo sila subong nga mga halad sa mga diosdios. Indi pa bala tama kalain ang imo pagbiya sa akon 21nga imo pa ginkuha ang akon mga anak kag ginhalad sa mga diosdios? 22Samtang yara ikaw sa imo makahuloya nga kabuhi subong isa ka babayi nga nagabaligya sang iya dungog, wala ka gid makadumdom nga sang bata pa ikaw, hublas ka nga nagaligid sa imo kaugalingon nga dugo.”
Ang Kabuhi sang Jerusalem subong sang Isa ka Babayi nga Nagabaligya sang Iya Dungog
23Ang Ginoo nga Gamhanan nagsiling, “Nalaglag na ikaw! Tapos ka gid! Sa tapos mo mahimo ina tanan nga kalautan, 24nagpatindog ka sa tagsa ka ginsang-an sang dalan sang mga lugar nga imo simbahan sang mga diosdios, kag didto mo ginabaligya ang imo dungog. 25Ginguyod mo ang imo katahom sa lamawan. Gintanyag mo ang imo kaugalingon sa kay bisan sin-o nga nagaagi kag nagadugang pa gid ang imo kalaut kada adlaw. 26Gintugotan mo ang imo mga kaingod nga mga Ehiptohanon nga makihilawason sa paghulid sa imo, kag ginpaakig mo ako sa imo pagpakighilawas.
27“Gani ginbayaw ko ang akon kamot sa pagsilot sa imo kag sa pagkuha sang imo bahin sa mga kaayuhan nga akon gintigana sa imo. Gintugyan ko ikaw sa mga Filistinhon nga nagadumot sa imo kag nagakangil-ad sa imo pagkamakihilawason.
28“Tungod kay wala pa ikaw maayawi sa iban, ginlagas man nimo ang mga Asiriahanon. Nagpakighilawas ka sa ila, pero wala man ikaw maayawi sa ila. 29Nagpakighilawas man ikaw sa mga taga-Babilonia, ang pungsod nga sentro sang negosyo, pero wala man ikaw maayawi sa ila.”
30Amo ini ang ginasiling sang Ginoo nga Gamhanan: “Ini tanan ginhimo mo subong sang isa ka babayi nga wala sing huya nga nagabaligya sang iya dungog. 31Sa tanan nga dalan nagpatindog ka sing mga lugar nga imo simbahan sang mga diosdios kag didto mo ginabaligya ang imo dungog. Pero indi kwarta ang imo ginapangita pareho sang iban nga babayi nga nagabaligya sang ila dungog. 32Kaangay ikaw sang isa ka asawa nga nagapakighilawas sa iban nga mga lalaki sa baylo nga iya higugmaon ang iya bana. 33Ang malain nga babayi ginabayaran, pero ikaw amo ang nagahatag sing mga regalo sa imo mga kerido kag nagahamham sa kay bisan sin-o nga mag-abot gikan sa bisan diin agod sa paghulid sa imo. 34Pinasahi ikaw nga sahi sang malain nga babayi. Wala sing nagpilit sa imo nga mangin-amo ka sina. Wala ka ginbayari, kundi ikaw ang nagbayad sa ila! Huo, pinasahi gid ikaw.”
Ginhukman sang Dios ang Jerusalem
35Gani karon, Jerusalem, ikaw nga makihilawason, pamatii ang ginasiling sang Ginoo.
36Amo ini ang ginasiling sang Ginoo nga Gamhanan: “Ginhublasan mo ang imo kaugalingon kag kaangay sang isa ka malain nga babayi, gintugyan mo ang imo kaugalingon sa imo mga lalaki kag sa tanan nga makangilil-ad nimo nga mga diosdios, kag ginpamatay nimo ang imo mga anak subong mga halad sa mga diosdios. 37Tungod sini pagatipunon ko ang tanan nimo nga mga kerido sang una, ang imo ginhigugma kag ang imo gindumtan. Tipunon ko sila sa imo palibot, dayon ubahan ko ikaw kag ipakita sa ila ang imo pagkahublas. 38Pakamalauton ko ikaw tungod sang imo pagpakighilawas kag pagpamatay kag silutan ko ikaw sing kamatayon sa akon nagabalingaso nga kaakig. 39Itugyan ko ikaw sa ila gahom, kag gub-on nila ang mga lugar sa diin ikaw nagapakighilawas kag nagasimba sa mga diosdios. Panguhaon nila ang imo mga bayu kag mga alahas kag bayaan nila ikaw nga hublas sing bug-os
40“Sudyoton nila ang madamo nga mga tawo nga batuhon ikaw kag hatukhatokon sang ila mga espada. 41Sunogon nila ang imo mga balay kag ipakita sa madamo nga mga babayi ang pagsilot sa imo. Pauntaton ko ang imo pagpakighilawas kag paghatag sing mga regalo sa imo mga kerido. 42Dayon indi na ako magkaakig kag magpangimon sa imo. Magalinong ako kag indi na magkaakig. 43Ginkalimtan mo kon daw ano ang pagtatap ko sa imo sang pamatan-on pa ikaw, kag ginpaakig mo ako tungod sang tanan nga mga butang nga imo ginhimo. Gani, ginpabayad ko ikaw tungod sang imo ginhimo. Ngaa man nagpakighilawas ka wala labot sini nga mga kangil-aran nga imo ginhimo?” Ang Ginoo nga Gamhanan amo ang naghambal sini.
Kon Ano ang Iloy, Amo man ang Anak
44Ang Ginoo nagsiling, “O Jerusalem, ang mga tawo magahambal sini nga hulobaton nahanungod sa imo: ‘Kon ano ang iloy, amo man ang anak!’ 45Anak gid ikaw nga babayi sang imo iloy. Tinak-an sia sang iya bana kag mga kabataan. Pareho man ikaw sang imo mga utod nga babayi nga nagdumot sa ila mga bana kag sa ila mga kabataan. Ikaw kag ang imo utod nga mga siudad may isa ka iloy nga Hethanon kag isa ka amay nga Amornon.#16:45 HETHANON…AMORNON: Tan-awa ang 16:3.
46“Ang imo magulang nga babayi amo ang Samaria nga yara sa aminhan lakip ang iya mga kabarangayan. Ang imo manghod nga babayi amo ang Sodoma nga yara sa bagatnan lakip ang iya mga kabarangayan. 47Indi ka ayawan sa pagsunod sang ila ginahimo nga kangil-aran, kundi sa malip-ot nga tion sobra pa ang imo ginhimo sang sa ila.”
48Ang Ginoo nga Gamhanan nagasiling, “Subong nga ako ang Dios nga buhi, ang Sodoma nga imo utod lakip ang iya mga kabarangayan wala gid maghimo sang kalautan nga ginhimo nimo kag sang imo mga kabarangayan. 49Sia kag ang iya mga anak nga babayi nagpabugal tungod kay bugana ang ila kalan-on kag nagpangabuhi sing matawhay kag malinong, pero wala gid sila magkabalaka sa mga imol kag sa mga makaluluoy. 50Nanginbugalon sila kag nanginmatig-a ang ila mga ulo kag naghimo sang mga butang nga akon ginakangil-aran, gani suno gid sa inyo nahibaluan, ginlaglag ko sila.
51“Ang Samaria wala gani makahimo bisan katunga sang imo mga sala. Naghimo ikaw sing mga kangil-aran nga labaw sang sa iya nahimo. Kon ipaanggid ang imo kalautan sang sa imo mga utod, daw matarong pa sila sang sa imo. 52Kag karon, antuson mo ang imo kahuloy-an. Ang imo mga sala tama kalaut sang sa nahimo sang imo mga utod nga babayi sa bagay nga kon magtupad sila sa imo daw mas matarong pa sila. Karon antusa ang imo kahuloy-an, tungod kay ginahimo mo ang imo mga utod nga babayi nga daw matarong.”
Ang Sodoma kag Samaria Pauswagon Liwat
53Ang Ginoo nagsiling sa Jerusalem, “Pauswagon ko liwat ang Sodoma kag ang Samaria lakip ang ila mga kabarangayan. Kag ikaw, pauswagon ko man. 54Magakahuya ka sang imo kaugalingon, kag ang imo kahuloy-an magapakita kon daw ano kaayo sang imo mga utod. 55Pauswagon ko sila liwat kag subong man ikaw lakip ang imo mga kabarangayan. 56Wala mo bala paghikayi ang Sodoma sang ikaw nagpabugal, 57sang wala pa mapahayag ang mga kalautan nga imo nahimo? Karon pareho ka man sa iya nga hilikayan sang mga Edomnon, mga Filistinhon, kag sang iban nimo nga mga kaingod nga nagadumot sa imo. 58Dapat ka mag-antos tungod sang makahuloya kag makangilil-ad nga mga butang nga imo ginhimo.” Ang Ginoo amo ang naghambal sini.
Ang Kasugtanan nga Wala sing Katapusan
59Ang Ginoo nga Gamhanan nagasiling, “Himuon ko sa imo ang nagakabagay sa imo, tungod kay ginlapas mo ang kasugtanan kag wala mo pagsapaka ang mga saad. 60Pero tumanon ko ang kasugtanan nga ginhimo ko sa imo sang pamatan-on pa ikaw kag magahimo ako sing kasugtanan nga wala sing katapusan upod sa imo. 61Dayon madumdoman mo kon ano ang imo pagginawi sang una, kag magakahuya ka kon magbalik ang imo magulang kag manghod nga babayi. Himuon ko sila subong nga mga anak mo nga babayi, bisan pa wala ini sa akon kasugtanan upod sa imo. 62Palig-unon ko ang akon kasugtanan upod sa imo, kag makilala mo nga ako amo ang Ginoo. 63Kon mapatawad ko ang mga sala nga imo nahimo, madumdoman mo ini, kag indi na ikaw maghambal tungod sang imo daku nga kahuya.” Ang Ginoo nga Gamhanan amo ang naghambal sini.
Currently Selected:
Ezequiel 16: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
