Ester (Griego) 8
8
Ang mga Judio Ginsilingan nga Magpakigbato
1Sa sina gid nga adlaw ginhatag ni Haring Ahasuero kay Ester ang tanan nga pagkabutang ni Haman nga kaaway sang mga Judio. Diri kag ginsugid ni Ester nga si Mardoqueo iya pakaisa. Gani gintugotan si Mardoqueo nga makapalapit sa hari. 2Kinuha sang hari ang singsing nga inugsilyo nga nabawi niya kay Haman kag ginhatag ini kay Mardoqueo. Sia ang gintugyanan ni Ester nga enkargado sang tanan nga mga pagkabutang ni Haman.
3Sa liwat si Ester nagluhod sa tiilan sang hari. Ginpangayo niya nga tapnaon sang hari ang malaut nga plano ni Haman batok sa mga Judio. 4Ginbayaw sang hari ang iya bulawan nga setro kag gani nagtindog si Ester 5kag magsiling, “Kon igakalipay sang imo Kamahalan kag ginapalangga mo ako, magsulat ka sang isa ka mando nga indi pagpadayunon ang pagpamatay sang tanan nga mga Judio sa sulod sang ginharian. 6Paano ko mabatas ini tanan kon matabo ini sa akon mga kadugo? Paano ko mapadayon ang pagkabuhi kon laglagon ang akon mga kasimanwa?”
7Gani nagsiling ang hari kay Ester, “Ginpabitay ko si Haman tungod sang iya tuyo nga ipapatay ang mga Judio. Ginhatag ko sa imo ang tanan niya nga mga pagkabutang. Kon indi ini tumbas, 8magsulat#Dan. 6:8. ka sang imo luyag isiling sa mga Judio. Sulata ini sa akon ngalan kag silyuhi ini sang akon singsing, kay wala sang bisan sin-o nga makaligwat sang sulat nga nasulat sa akon ngalan kag naselyohan sang akon singsing.”
9Sa ika-20 tres nga adlaw sang nahauna nga bulan, ang bulan sang Nisan, ginpatawag ang tanan nga mga tagsulat sang hari, kag nagsulat sila sa mga Judio kag sa mga gobernador kag mga manugdumala sang tanan nga siento baynte siete (127) ka mga probinsya halin sa India tubtob sa Etiopia. Ginsulat ini suno sa hambal sang tagsa ka probinsya. 10Ginlagdaan kag ginsilyuhan ini sang hari kag ginpadala ini paagi sa mga manugdala sang sulat nga nagsakay sa ila pinakadasig nga mga kabayo.
11Ang mga sulat nagsaysay nga ang hari nagatugot sa mga Judio nga nagaestar sa tagsa ka siudad sang ginharian sa pagpangabuhi suno sa ila mga kasugoan kag maghulugpong sila sa pagpangapin sang ila kaugalingon. Gintugotan sila sa pagtratar sang ila mga kasumpong kag mga kaaway suno sa luyag nila himuon. 12Ini nga mando ginpatuman sa bug-os nga ginharian sang ika-13 nga adlaw sang Adar, ang ika-12 nga bulan.#8:12 Ang kapitulo 8 nagapadayon sa tapos ang kapitulo E.#
Currently Selected:
Ester (Griego) 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012