Ester (Griego) 7
7
1Gani ang hari kag si Haman nagkaon upod kay Ester 2sa ikaduha nga tion. Samtang nagainum-inom ang hari, ginpamangkot niya liwat ang rayna, “Ano bala ang luyag mo, Rayna Ester? Isugid sa akon kag igahatag ko ini sa imo. Igahatag ko sa imo bisan pa ang katunga sang akon ginharian.”
3Nagsabat si Ester, “Kon igakalipay mo, O Kamahalan, ginapangayo ko sa imo ang kabuhi ko kag ang iya sang akon mga kasimanwa. 4Ako kag ang akon mga kasimanwa ginbaligya sa pagkaulipon, ang amon mga pagkabutang ginpangkuha, kag sa karon ginatuyo nga pamatyon kami—kami tanan upod ang amon mga kabataan pagauliponon. Ini tanan ginhipsan ko lamang tubtob karon. Indi matarong nga ang amon kaaway katapo man lamang sining halangdon nga korte.”
5Dayon si Haring Ahasuero nagpamangkot, “Sin-o nga makahas ang magabuhat sina?”
6Si Ester nagsabat, “Ang amon kaaway amo ining malaut nga si Haman!”
Kinulbaan si Haman sa atubangan sang hari kag rayna. 7Nagtindog ang hari kag maggwa sa hardin sang palasyo. Nahangpan ni Haman nga nabutang sa katalagman ang iya kabuhi, gani nagpabilin sia agod magpangayo sing bulig kay Rayna Ester. 8Sang magbalik ang hari, nakita niya nga nagahapaon si Haman sa pulongkuan sang rayna nga nagapakitluoy. Sa iya daku nga kaakig, nagsinggitan ang hari, “Ano? Lugoson mo bala ang akon asawa? Kag diri pa sa akon palasyo?”
Sang mabatian ini ni Haman naggwa sia gikan sa hulot kalan-an nga nadulaan sing paglaom. 9Dayon ang kapon nga si Bogatan nagsiling, “Kamahalan, didto sa balay ni Haman nagpabuhat sia sang bitayan. Nagataas ini sing setentay singko ka tapak sa tuyo nga bitayon didto si Mardoqueo nga nakatukib sang plano batok sa imo!”
Sa kaugot sang hari, nagmando sia, “Bitaya didto si Haman!”
10Gani si Haman ginbitay sa bitayan nga iya mismo ginpatindog para kay Mardoqueo. Matapos ini, nag-ugdaw ang kaakig sang hari.
Currently Selected:
Ester (Griego) 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012