Ester (Griego) 6
6
Ginpasidunggan sang Hari si Mardoqueo
1Sang sina nga gab-i, ginbuot sang Ginoo nga indi pagpatulogon ang hari. Gani ginmanduan niya ang iya kaugalingon nga tagsulat sa pagdala sang libro tuhoy sa maragtas sang ginharian kag ginpabasa niya ini sa iya. 2Ginbasa niya ang hitabo natungod sa pagtukib ni Mardoqueo sang plano nga ipapatay ang hari—ang malaut nga plano sang duha ka mga kapon nga nagaalagad subong mga gwardya sa palasyo. 3Ang hari nagpamangkot, “Paano naton napasidunggan kag nabalusan si Mardoqueo sa sining iya maayo nga buhat?”
Ang mga suloguon nagsabat, “Wala ka sing nabuhat sa iya natungod sini.”
4Samtang nagapamangkot ang hari natungod sining maayo nga binuhatan ni Mardoqueo, amo man ang pagsulod ni Haman sa pasiyuhan sa tuyo nga pangayuon sa hari ang pagbitay kay Mardoqueo sa bitayan nga iya ginhanda.
Nagpamangkot ang hari, “Sin-o inang sa pasiyuhan?”
5Ang mga suloguon nagsabat, “Si Haman nga luyag magpakigkita sa imo.”
Nagsiling ang hari, “Pasudla sia.”
6Gani ginpasulod si Haman kag ang hari nagsiling sa iya, “May yara ako nga luyag pasidunggan, ano ang dapat ko himuon para sa sina nga tawo?”
Si Haman naghunahuna nga sia ang luyag sang hari pasidunggan.
7-8Gani nagsabat sia, “Ipadala sa mga suloguon ang imo pinakaali nga bayu para sa sini nga tawo nga imo ginasiling. Kag ipadala man sa ila ang kabayo nga imo mismo ginasakyan. 9Dayon ipasuksok ang bayu sa sining tawo nga luyag mo gid pasidunggan kag pasakyon sia sa kabayo samtang ginalibot sa siudad kag dayon ang dungganon nga tawo sa ginharian mag-una nga nagapahibalo: ‘Tan-awa ninyo kon paano ang pagbalos sang hari sa tawo nga luyag niya pasidunggan!’”
10Gani ang hari nagsiling kay Haman, “Maayo! Himua ina tanan kay Mardoqueo, ang Judio nga may mataas nga palangakuan sa palasyo Indi pagkalimti ang bisan ano nga butang nga ginsiling mo.”
11Dayon ginkuha ni Haman ang bayu kag ang kabayo. Ginsuklob niya kay Mardoqueo ang bayu kag ginpasakay sia sa kabayo nga ginasakyan mismo sang hari. Samtang nagalibot sila sa siudad, nag-una si Haman nga nagapahibalo: “Tan-awa ninyo kon paano ang pagbalos sang hari sa tawo nga luyag niya pasidunggan!”
12Nagbalik si Mardoqueo sa pasiyuhan sang palasyo samtang si Haman dalidali nga nagpauli nga nagapanabon sang iya guya sa daku nga kahuya. 13Ginsugid niya sa iya asawa kag sa tanan niya nga mga abyan ang tanan nga nagkahanabo sa iya. Gani sila tanan nagsiling sa iya, “Nagsugod na ang pagkadula sang imo gahom kay Mardoqueo. Sia isa ka Judio kag indi ikaw makalutos sa iya. Dag-on niya ikaw kay ang Dios nga buhi kaupod niya!”
Pagbitay Kay Haman
14Nagasinugilanon pa sila sang mag-abot gikan sa palasyo ang mga tawo nga kapon agod nga dalhon si Haman sa bangkite ni Ester.
Currently Selected:
Ester (Griego) 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012