Ester (Griego) 3
3
Nagplano si Haman sa Paglaglag sang mga Judio
1Paglipas sang malip-ot nga panahon, si Haring Ahasuero nagpili kay Haman nga manginpangulo nga ministro. Si Haman anak ni Hamedata nga Agagnon. 2Nagmando ang hari sa tanan nga mga opisyal nga magtahod sila kay Haman paagi sa pagsaludo sa iya. Gintuman ini sang mga opisyal luas lamang kay Mardoqueo. 3Ginpamangkot sia sang iya mga kaupdanan kon ngaa nga ginalalis niya ang mando sang hari. 4Sa adlaw-adlaw nga tanan ginaliwatliwat nila kay Mardoqueo ang pagpatuman sang mando, pero wala gid sia magpamati sa ila. Nagsiling si Mardoqueo, “Isa ako ka Judio kag indi ako magsaludo kay Haman.” Gani ginsugiran nila si Haman natungod sining paglalis ni Mardoqueo sa mando sang hari. 5Sang natalupangdan ni Haman nga si Mardoqueo indi magsaludo sa iya, nangakig gid sia, 6kag gani nagplano sia sa pagpapatay sang tanan nga mga Judio sa bug-os nga ginharian sang Persia.
7Bulan sadto sang Nisan, nahauna nga bulan sa ika-12 ka tuig sang paggahom ni Haring Ahasuero, si Haman nagmando nga magpagabutgabot agod mahibaluan kon san-o gid ipapatay ang tanan nga mga Judio sa sulod lamang sang isa ka adlaw. Napilian nila ang ika-14 nga adlaw sa bulan sang Adar nga amo ang ika-12 nga bulan.
8Gani si Haman nagsiling sa hari “Kamahalan, may mga tawo nga lain ang rasa nga nagaestar sa mga kapungsoran sa bug-os nimo nga ginharian. May mga kinaugali sila nga lain sang sa iban nga mga tawo. Kag luas sina, wala nila ginatuman ang mga kasugoan sang ginharian, kag gani wala ini nagapadulong sa imo kaayuhan kon pabayaan lamang sila. 9Kon magpasugot ka, Kamahalan, magmando ka nga ipapatay ini sila tanan. Kag kon imo ini buhaton, nagapangako ako sa paghatag sang pilak nga nagatimbang sang 375 ka tonelada para sa talaguan sang manggad sang ginharian.”
10Ginhukas sang hari ang iya singsing nga ginagamit sa pagsilyo sa ginapatuman nga mga mando, kag ginhatag ini kay Haman sa pagsilyo sang nasulat nga mando sa pagpapatay sa mga Judio. 11Ang hari nagsiling sa iya, “Tagoa ang imo kwarta kag himua ang imo luyag batok sa sining mga tawo nga imo ginasiling.”
12Gani, sang ika-13 nga adlaw sa nahauna nga bulan ginpatawag ni Haman ang mga tagsulat sang hari kag gindikta sa ila ang mando batok sa mga Judio. Ginbadbad ini sa nagakalainlain nga linggwahe nga ginagamit sa sulod sang ginharian kag ginpadala ini sa tanan nga mga manugdumala kag mga gobernador sa tanan nga 127 ka mga probinsya, nga nagasakop halin sa India pakadto sa Etiopia. Ang mando nasulat sa ngalan ni Haring Ahasuero kag naselyohan ini sang iya singsing. 13Ang mga manugdala sang sulat nagdala sini nga mando sa tagsa ka probinsya sang ginharian. Ang kaundan sang mga mando naglakip sang isa ka sugo nga ang tanan nga mga Judio pamatyon sa sulod lamang sang isa ka adlaw sa ika-12 nga bulan, ang bulan sang Adar, kag ang ila mga pagkabutang pagakuhaon.#3:13 Ang kapitulo 3 nagapadayon sa tapos ang kapitulo B.#
Currently Selected:
Ester (Griego) 3: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012