Ester (Griego) 2
2
Nanginrayna si Ester
1Nag-ugdaw gid man ang kaakig ni Haring Ahasuero samtang naglipas ang mga inadlaw, pero, walay sapayan nga wala na niya ginahinambitan si Vasti, padayon ang iya pagpanumdom kon paano ang pagkondenar niya sa iya. 2Gani ang mga palamangkutan sang hari nagpanugyan sa iya, “Ngaa indi ka magpangita sang lamharon, matahom kag maayo sing pamatasan nga mga dalaga? 3Magpili ka sang isa ka opisyal sa tagsa ka probinsya sang ginharian nga mangita sining matahom kag lamharon nga mga birhen kag magdala sini sa ila sa palasyo sang hari diri sa Susa. Ipatatap ini sila kay Hegay, ang kapon nga nagaasikaso sang imo mga babayi. Hatagan ini sila sang mga sangkap sa pagpatahom kag sang tanan nga mga kinahanglanon nila. 4Dayon gikan sa sining mga dalaga, magpili ka sang imo naluyagan nga magatal-os kay Rayna Vasti.”
Kag ginpakamaayo sang hari ini nga laygay, gani iya ini ginsunod.
5Didto sa Susa may isa ka Judio nga ginahingalanan kay Mardoqueo nga anak ni Jair kag apo ni Simei nga anak ni Kis sa tribo ni Benjamin. 6Isa#2 Hari 24:10-16; 2 Cron. 36:10. sia sang mga nabihag ni Haring Nabucodonosor nga gindala gikan sa Jerusalem pakadto sa Babilonia. 7Si Mardoqueo may matahom nga pakaisa, si Ester nga anak ni Aminadab. Si Ester ilo molomolo kag gani si Mardoqueo ang nagsapupo sa iya halin sang diutay pa sia tubtob sa iya pagdaku.#2:7 tubtob sa iya pagdaku: ukon kag nagtuyo sa pagpangasawa sa iya.
8Sa tapos mapahibalo ang bag-o nga mando sang hari, madamo nga mga dalaga ang ginpangdala sa Susa. Si Ester isa sini sa ila. Nag-estar man sia sa palasyo kag ginbutang sa idalom sang pagtatap sang kapon nga si Hegay nga nagaasikaso sang mga babayi sang hari. 9Nahamut-an ni Hegay si Ester kag iya dayon ginsugoran ang mga bulohaton sa pagpatahom, ang masahe kag ang pinasahi nga pagdiyeta. Pito ka pinili nga mga suloguon nga babayi halin sa palasyo ang ginhatag ni Hegay kay Ester. Gintatap gid niya sing maayo si Ester kag subong man ang iya mga suloguon.
10Karon sa pangabay ni Mardoqueo, si Ester wala gid magpanugid nga sia isa ka Judia. 11Sa adlaw-adlaw nga tanan, si Mardoqueo nagalakatlakat pakadto-pakari sa atubangan sang pasiyuhan sang mga babayi sang hari sa pagpanilag kon ano ang nagakatabo kay Ester.
12Ang kinaandan nga bulohaton sa pagpatahom nagalawig sing isa ka tuig: anom ka bulan nga pagmasahe nga nabanyusan sang lana sang mira, anom man ka bulan nga pagpahamot kag pagbutang sang iban nga sari sang pagpatahom. 13Pagkatapos sini, ang tagsa ka dalaga ginahatagan sang iya kaugalingon nga manugbantay nga amo ang magadala sa iya sa palasyo sang hari. 14Magakadto sia sa gab-i kag sa madason nga aga ginahalin sia sa lain naman nga lugar sang mga babayi sang hari kag ginatugyan sa idalom sang pagtatap sang kapon nga si Hegay. Indi sia magbalik liwat sa hari luas lamang kon ipatawag sang hari ang iya gid ngalan.
15Nag-abot ang tion ni Ester nga anak ni Aminadab nga tiyo ni Mardoqueo, sa pagkadto sa hari. Natuman niya ang tanan nga panugyan ni Hegay kag ginkahamut-an sia sang tanan nga nakakita sa iya. 16Gani gindala si Ester sa hari sa bulan sang Adar, sa ika-12 nga bulan sa ikapito ka tuig nga paggahom ni Haring Ahasuero. 17Nabihag sing lubos ang hari sa katahom ni Ester kag ginhigugma niya sia sing labi sang sa iban nga mga dalaga. Gani, ginkoronahan sang hari si Ester subong rayna. 18Dayon naghiwat ang hari sang isa ka simana nga bangkite para sa iya mga palamangkutan kag manugdumala sa pagsaulog sang iya pagpangasawa kay Ester. Subong man ginpanuboan niya ang mga buhis sa bug-os nga sakop sang ginharian.
Si Mardoqueo Nagluwas sa Kabuhi sang Hari
19Sa sini nga tion si Mardoqueo ginpahamtang sa mataas nga palangakuan sang palasyo. 20Kon natungod kay Ester, wala gid ini sia magpanugid nga isa sia ka Judia suno sa ginsugo sa iya ni Mardoqueo. Nagmasinulondon sia halin sang diutay pa sia tubtob sa iya pagdaku sa idalom sang pag-inakop ni Mardoqueo. Padayon si Ester sa pagsimba sa Dios kag sa pagtuman sa iya mga sugo suno sa kinabatasan sang mga Judio.
21Sang mapasaka na sang hari si Mardoqueo sa mataas nga palangakuan, ang duha ka mga tawo nga kapon nga mga opisyal sang badigard sang hari nagkaakig sing daku sa hari kag nagplano sa pagpatay sa iya. 22Nahibaluan ini ni Mardoqueo kag ginsugiran niya si Ester nga nagsugid man sini dayon sa hari. 23Ginpausisa sang hari ang duha ka opisyales kag gani ginpabitay sila sang hari. Sa pagpasidungog kay Mardoqueo kag agod indi malipatan ang maayo niya nga binuhatan, ini nga hitabo ginsulat sa maragtas sang ginharian.
Currently Selected:
Ester (Griego) 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012