Ester (Griego) B
B
Ang Mando ni Ahasuero batok sa mga Judio
14 Amo ini ang nasulat sa mando ni Ahasuero: “Ako, si Ahasuero, Hari nga gamhanan, nagasulat sa mga gobernador kag sa ila mga sakop nga opisyal sa 127 ka mga probinsya halin sa India tubtob sa Etiopia.
15 “Bilang pangulo sang madamo nga pungsod kag agalon sang bug-os nga kalibutan, nagpat-od ako nga ang akon mga ginsakpan mag-estar sing mahidaiton. Ginpakamaayo ko ini indi tungod sang akon bugal kag gahom kundi tungod kay akon ginatan-aw pirme ang pagdumala nga suno sa rason kag pagkaluoy. Ginpat-od ko ang pagpaluntad liwat sining kalinong nga ginahandom sang tanan kag tinguhaon ko ang pagbuhat nga manginsibilisado ining ginharian agod nga maayo ang pagpanglakaton gikan sa isa ka dulonan pakadto sa isa.
16 “Ginpakigsugilanonan ko ang akon mga palamangkutan kon paano mahimo ini. Si Haman naghatag sang iya panugyan. Kinilala ini sia sa tunga sang mga mangin-alamon kag ginpakita niya sa tanan nga oras ang iya pagkabalaka sa kaayuhan sang ginharian. Tungod sining iya wala nagalubad nga pagkamainunongon ginhatagan ko sia sang kadungganan nga mangin-ikaduha nga tawo sa bug-os nga ginharian. 17 Sa wala pa lamang madugay, ginsugid niya sa amon nga may yara nga mga tawo nga indi magpasweto. Kag ini sila nagalalapta sa bug-os nga ginharian. Ginsaysay niya sa amon nga ining mga tawo may kinaugalingon nga mga kasugoan, nga nagapamatok ini sila sa tagsa ka pungsod kag sa masunson wala nila ginasapak ang harianon nga mga mando. Tungod sining ila wala pagsapak, indi nakon matuman ang pag-isa sa panghimanwa nga akon ginahandom para sa bug-os nga ginharian.
18 “Ining mga tawo nagapamatok pirme sa gubyerno kag nagabuhat sang krimen nga nagapahuyang sang kalig-on sang bug-os nga ginharian. Ginasunod nila ang ila makatalanhaga nga pagbinatasan, ginatuman nila ang ila mga kasugoan kag nagapamatok sila sing masunson sa paghugpong sang tanan nga mga katawhan. 19 Tungod sining mga kamatuoran, ginapanugyan namon nga pamatyon ini sila tanan—mga lalaki, babayi kag kabataan suno sa nahinambitan ni Haman nga pangulo nga ministro. Tungod kay kaaway naton sila, indi kita magkaluoy sa ila. Ini nga mando pagatumanon sa sini nga tuig, sa ika-14 nga adlaw sang ika-12 nga bulan, sa bulan sang Adar. 20 Ining mga tawo nga nagtuga sang kagamo sa malawig na nga mga panahon, pagapatyon nga wala sing luoyluoy sa sulod sang isa lamang ka adlaw. Pagkatapos sini, manginmapag-on kag malig-on ang aton gubyerno.”
Currently Selected:
Ester (Griego) B: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012