Ester (Griego) 1
1
Ginlalis ni Rayna Vasti si Haring Ahasuero
18-19 Ining#Esd. 4:6. mga butang nahanabo sa panahon ni Haring Ahasuero sang Persia, sang gingamhan niya ang 127 ka mga probinsya halin sa India tubtob sa Etiopia. Ang iya palasyo didto sa Siudad sang Susa, ang kapital nga siudad sang Persia. 20 Sa ikatlo nga tuig sang iya paggahom, naghatag sia sang bangkite para sa iya mga palamangkutan, mga representante sang iban nga mga pungsod, mga dungganon sang Persia kag Media upod ang mga gobernador sang mga probinsya. 21 Sa sini ginpakita sang hari ang manggad kag kabuganaan sang iya ginharian. Ang bangkite naglawig sing anom ka bulan.
22 Pagkatapos sang bangkite,#1:5 bangkite: Ang iban nga mga manuskrito may punsyon sa kasal. ang hari naghiwat naman sa sulod sang isa ka simana sang punsyon para sa mga dumoluong nga nagaestar sa siudad sang Susa. Ginhiwat ini sa pasiyuhan sang palasyo 23 nga nakurtinahan sang pinakaputi nga lino. Ang kurtina may granate nga mga higot nga lino nga naangot sa bugway nga pilak kag bulawan nga yara sa mga haligi nga marmol kag bato. Ang salog nahuman sa berde kag puti nga marmol nga napugtakan sang mga tipay nga bato nga may nagkalainlain nga kolor. May ara man nga mga palahuwayan nga nahimo sa bulawan kag pilak nga nataklapan sang mapino kag malum-ok nga mga tela nga nahuman sa nanarisari nga kolor kag nabordahan ini sang mga rosas sa palibot sang mga sidsid. 24 Ang mga tagayan nahuman tanan sa pilak kag bulawan. Ang isa sini nga napunihan sang malahalon nga mga bato kag nagabili sing kapin sa 1,000 nga tonelada sang pilak ginpain kag ginpakita sa mga tawo. Nagabaha lamang ang maayo nga bino gikan sa kabuganaan sang hari. 25 Patuyang ang pag-ininom. Ginmanduan sang hari ang iya mga suloguon sa paghatag sang tanan nga kinahanglanon niya upod sa iya mga bisita.
26 Sa sadto nga tion, si Rayna Vasti nagahiwat man sang bangkite sa sulod sang palasyo upod ang mga kababayin-an.
27 Sa ikapito nga adlaw sang bangkite, malipayon ang hari. Gani, iya ginpatawag ang pito ka mga tawo nga kapon nga iya mga alagad nga amo sanday Haman, Basan, Tara, Boraze, Zatholta, Abataza kag Taraba. 28 Ini sila ginmanduan sang hari nga dalhon sa iya atubang si Rayna Vasti agod makoronahan sia kag mapakita ang iya katahom sa mga bisita. 29 Pero wala nagtuman si Rayna Vasti sa ginsiling sang hari. Wala nag-upod ang Rayna sa mga tawo nga kapon. Nahuy-an ang hari kag gani nagpangakig sia.
30 Sa mga hitabo nga tagsubong sini, ginapatawag sang hari ang iya mga palamangkutan nga nagahatag sang ila mga panghunahuna sandig sa kasugoan. 31-32 Tatlo sa ila amo sanday Arkeseus, Sarsateus, kag Malesear nga mga pangulo sang Persia kag Media. Ini sila malapit sa balatyagon sang hari kag pinakagamhanan sa bug-os nga ginharian. Nag-abot sila kag naglaygay sa iya kon ano ang ginapangayo sang kasugoan kag kon ano ang buhaton kay Rayna Vasti sa iya paglalis sa sugo sang hari paagi sa iya mga alagad.
33 Dayon nagsugid ang hari sa iya mga opisyal kag mga gobernador sang Media kag Persia kon paano ang rayna naglalis sa iya. Gani si Mucaeus nagsiling sa hari kag sa tanan nga nagtambong: “Si Rayna Vasti nagpasipala indi lamang batok sa imo, O hari, kundi subong man sa amon tanan. 34-35 Sa tion nga mahibaluan ini sang aton mga asawa kon ano ang ginhimo sang rayna, manginmaisog sila sa paglalis sa ila mga bana kag indi na sila magtahod subong nga si Rayna Vasti wala nagtahod sa hari. 36 Gani, kon magpasugot ka, ang imo kamahalan magsulat sang isa ka mando kag ilakip ini sa kasugoan sang Persia kag Media nga si Vasti indi na magpakita sa imo atubang. Magpangita ka sang isa ka maayo nga babayi nga magatal-os sa iya subong rayna. Amo lamang ini ang paagi. 37 Kon ang imo mando nahibaluan sa bug-os nga ginharian, dayon ang tanan nga mga kababayin-an magatahod sa ila mga bana, imol man ukon manggaranon.”
38 Naluyagan sang hari kag sang iya mga opisyal ang ginpamulong ni Mucaeus kag sa gilayon nagsulat sia sang mando. 39 Ginpadala ini sa tagsa ka probinsya kag nasulat ini sa linggwahe nga ginagamit sina nga probinsya. Ang mando nagasiling nga ang tagsa ka bana kinahanglan tahuron sa iya kaugalingon nga panimalay.
Currently Selected:
Ester (Griego) 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012