Deuteronomio 33
33
Ginpakamaayo ni Moises ang mga Tribo sang Israel
1Amo ini ang mga pagpakamaayo nga ginhambal ni Moises, ang tawo sang Dios, sa mga tawo sang Israel sa wala pa sia mapatay.
2Ang Ginoo nag-abot halin sa Bukid sang Sinai,
nagbutlak sia subong sang adlaw sa ibabaw sang Edom,
kag nagsilak sia sa iya mga tawo halin sa bukid sang Paran.
Ang napulo ka libo nga mga angheles kaupod niya,
ang nagadabdab nga kalayo yara sa iya tuo nga kamot.
3Ginahigugma sang Ginoo ang iya mga tawo,#33:3 Ang isa ka dumaan nga pagbadbadang iya mga tawo; sa Hebreoang mga tawo.
kag ginaapinan niya ang mga iya katawhan.
Gani nagayaub kita sa iya nga tiilan
kag nagatuman sang iya mga sugo.
4Ginatuman naton ang Kasugoan nga ginhatag sa aton ni Moises,
ang labing malahalon nga pagkabutang sang aton pungsod.
5Ang Ginoo nanginhari sang iya mga tawo nga Israelinhon
sang magtipon sing tingob ang ila mga tribo kag mga pangulo.
6Si Moises nagsiling nahanungod sa tribo ni Ruben:
“Kabay nga si Ruben indi mapapas,
bisan diutay lang ang iya mga kaliwat.”
7Nahanungod sa tribo ni Juda nagsiling sia:
“Ginoo, pamatii ang ila pagpangayo sing bulig,
kag pabuyloga sila liwat upod sa iban nga mga tribo.
O Ginoo, magpakig-away ikaw para sa ila,
kag buligi sila batok sa ila mga kaaway.”#33:7 O Ginoo…mga kaaway: Sa HebreoAng tribo sang Juda magapakig-away para sa iya kaugalingon, kag ang Ginoo magabulig sini batok sa iya mga kaaway.
8Nahanungod#Exo. 28:30; Exo. 17:7; Exo. 17:7; Num. 20:13. sa tribo ni Levi nagsiling sia:
“O Ginoo, ikaw nagapahayag sang imo kabubot-on paagi sa Urim kag Tumim#33:8 URIM KAG TUMIM: Tan-awa ang Lista sang mga Pulong.
paagi sa mga Levinhon, ang imo matutom nga mga alagad.
Gintilawan mo sila didto sa Masa,
kag napamatud-an sila nga masaligan sa tubig sang Meriba.
9Nagpakita sila sing mas daku pa nga pag-unong sa imo,
sang sa ila mga ginikanan, mga kautoran, ukon mga kabataan.
Gintuman nila ang imo mga sugo,
kag nanginmatutom sila sa imo kasugtanan.
10Pagatudloan nila ang imo mga tawo sa pagtuman sang imo mga Kasugoan,
nagadulot sila sing mga halad sa imo altar.
11O Ginoo, buligi ang ila tribo nga magmabakod,
kabay nga mahamuot ka sa ila ginahimo.
Laglaga ang ila mga kaaway,
agod indi na gid sila makabangon liwat.”
12Nahanungod sa tribo ni Benjamin nagsiling sia:
“Amo ini ang tribo nga ginapalangga sang Ginoo kag ginaapinan,
ginbantayan niya sila adlaw-adlaw,
kag nagaestar sia sa tunga nila.”
13Nahanungod sang tribo ni Jose nagsiling sia:
“Kabay nga bendisyunan sang Ginoo ang ila duta sing ulan,
kag sang tubig halin sa idalom sang duta.
14Kabay bendisyunan niya ang ila duta sang mga prutas nga naluto sa puno,
kag bugana sang labing maayo nga prutas sa tagsa ka panahon.
15Kabay ang ila dumaan nga mga kabakuloran mapuno sang pinili nga prutas.
16Kabay ang ila duta mapuno sang tanan nga butang nga maayo,
ginbendisyunan paagi sa kaayo sang Ginoo,
nga naghambal gikan sa nagadabdab nga magamay nga kahoy.
Kabay nga ini nga mga bendisyon magaabot sa tribo ni Jose,
tungod kay sia amo ang pangulo sang iya mga kautoran.
17Si Jose may kusog nga pareho sang toro nga baka,
ang mga sungay sang baka nga simaron.
Ang iya mga sungay amo ang linibo ni Manases,
kag napulo ka libo ni Efraim.
Paagi sini ginasungay niya ang mga kapungsoran
kag ginadis-og sila tubtob sa punta sang duta.”
18Nahanungod sa mga tribo ni Zabulon kag ni Isacar nagsiling sia:
“Kabay nga si Zabulon magmauswagon sang ila negosyo sa dagat,
kag kabay ang manggad ni Isacar magdamo sa ila balay.
19Ginaagda nila ang mga dumoluong sa ila bukid,
kag didto nagadulot sila sang husto nga mga halad.
Nagakuha sila sang ila manggad sa dagat,
kag halin sa balas sa mga baybayon.”
20Nahanungod sa tribo ni Gad nagsiling sia:
“Dayawon ang Dios, nga nagpalapad sang ila kadutaan.
Si Gad nagahukmong kaangay sang isa ka leon,
sa pagkusnit sang butkon ukon alimpudwan.
21Ginkuha nila ang labing maayo sa duta para sa ila kaugalingon,
ang bahin sang pangulo ginhatag sa ila.
Gintuman nila ang mga sugo kag mga kasugoan sang Ginoo,
sang magtipon sing tingob ang mga pangulo sang Israel.”
22Nahanungod sa tribo ni Dan nagsiling sia:
“Si Dan isa ka bataon nga leon,
nga nagalumpat halin sa Basan.”
23Nahanungod sa tribo ni Neftali nagsiling sia:
“Si Neftali ginbendisyunan
sing bugana sang kaayo sang Ginoo,
ang ila duta nagalambot sa bagatnan halin sa Linaw ang Galilea.”
24Nahanungod sa tribo ni Aser nagsiling sia:
“Si Aser ginbendisyunan labaw pa sang sa iban nga mga tribo.
Kabay nga sia amo ang pinalangga sang iya mga utod nga lalaki,
kag kabay nga manginbugana ang mga kahoy nga olivo sa iya duta.
25Kabay nga ang iya mga banwa maapinan sang mga pwerta nga salsalon kag bronsi,
kag kabay nga mag-estar sia sa gihapon nga malig-on.”
26O mga tawo sang Israel, wala sing dios nga kaangay sang inyo Dios,
nga nagasakay nga may pagkahalangdon sa kalangitan,
nga nagasakay sa mga panganod sa pag-abot kag sa pagbulig sa inyo.
27Ang wala sing katapusan nga Dios amo ang inyo mangangapin,
ang iya wala ginakapoy nga mga butkon nagaalay-ay sa inyo.
Gintabog niya ang inyo mga kaaway samtang nagaabanse kamo,
kag ginsugo kamo sa paglaglag sa ila tanan.
28Gani ang mga kaliwat ni Jacob magaestar sing malinong,
nga wala sing katalagman sa duta nga bugana sang trigo kag bino,
sa diin ang tun-og halin sa langit nagatulo sa duta.
29O Israel, daw ano ka malipayon sa imo!
Wala sing isa nga pareho sa imo,
isa ka pungsod nga ginluwas sang Ginoo.
Ang Ginoo amo gid ang imo taming kag imo espada,
sa pag-apin kag sa pagpadaog sa imo.
Ang imo mga kaaway magaampo kag magapangayo sing kaluoy,
kag imo sila tasakon.
Currently Selected:
Deuteronomio 33: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
