Deuteronomio 32

1“O duta kag langit, pamatii ang akon mga pulong,

pamatii sing maayo ang akon ginasiling.

2Ang akon pagtulon-an magatupa kaangay sang mga tinulo sang ulan,

kag manginkaangay sang tun-og sa duta.

Ang akon mga pulong magatupa kaangay sang dabudabo sa mga bag-ong tubo nga mga tanom,

kaangay sang talithi sa hilamon.

3Dayawon ko ang ngalan sang Ginoo,

kag isugid sang iya katawhan ang iya kagamhanan.

4“Ang Ginoo amo ang inyo gamhanan nga mangangapin,

himpit kag matarong sa tanan niya nga mga ginahimo.

Ang inyo Dios matutom kag maminatud-on,

ang iya ginahimo matarong kag nagakaigo.

5Pero indi kamo matutom, indi takos nga mangin-iya mga tawo,

isa ka makasasala kag malaut nga pungsod.

6Amo bala ini ang inyo ibalos sa Ginoo,

kamo nga mga buangbuang kag wala sing paghangop nga mga tawo?

Sia ang inyo Amay, ang inyo Manunuga,

ginhimo niya kamo nga isa ka pungsod.

7“Dumdoma ang nagligad, ang mga panahon sang una,

pamangkuta ang inyo mga ginikanan sa pagsugid sa inyo kon ano ang nahanabo,

pamangkuta ang mga tigulang sa pagsugid sa inyo kon ano ang nagliligad.

8Ang#Bin. 17:26. Labing Mataas naghatag sa mga kapungsoran sang ila mga duta.

Ginpat-od niya kon diin ang mga katawhan dapat mag-estar;

ginhatagan niya ang tagsa ka pungsod sang langitnon nga tinuga,

9pero ginpili niya ang mga kaliwat ni Jacob para sa iya kaugalingon.

10“Nakita niya sila nga nagdalangdalang sa desierto,

mamingaw, kigas nga desierto.

Gin-apinan kag gin-atipan niya sila

subong sang pag-apin niya sang iya kaugalingon.

11Pareho sang agila nga nagatudlo sang iya mga buto sa paglupad,#32:11 nga nagatudlo sang iya mga buto sa paglupad: ukonnagabantay sang iya mga buto.

nga nagasalo sa ila sa iya nagahumlad nga mga pakpak,

ang Ginoo nagatipig sa Israel nga indi madagdag.

12Ang Ginoo amo lamang ang nagatuytoy sa iya mga katawhan

nga wala ginabuligi sang dumoluong nga dios.

13“Ginapagahom niya sila sa mataas nga mga bahin sang duta,

kag nagkaon sila sang nagtubo sa mga uma.

Nakakita sila sang dugos sa talon sa mga igang,

ang ila mga kahoy nga olivo nagtubo sing matambok sa batuhon nga duta.

14Ang ila mga baka kag mga kanding naghatag sing madamo nga mga gatas,

ila ang labing maayo nga mga karnero, mga kanding kag mga baka sang Basan.

ang labing maayo nga trigo, kag ang pinili nga bino.

15“Nagmanggaranon ang mga katawhan sang Ginoo pero nagmalalison sila,

nagtambok sila kag nagbuy-onan.

Ginbayaan nila ang Dios nga ila Manunuga,

kag ginsikway ang ila gamhanan nga manluluwas.

16Ang ila pagsimba sa mga diosdios nagpaimon sa Ginoo,

ang kalautan nga ila ginhimo nagpaakig sa iya.

17Naghalad#1 Cor. 10:20. sila sa indi matuod nga mga dios,

mga bag-o nga dios nga wala gid nila makilala

mga dios nga wala gid ginakahadlukan sang ila mga ginikanan.

18Nalimtan nila ang ila Dios, ang ila gamhanan nga manluluwas,

ang isa nga naghatag sa ila sing kabuhi.

19“Sang makita ini sang Ginoo, naakig sia,

kag ginsikway niya ang iya mga anak nga lalaki kag babayi.

20Nagsiling sia, ‘Indi ko na sila pagbuligan,

dayon tan-awon ko kon ano ang maabutan nila,

yadtong batinggilan kag indi matutom nga mga tawo.

21Ginpaakig#1 Cor. 10:22; Rom. 10:19. nila ako sang ila mga diosdios,

ginpaimon nila ako

sang ila di-matuod nga mga dios.

Gani, gamiton ko ang isa ka pungsod sa pagpaakig sa ila,

paimunon ko sila sa isa ka pungsod nga ginaestaran sang mga buangbuang.

22Ang akon kaakig magadabdab kaangay sang kalayo,

kag magasunog sang tagsa ka butang sa duta.

Magalambot ini sa kadadalman sang duta,#32:22 KADADALMAN SANG DUTA: Ini napatungod sa kalibutan sang mga patay.

kag magaupos sang sadsaran sang mga kabukiran.

23“‘Padalhan ko sila sing nagadinasundason nga mga kalalat-an,

kag gamiton ko ang tanan ko nga mga baslay batok sa ila.

24Magakalamatay sila sa gutom kag sa mataas nga hilanat,

mapatay sila sa grabe nga pamalatian.

Padal-an ko sila sing talunon nga mga sapat sa pagsalakay sa ila,

kag dalitan nga mga man-og sa pagbuntog sa ila.

25Madamo ang magakalamatay sa gira nga nagahuray-ad sa mga kalsada,

ang kahadlok amo ang magahari sa mga pamalay.

Mga pamatan-on nga lalaki kag babayi magakalamatay,

bisan mga lapsag kag mga tigulang indi makaluwas.

26Kuntani laglagon ko sila sing bug-os,

agod nga wala na sing may magdumdom sa ila.

27Pero indi ako magtugot nga magpabugal ang ila mga kaaway

nga ila ginlutos ang akon mga tawo,

kag nga indi ako amo ang naglaglag sa ila.’

28“Ang Israel isa ka pungsod

nga wala sing paghangop kag wala sing kaalam.

29Wala sila makahibalo kon ngaa nga nalutos sila,

indi sila makahangop sang natabo.

30Ngaa ang isa ka libo ginlutos sang isa,

kag ang napulo ka libo ginlutos lamang sang duha?

Ang Ginoo nga ila Dios nagbiya sa ila,

ginpabay-an sila sang ila gamhanan nga Dios.

31Ang ila mga kaaway nakahibalo nga ang ila kaugalingon nga mga dios maluya,

indi gamhanan pareho sang Dios sang Israel.

32Ang ila mga kaaway nga malaut subong sang Sodoma kag Gomorra,

pareho sang mga ubas nga nagapamunga sing mapait kag makahililo nga ubas,

33kaangay sang bino nga nahimo gikan sa laway sang dalitan nga mga man-og.

34“Ang Ginoo nagadumdom sang ginhimo sang ila mga kaaway;

nagahulat sia sang nagakaigo nga tion sa pagsilot sa ila.

35Ang#Rom. 12:19; Heb. 10:30. Ginoo magatimalos kag magasilot sa ila,

magaabot ang tion nga mapukan sila,

kag ang adlaw sang ila kalaglagan madali na lang.

36Ang#Sal. 135:14. Ginoo magaluwas sa iya mga tawo,

kon makita niya nga madulaan sila sing kusog.

Kaluoyan niya ang mga nagaalagad sa iya,

kon makita niya nga wala sila sang may mahimo.

37Dayon ang Ginoo magapamangkot sa iya mga tawo,

‘Diin na ang gamhanan nga mga dios nga inyo ginsaligan?

38Ginpakaon ninyo sila sang tambok sang inyo mga halad

kag ginhatagan ninyo sila sang bino nga ilimnon.

Karon pakadtua sila diri kag pabuliga sa inyo.

Padalidali-a sila sa pagtabang sa inyo.

39“‘Ako kag ako lamang amo ang Dios,

wala sang iban nga dios nga matuod.

Ako nagapatay kag nagahatag sang kabuhi, ako ang nagapilas kag nagaayo,

kag wala sing isa nga makapamalabag sang akon ginahimo.

40Subong nga ako amo ang buhi nga Dios,

bayawon ko ang akon kamot, kag ako nagasumpa

41nga bairon ko ang akon nagaidlak nga espada,

kag pat-uron ko nga magapangibabaw ang katarungan.

Timalusan ko ang akon mga kaaway,

kag silutan ang mga nagadumot sa akon.

42Sa akon mga baslay magatulo ang ila mga dugo,

kag ang akon espada magapamatay sang tanan nga nagasumpong sa akon.

Indi ko pagkaluoyan ang mga nagapakig-away batok sa akon,

bisan ang mga pilason kag mga binilanggo magakalamatay.’

43“Mga#Rom. 15:10; Bug. 19:2. pungsod, dapat ninyo dayawon ang mga tawo sang Ginoo,

ginasilutan niya ang nagapamatay sa ila.

Timalusan niya ang iya mga kaaway,

kag patawaron niya ang mga kalautan sang iya mga tawo.”

44Si Moises kag si Josue nga anak ni Nun naghambal sang mga pulong sini nga kalantahon agod mabatian ini sang mga tawo sang Israel.

Ang Katapusan nga mga Laygay ni Moises

45Sa tapos ni Moises mahatag ang mga pagtulon-an sang Dios sa mga tawo, 46nagsiling sia, “Pat-ura gid ninyo ang pagtuman sini tanan nga mga sugo nga akon ginhatag sa inyo sini nga adlaw. Itudlo ini sa inyo mga kabataan, agod matuman nila sing maayo ang tanan nga mga pagtulon-an sang Dios. 47Ini nga mga pagtulon-an mapuslanon gid. Amo ini ang inyo kabuhi. Tumana ninyo ini kag magakabuhi kamo sing malawig sa duta sa tabok sang Jordan nga madali na lang ninyo panag-iyahan.”

48Sa#Num. 27:12-14; Deut. 3:23-27. amo man nga adlaw ang Ginoo nagsiling kay Moises, 49“Kadto ka sa Kabukiran sang Abarim, sa duta sang Moab, sa atubang sang siudad sang Jerico. Taklad ka sa Bukid sang Nebo kag lantawa ang duta sang Canaan nga akon madali na lang ihatag sa mga tawo sang Israel. 50Mapatay ikaw sa sina nga bukid subong nga ang imo utod nga si Aaron napatay sa Bukid sang Hor, 51tungod kay kamo nga duha nagdi-matutom sa akon sa atubang sang mga tawo sang Israel. Sang didto kamo sa tubig sang Meriba, malapit sa banwa sang Kades sa desierto sang Zin, ginpakahuy-an ninyo ako sa atubang sang mga tawo sang Israel. 52Makita mo ang duta sa malayo, pero indi ka makasulod sa duta nga akon ihatag sa mga tawo sang Israel.”

Currently Selected:

Deuteronomio 32: MBBHIL12

Highlight

Copy

Compare