Deuteronomio 34
34
Ang Pagkapatay ni Moises
1Si Moises nagtaklad sa Bukid sang Nebo halin sa mga kapatagan sang Moab, pakadto sa putokputokan sang Bukid sang Pisga sa sidlangan sang Jerico, kag didto ginpakita sang Ginoo sa iya ang bug-os nga duta: ang kadutaan sang Galaad tubtob sa naaminhan sa banwa sang Dan; 2ang bug-os nga kadutaan ni Neftali; ang mga kadutaan ni Efraim kag ni Manases; ang kadutaan ni Juda tubtob sa nakatundan sa Dagat sang Mediteraneo; 3ang bagatnan nga bahin sang Juda; kag ang kapatagan halin sa Zoar pakadto sa Jerico, ang siudad sang mga palma. 4Dayon#Gen. 12:7; Gen. 26:3; Gen. 28:13. ang Ginoo nagsiling kay Moises, “Amo ini ang duta nga akon ginsaad kay Abraham, Isaac, kag kay Jacob nga akon ihatag sa ila mga kaliwatan. Ginapakita ko ini sa imo pero indi ko ikaw pagpakadtuon didto.”
5Gani si Moises, ang alagad sang Ginoo, napatay didto sa duta sang Moab suno sa ginsiling sang Ginoo. 6Ginlubong sia sang Ginoo sa kapatagan sang Moab sa atubangan sang banwa sang Bet-peor, pero tubtob sini nga adlaw wala gid sing may makatultol sang pat-od nga lugar nga ginlubngan sa iya. 7Si Moises nagaedad sing 120 ka tuig sang mapatay sia. Mabakod man sia gihapon kag masanag pa ang iya mga mata. 8Ang mga tawo sang Israel naglalaw para sa iya sa sulod sang traynta ka adlaw sa mga kapatagan sang Moab. Dayon, ang tion sa paglalaw kay Moises natapos na.
9Si Josue nga anak ni Nun napun-an sing kaalam, tungod kay sia ang ginpili ni Moises sa pagbulos sa iya. Ang mga tawo sang Israel nagtuman kay Josue kag naghimo sang mga sugo nga ginhatag sang Ginoo paagi kay Moises.
10Halin#Exo. 33:11; Sir. 45:1-5. sadto wala gid sing propeta sa Israel nga pareho kay Moises. Ang Ginoo naghambal sa iya sing tampad. 11Wala sing iban nga propeta nga nakahimo sing mga milagro kag mga kalatingalahan pareho sadtong ginsugo sang Ginoo kay Moises nga himuon batok sa hari sang Ehipto, sa iya mga opisyales, kag sa bug-os nga pungsod. 12Wala sing iban nga propeta nga sarang makahimo sang dalagku kag makakulogmat nga mga butang nga ginhimo ni Moises sa panulok sang bug-os nga Israel.
Currently Selected:
Deuteronomio 34: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
