Deuteronomio 31
31
Si Josue Nagbulos kay Moises
1Si Moises nagpadayon sa paghambal sa mga tawo sang Israel, 2kag#Num. 20:12. nagsiling, “Karon 120 ka tuig na ang akon edad kag indi na ako makasarang sa pagpangulo sa inyo. Kag wala labot sini ang Ginoo nagsiling sa akon nga indi ako magtabok sa Suba sang Jordan. 3Ang Ginoo nga inyo Dios amo gid ang magauna sa inyo kag magalaglag sa sini nga mga kapungsoran, agod inyo mapanag-iyahan ang ila duta, kag si Josue mangin-inyo pangulo suno sa ginsiling sang Ginoo. 4Ang#Num. 21:21-35. Ginoo magalaglag sini nga mga tawo, subong sang iya paglutos kay Sihon kag kay Og, mga hari sang mga Amornon, kag ginlaglag ang ila pungsod. 5Ang Ginoo magapadaog sa inyo batok sa ila, kag dapat ninyo himuon sa ila suno gid sa akon ginsiling sa inyo. 6Magpakabakod kamo kag magpakaisog. Indi kamo magkahadlok sa sini nga mga tawo. Ang inyo Dios, ang Ginoo mismo, magaupod sa inyo. Indi niya kamo pagbayaan ukon pagpatumbayaan.”
7Dayon gintawag ni Moises si Josue kag ginsingganan sa atubang sang tanan nga mga tawo sang Israel, “Magpakabakod kag magpakaisog ka. Ikaw amo ang magapangulo sini nga mga tawo sa pagpanag-iya sang duta nga ginsaad sang Ginoo sa ila mga katigulangan. 8Ang#Jos. 1:5; Heb. 13:5. Ginoo mismo amo ang magauna kag magaupod sa imo. Indi niya ikaw pagbayaan ukon pagpatumbayaan, gani indi ka magpakatalaw ukon magkahadlok.”
Ang Kasugoan Pagabasahon sa Tagsa ka Pito ka Tuig
9Gani ginsulat ni Moises ang Kasugoan sang Dios kag ginhatag ini sa mga pari nga levinhon nga gintugyanan sang Kaban sang Kasugtanan sang Ginoo kag sa mga pangulo sang Israel. 10Ginmanduan#Deut. 15:12; Deut. 16:13-15. niya sila “Sa katapusan sang tagsa ka pito ka tuig, kon mag-abot ang Tuig sang Paghilway, basaha ini sing mabaskog sa Piesta sang mga Palasilungan. 11Basaha ini sa mga tawo sang Israel kon magtipon sila sa pagsimba sa Ginoo nga inyo Dios sa isa ka lugar nga ginasimbahan. 12Tipuna ang tanan nga mga lalaki, mga babayi, mga kabataan, kag mga dumoluong nga nagaestar sa inyo mga banwa, agod ang tagsatagsa makabati sini kag magpasidungog sa Ginoo nga inyo Dios kag magtuman sing matutom sang iya mga pagtudlo. 13Paagi sa sini, ang inyo mga kaliwat nga wala makabati sang Kasugoan sang Ginoo nga inyo Dios makabati sini. Kag gani makatuon sila sa pagtuman sa iya tubtob nagakabuhi sila sa duta nga madali na lang ninyo panag-iyahan sa tabok sang Jordan.”
Ang Katapusan nga Laygay sang Ginoo kay Moises
14Dayon ang Ginoo nagsiling kay Moises, “Indi na maglawig ang imo kabuhi. Tawga si Josue kag dalha sia sa Tolda, agod tudloan ko sia sang iya pagahimuon.” Si Moises kag si Josue nagkadto sa Tolda, 15kag didto ang Ginoo nagpahayag sa ila paagi sa isa ka haligi nga panganod nga yadto didto sa pwertahan sang Tolda.
16Ang Ginoo nagsiling kay Moises, “Sa indi madugay mapatay ka, kag sa tapos ikaw mapatay ang mga tawo magadi-matutom sa akon kag magalapas sang kasugtanan nga akon ginhimo upod sa ila. Magabiya sila sa akon kag magasimba sa iban nga mga dios sang duta nga madali na lang nila pagasudlon. 17Kon mahanabo ini, magakaakig ako sa ila. Patumbayaan ko sila kag malaglag sila. Ang madamo nga mga kalalat-an kag pag-antos magaabot sa ila kag dayon ila makilala nga ini nga mga butang nahanabo sa ila tungod kay ako, nga ila Dios wala na nagaupod sa ila. 18Kag dayon indi ko sila pagbuligan tungod kay naghimo sila sing malaut kag nagsimba sa iban nga mga dios.
19“Karon, isulat ini nga kalantahon. Itudlo ini sa mga tawo sang Israel kag ila ini kantahon, agod manginsaksi ko ini batok sa ila. 20Dalhon ko sila sa sining maayo kag mapatubason nga duta, suno sa akon ginsaad sa ila mga katigulangan. Didto may bugana sila nga kalan-on, kag magakabuhi sila sing mainuswagon. Pero magabiya sila sa akon kag magasimba sa iban nga mga Dios. Sikwayon nila ako kag magalapas sang akon kasugtanan, 21kag magaabot sa ila ang madamo nga mga kalalat-an kag pag-antos. Dayon ini nga ambahanon manginsaksi ko batok sa ila didto, tungod kay ini pagaambahon sang ila mga kaliwat. Bisan gani subong, nga wala ko pa gani sila madala sa duta nga akon ginsaad sa ila, nahibal-an ko ang ila mga hunahuna.”
22Sa sadto gid nga adlaw ginsulat ni Moises ang kalantahon kag gintudlo ini sa mga tawo sang Israel.
23Dayon#Num. 27:23; Jos. 1:6. ang Ginoo nagsiling kay Josue nga anak ni Nun, “Magpakabakod ka kag magpakaisog. Pagapangulohan mo ang mga tawo sang Israel sa duta nga akon ginsaad sa ila, kag ako magaupod sa imo.”
24Ginsulat ni Moises ang Kasugoan sang Dios sa isa ka libro. Wala gid sia sing may nalipatan. 25Sang matapos niya ini, ginsingganan niya ang mga pari nga levinhon nga gintugyanan sang Kaban sang Kasugtanan sang Ginoo, 26“Dalha ini nga libro sang Kasugoan sang Dios kag ibutang ini sa tupad sang Kaban sang Kasugtanan sang Ginoo nga inyo Dios, agod magapabilin ini didto subong nga saksi batok sa iya mga tawo. 27Nahibal-an ko kon daw ano katig-a sang ila ulo kag ka mabinatuon sa ila. Kon nagmabinatuon sila sa Ginoo samtang buhi pa ako, daw ano pa gid kon patay na ako. 28Tipuna sa atubang ko ang tanan nga mga pangulo kag mga opisyales sang inyo mga tribo, agod hambalan ko sila sini nga mga butang. Manginsaksi ko ang langit kag ang duta batok sa ila. 29Nahibal-an ko nga sa tapos ako mapatay ang mga tawo manginmalaut kag magasikway sang akon gintudlo sa ila. Kag sa ulihi magaabot sa ila ang mga kalalat-an, tungod kay ginpaakig nila ang Ginoo paagi sa paghimo sang mga butang nga iya ginadumilian.”
Ang Ambahanon ni Moises
30Dayon ginhambal ni Moises ang mga pulong sang bug-os nga ambahanon samtang ang mga tawo sang Israel nagpamati.
Currently Selected:
Deuteronomio 31: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
