Deuteronomio 30
30
Mga Dapat Himuon agod Pakamaayuhon kag Pauswagon
1“Karon ginapapili ko kamo sa pagpakamaayo ukon pagpakamalaut. Kon ini tanan nga mga butang mahanabo sa inyo, kag magaestar kamo sa tunga sang mga kapungsoran sa diin ang Ginoo nga inyo Dios nagpaaplaag sa inyo, madumdoman ninyo ang akon ginsiling. 2Kon kamo kag ang inyo mga kaliwat magabalik sa Ginoo, kag sa bug-os ninyo nga tagipusoon kag kalag magatuman kamo sang iya mga sugo nga akon ginahatag sa inyo sini nga adlaw, 3dayon ang Ginoo nga inyo Dios magakaluoy sa inyo. Dalhon niya kamo pabalik halin sa mga kapungsoran sa diin ginpaaplaag niya kamo, kag iya kamo pauswagon liwat. 4Bisan ginpaaplaag niya kamo sa bug-os nga kalibutan, ang Ginoo nga inyo Dios magatipon kag magapabalik sa inyo, 5agod sa pagpanag-iya liwat sang duta sa diin ang inyo anay mga katigulangan nag-estar. Kag pauswagon niya kamo kag padamuon pa gid subong sang sa inyo anay mga katigulangan. 6Ang Ginoo nga inyo Dios magahatag sa inyo kag sa inyo mga kaliwat sing mga tagipusoon nga matinumanon, agod higugmaon ninyo sia sa bug-os ninyo nga tagipusoon kag kalag, kag magapadayon kamo sa pag-estar sa sina nga duta. 7Iya ihatag ini nga mga pagpakamalaut sa inyo mga kaaway nga nagdumot kag nagpigos sa inyo, 8kag magatuman kamo liwat kag magahimo sang tanan niya nga mga sugo nga akon ginahatag sa inyo sini nga adlaw. 9Ang Ginoo magapauswag sa inyo sa tanan ninyo nga pagahimuon. Magadamo ang inyo mga kaanakan kag mga kasapatan, kag magadamo ang patubas sang inyo kaumhan. Magakalipay sia sa pagpauswag sa inyo subong sang iya pagpauswag sa inyo mga katigulangan, 10pero kinahanglan tumanon ninyo sia kag himuon ang tanan niya nga mga sugo nga nasulat sa sini nga libro sang iya mga pagtulon-an. Kinahanglan magbalik kamo sa iya sa bug-os ninyo nga tagipusoon kag kalag.
11“Ang sugo nga akon ginahatag sa inyo sini nga adlaw indi tama kabudlay, kag masarangan ninyo nga himuon. 12Indi#Rom. 10:6-8. ini mataas pareho sang langit. Indi na kinahanglan nga magpamangkot kamo, ‘Sin-o bala ang magsaka sa langit kag magkuha sini kag dalhon sa amon, agod mabatian namon ini kag tumanon?’ 13Ukon yadto ini sa tabok sang dagat. Indi na kinahanglan nga magpamangkot kamo, ‘Sin-o bala ang magatabok sa dagat kag dalhon ini sa amon agod amon mabatian ini kag tumanon? 14Yari ini sa inyo. Nahibaluan ninyo ini kag inyo ini nasaulo. Karon tumana ninyo ini.
15“Sa#Sir. 15:16-17. sini nga adlaw ginapapili ko kamo sa kauswagan kag kalaglagan, ukon kabuhi kag kamatayon. 16Kon tumanon ninyo ang mga sugo sang Ginoo nga inyo Dios,#30:16 Ang isa ka dumaan nga pagbadbadKon tumanon ninyo ang mga sugo sang Ginoo nga inyo Dios; ang Hebreo wala nagalakip sini nga mga pulong. nga akon ginahatag sa inyo sini nga adlaw, kon ginahigugma ninyo sia, tumana ninyo sia, kag himua ang tanan niya nga mga kasugoan, dayon magauswag kamo kag mangin-isa ka pungsod nga may madamo nga mga tawo. Ang Ginoo nga inyo Dios magabendisyon sa inyo sa duta nga madali na lang ninyo panag-iyahan. 17Pero kon indi kamo magtuman kag indi magpamati, kag magsimba sa iban nga mga dios, 18karon nga daan nagapaandam ako sa inyo nga malaglag kamo. Indi kamo makaestar sing madugay sa sina nga duta sa tabok sang Jordan nga madali na lang ninyo panag-iyahan. 19Ginapapili ko kamo karon sa kabuhi ukon kamatayon, sa pagpakamaayo ukon pagpakamalaut sang Dios, kag saksi ko ang langit kag duta sa inyo pagapilion. Pilia ang kabuhi. 20Higugmaa#Gen. 12:7; Gen. 26:3; Gen. 28:13. ang Ginoo nga inyo Dios, tumana sia kag magmatutom kamo sa iya, agod nga kamo kag ang inyo mga kaliwat magakabuhi sing malawig sa duta nga iya ginsaad nga ihatag sa inyo mga katigulangan nga amo sanday Abraham, Isaac kag Jacob.”
Currently Selected:
Deuteronomio 30: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
