Deuteronomio 13
13
1“Kon may isa ka propeta ukon manugsaysay sang kahulogan sang mga damgo magpakita sa inyo sang isa ka tanda ukon katingalahan, 2agod sa paghaylo sa inyo sa pagsimba kag sa pag-alagad sa mga dios nga wala ninyo anay ginsimba, bisan mahanabo pa ang iya ginasiling, 3indi kamo magpati sa iya. Ang Ginoo nga inyo Dios nagagamit sa iya sa pagtilaw sa inyo kon bala ginahigugma ninyo ang Ginoo sa bug-os ninyo nga tagipusoon kag kalag. 4Sunda ninyo kag tahura ang Ginoo. Tumana ninyo sia kag bantayi ang iya mga sugo. Simbaha ninyo sia kag magmatutom kamo sa iya. 5Pero patya ninyo ang propeta ukon ang manugsaysay sang kahulogan sang mga damgo nga nagatudlo sa inyo sa pagsupak sa Ginoo nga nagluwas sa inyo sa Ehipto sa diin gin-ulipon kamo. Ina nga tawo malaut, kag nagatinguha sia sa pagpahilayo sa inyo sa pagginawi nga ginsugo sa inyo sang Ginoo, gani dapat sia patyon. Sa sini nga paagi mapahilayo kamo sa sini nga kalautan.
6“Bisan ang imo utod nga lalaki, ukon ang imo anak nga lalaki ukon babayi, ukon ang imo pinalangga nga asawa, ukon ang imo labing suod nga abyan magsiling sa imo sa sekrito nga magsimba sa iban nga mga dios, mga dios nga wala mo anay ginsimba kag sang imo mga katigulangan, 7ukon ayhan ang isa sa ila magasiling sa imo sa pagsimba sa mga dios sang mga tawo nga nagaestar malapit sa inyo ukon sa mga dios sang mga tawo nga nagaestar malayo sa inyo, 8indi kamo magpadala ukon magpamati sa iya. Indi ka magkaluoy ukon mag-apin sa iya. 9Patya sia! Ikaw ang una nga magbato sa iya, kag dayon ipabato man sia sa tanan. 10Batuha sia tubtob mapatay! Nagtinguha sia sa pagpahilayo sa inyo sa Ginoo nga inyo Dios nga nagluwas sa inyo halin sa Ehipto sa diin gin-ulipon kamo. 11Dayon ang tanan nga mga tawo sang Israel makabati sang nahanabo. Magakahadlok sila kag wala na sing may maghimo liwat sing malaut nga mga butang.
12“Kon mag-estar na kamo sa mga banwa nga ginahatag sang Ginoo nga inyo Dios sa inyo, mabatian ninyo 13nga may mga huroshuros nga mga tawo sa tunga ninyo nga nagpatalang sang mga pumoluyo sa ila banwa sa pagsimba sa mga dios nga wala ninyo anay ginsimba. 14Kon makabati kamo sini nga sugid, usisaa ninyo ini sing maayo. Kon matuod ini nga sugid nga may malaut nga natabo, 15dayon pamatya ninyo ang tanan nga mga tawo sa sina nga banwa kag ang ila man mga kasapatan. Laglaga ina nga banwa sing bug-os. 16Tipuna ang tanan nga mga pagkabutang sang mga pumoluyo sina nga banwa kag tumpoka ini sa plasa. Dayon sunoga ang banwa kag ang tanan nga yara sa sulod sini subong isa ka dulot sa Ginoo nga inyo Dios. Kinahanglan magapabilin ini sa kalaglagan sa walay katapusan, kag indi na pagpatindugon liwat. 17Indi kamo magtago para sa inyo kaugalingon sang bisan ano nga ginpakamalaut, kag dayon magatahaw ang kaakig sang Ginoo kag magakaluoy sia sa inyo. Sa iya kaluoy magapadamo sia sa inyo suno sa iya ginsaad sa inyo mga katigulangan, 18kon inyo tumanon ang tanan niya nga mga sugo nga akon ginahatag sa inyo sini nga adlaw, kag maghimo sang matarong sa panulok sang Ginoo nga inyo Dios.
Currently Selected:
Deuteronomio 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
