Deuteronomio 12
12
Isa Lamang ka Lugar ang Pagasimbahan
1“Karon pamatii ninyo ang tanan nga mga kasugoan nga inyo pagatumanon samtang nagakabuhi kamo sa duta nga ginahatag sa inyo sang Ginoo nga Dios sang inyo mga katigulangan. 2Sa duta nga inyo pagapanag-iyahan, gub-a ninyo ang tanan nga mga lugar sa mataas nga mga kabukiran, mga kabakuloran, kag sa idalom sang madabong nga mga kahoy sa diin ang mga tawo nagasimba sa ila mga dios. 3Gub-a#Deut. 7:5. ang ila mga altar kag dugmoka ang ila balaan nga mga haligi nga bato. Sunoga ang mga haligi sang ila diosa nga si Asera, kag pudla ang ila mga diosdios, agod indi na gid sila masimba liwat sa sini nga mga lugar.
4“Indi kamo magsimba sa Ginoo nga inyo Dios pareho sang pagsimba sini nga mga tawo sa ila mga dios. 5Gikan sa kadutaan sang tanan ninyo nga mga tribo ang Ginoo magapili sang isa ka lugar sa diin ang mga tawo magakadto sa iya presensya kag magasimba sa iya. 6Didto idulot ninyo ang inyo mga halad nga pagasunogon kag ang iban ninyo nga mga dulot, ang inyo mga ikapulo kag mga dulot, kag ang inyo mga dulot nga ginsaad ninyo sa Ginoo, ang inyo mga dulot nga kinabubot-on, kag ang mga panganay sang inyo mga baka kag mga karnero. 7Didto, sa atubang sang Ginoo nga inyo Dios nga nagbendisyon sa inyo, kamo kag ang inyo mga panimalay magakaon kag magakalipay tungod sang maayo nga mga butang nga inyo ginpangabudlayan.
8“Kon ina nga tion mag-abot indi ninyo paghimuon ang inyo anay ginahimo. Tubtob karon ang tagsatagsa sa inyo nagahimo suno sa iya naluyagan, 9tungod kay wala pa kamo makasulod sa duta nga ginahatag sa inyo sang Ginoo nga inyo Dios, sa diin kamo magakabuhi sing malinong. 10Kon makatabok na kamo sa Suba sang Jordan, ang Ginoo magahatag sa inyo sang duta kag magaestar kamo didto. Apinan niya kamo sa tanan ninyo nga mga kaaway, agod magakabuhi kamo sing malinong. 11Ang Ginoo magapili sing isa ka lugar sa diin kamo magasimba sa iya, kag didto magadala kamo sa iya sang tanan nga butang nga akon ginasugo sa inyo: ang inyo mga halad nga pagasunogon kag ang iban ninyo nga mga halad, ang inyo mga ikapulo kag mga dulot, kag yadtong pinasahi nga mga dulot nga ginsaad ninyo sa Ginoo. 12Didto magkalipay kamo sa iya atubang, upod sa inyo mga kabataan, sa inyo mga ulipon, kag sa mga Levita nga nagaestar sa inyo mga banwa. Dumdoma ninyo nga ang mga Levita wala sing ila kaugalingon nga duta. 13Indi kamo magdulot sang inyo mga halad bisan diin lang, 14kundi ihalad ninyo ini sa isa ka lugar lamang nga pilion sang Ginoo sa kadutaan sang isa sang inyo mga tribo. Didto lamang kamo magdulot sang inyo mga halad nga pagasunogon kag maghimo sang tanan nga iban nga mga butang nga akon ginsugo sa inyo.
15“Pero sarang kamo makaihaw kag makakaon sang inyo mga hayop bisan diin kamo nagaestar. Makakaon kamo suno sa kadamuon sang ginahatag sang Ginoo sa inyo. Tanan kamo, matinlo ukon indi matinlo makakaon sini, subong sang pagkaon ninyo sang karne sang usa ukon sang gasela. 16Pero#Gen. 9:4; Lev. 7:26-27; 17:10-14; 19:26; Deut. 15:23. indi kamo magkaon sang ila dugo. Iula ninyo ini sa duta subong sang tubig. 17Sa mga lugar sa diin kamo nagaestar, indi ninyo pagkaunon ang inyo ginadulot sa Ginoo nga amo ang mga ikapulo sang inyo trigo, sang inyo bino, ukon sang inyo lana sang olivo, ukon ang panganay sang inyo mga baka kag mga karnero, ukon ang mga dulot nga ginsaad ninyo sa Ginoo, ang inyo kinabubot-on nga mga dulot, ukon ang bisan ano nga mga dulot. 18Kamo kag ang inyo mga kabataan, upod ang inyo mga alagad kag ang mga Levita nga nagaestar sa inyo mga kabanwahanan, magakaon sining mga dulot sa atubang lamang sang Ginoo nga inyo Dios, sa isa ka lugar nga ginpili sang Ginoo nga inyo Dios. Kag magkasadya kamo didto tungod sang mga butang nga inyo ginhimo. 19Indi man ninyo pagpatumbayai ang mga Levita samtang nagakabuhi kamo sa inyo duta.
20“Kon ang Ginoo nga inyo Dios magpasangkad sang inyo kadutaan, suno sa iya ginsaad, sarang kamo makakaon sang karne kon san-o nga luyag ninyo. 21Kon ang isa ka lugar nga ginasimbahan ninyo malayo, dayon suno sa akon ginsiling sa inyo, sarang kamo makaihaw sang baka ukon karnero nga ginhatag sa inyo sang Ginoo kag magkaon kamo sing karne sa inyo balay sa bisan ano nga tion nga luyag ninyo. 22Ang bisan sin-o nga matinlo ukon di-matinlo makakaon sing karne, subong sang iya pagkaon sang karne sang usa ukon gasela. 23Indi#Lev. 17:10-14. lang pagkauna ang karne nga may yara pa nga dugo sa sini, kay ang kabuhi yara sa dugo, kag indi ninyo dapat kaunon ang kabuhi upod sa karne. 24Indi ninyo pagkauna ang dugo sa baylo, iula ini sa duta subong sang tubig. 25Kon indi ninyo pagkaunon ang dugo, malipay ang Ginoo, kag ang tanan manginmaayo para sa inyo kag sa inyo mga kaliwat. 26Dalha ninyo ang inyo mga dulot kag mga regalo nga ginsaad ninyo sa Ginoo sa isa ka lugar nga ginasimbahan. 27Idulot didto ang mga halad nga pagasunogon sing bug-os sa altar sang Ginoo, kag subong man ang mga halad nga kinahanglan iula ang dugo sa altar kag ang karne kaunon. 28Tumana sing maayo ang tanan nga ginsugo ko sa inyo kag ang tanan manginmaayo para sa inyo kag sa inyo mga kaliwat sa walay katapusan, tungod kay magahimo kamo sing matarong, kag magapahamuot sa Ginoo nga inyo Dios.
Paandam batok sa mga Diosdios
29“Ang Ginoo nga inyo Dios magalaglag sang mga pungsod samtang ginagubat ninyo ang ila duta, kag inyo ini panag-iyahan kag magaestar didto. 30Sa tapos malaglag sang Ginoo ini nga mga pungsod, tandaan ninyo nga indi gid kamo magsunod sa ila mga ginahimo, tungod kay ini manginsiod para sa inyo. Indi kamo mag-usisa kon paano ang ila pagsimba sa ila mga dios, agod makasimba man kamo pareho sang ila ginahimo. 31Indi ninyo pagsimbaha ang Ginoo nga inyo Dios pareho sang ila pagsimba sang ila mga dios, kay sa pagsimba nila sa ila mga dios ginahimo nila ang makangilil-ad nga mga butang nga ginadumtan sang Ginoo. Ginahalad gani nila ang ila mga kabataan sa kalayo sang ila mga altar.
32“Tumana#Deut. 4:2; Bug. 22:18-19. ang tanan nga akon ginsugo sa inyo, indi ninyo pagdugangan ukon pag-ibanan ini.
Currently Selected:
Deuteronomio 12: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
