Deuteronomio 11
11
Ang Pagkagamhanan sang Ginoo
1“Higugmaa ang Ginoo nga inyo Dios kag tumana sa gihapon ang iya tanan nga mga kasugoan. 2Karon, dumdoma ninyo ang inyo natun-an nahanungod sa Ginoo paagi sa inyo mga inagihan upod sa iya. Kamo gid ang nakaagi sini kag indi ang inyo mga kabataan. Nakita ninyo ang pagkabantog sang Ginoo, ang iya gahom, ang iya kusog, 3kag#Exo. 7:8–12:13. ang iya ginhimo nga mga milagro. Nakita ninyo ang iya ginhimo sa hari sang Ehipto, kag sa iya bug-os nga pungsod. 4Nakita#Exo. 14:28. ninyo kon daw ano ang pagpamatay niya sa mga hangaway sang Ehipto, upod ang ila mga kabayo kag mga karwahi. Ginlumsan niya sila sa Mapula nga Dagat#11:4 MAPULA NGA DAGAT: Tan-awa ang Lista sang mga Pulong. sang paglagas nila sa inyo. 5Nahibal-an ninyo ang ginhimo sang Ginoo para sa inyo didto sa desierto sang wala pa kamo makaabot diri. 6Dumdoma#Num. 16:31-32. ninyo ang iya ginhimo kay Datan kag Abiram, ang mga anak ni Eliab gikan sa tribo ni Ruben. Nagatan-aw ang tanan sang magbuka ang duta kag ginlamon sila, upod ang ila mga panimalay, ang ila mga tolda kag ang tanan nila nga mga ulipon kag mga kasapatan. 7Nakita gid ninyo yadtong tanan nga dalagku nga mga butang nga ginhimo sang Ginoo.
Ang mga Kaayuhan sang Duta nga Ginsaad
8“Tumana ninyo ang tanan nga ginsugo ko sa inyo sini nga adlaw. Dayon makatabok kamo sa suba kag makapanag-iya sang duta nga inyo sudlon sa labing madali. 9Kag magakabuhi kamo sing malawig sa sadtong duta nga maayo kag mapatubason nga ginsaad sang Ginoo nga ihatag sa inyo mga katigulangan kag sa ila mga kaliwat. 10Ang duta nga inyo panag-iyahan sa labing madali indi pareho sa duta sang Ehipto sa diin kamo anay nag-estar. Didto, sang pagtanom ninyo sang trigo ginbudlayan gid kamo sa pagpatubig sang inyo mga talamnan, 11pero ang duta nga inyo madali na lang pagasudlon, isa ka duta nga may mga kapatagan kag mga bakulod nga ginabunyagan sang ulan. 12Ang Ginoo nga inyo Dios nagatatap sini nga duta kag nagabantay sini sa bug-os nga tuig.
13“Gani,#Lev. 26:3-5; Deut. 7:12-16; 28:1-14. tumana ninyo ang mga sugo nga ginhatag ko sa inyo sini nga adlaw, higugmaa ang Ginoo nga inyo Dios, kag alagara sia sa bug-os ninyo nga tagipusoon kag kalag. 14Kon himuon ninyo ini, magapadala sia sang ulan sa inyo duta sa nagakaigo nga tion, ang nahauna kag naulihi nga ulan, agod nga may trigo kamo, bino, lana sang olivo, 15kag hilamon para sa inyo mga baka. Indi kamo mawad-an sang kalan-on nga inyo naluyagan. 16Mag-andam kamo nga indi kamo pagpatalangon sa pagsimba sa iban nga mga dios sa baylo sang sa Ginoo. 17Kon himuon ninyo ini, ang Ginoo magakaakig sa inyo. Indi niya pagpaulanon kag ang duta magakigas, sa bagay nga indi magtubo ang mga tanom. Dayon mapatay kamo gilayon didto bisan pa isa ka maayo nga duta ang iya ginahatag sa inyo.
18“Hupti#Deut. 6:6-9. sa inyo mga tagipusoon kag mga panghunahuna ini nga mga sugo. Ihigot ini sa inyo mga butkon kag ibutang sa inyo mga agtang sa pagpahanumdom sa inyo. 19Itudlo ini sa inyo mga kabataan. Ihambal ini sa ila kon yara kamo sa inyo balay kag kon sa iban nga lugar, sa inyo pagpahuway kag sa inyo pag-obra. 20Isulat ini sa mga bakalan sang inyo mga balay kag sa mga gawang sang inyo banwa. 21Dayon kamo kag ang inyo mga kabataan magakabuhi sing malawig sa duta nga ginsaad sang Ginoo nga inyo Dios sa inyo mga katigulangan. Magakabuhi kamo didto tubtob nga ang langit yara pa sa ibabaw sang duta.
22“Tumana gid sing maayo ang tanan nga ginsugo ko sa inyo: higugmaa ang Ginoo nga inyo Dios, tumana ang tanan nga iya ginasugo, kag magmatutom kamo sa iya. 23Dayon tabugon niya ang tanan nga mga kapungsoran samtang nagaabanse kamo, kag panag-iyahan ninyo ang duta nga iya sang mga kapungsoran nga mas dalagku kag mas gamhanan pa sang sa inyo. 24Ang#Jos. 1:3-5. tanan nga duta nga inyo pagatapakan mangin-inyo. Ang kasangkaron sang inyo kadutaan nagasugod sa desierto sa bagatnan pakadto sa Bukid sang Libano sa aminhan, kag sa Suba sang Eufrates sa sidlangan pakadto sa Dagat sang Mediteraneo sa nakatundan. 25Wala sing may makabato sa inyo. Bisan diin kamo makadto sadto nga duta, ang Ginoo nga inyo Dios magapahadlok sang mga tawo sa inyo, suno sa iya ginsaad.
26“Sa sini nga adlaw ginapapili ko kamo sang bendisyon ukon pagpakamalaut— 27bendisyon kon tumanon ninyo ang ginahatag ko karon nga adlaw sa inyo nga mga sugo sang Ginoo nga inyo Dios, 28pero pagpakamalaut kon indi ninyo pagtumanon ini nga mga sugo, kag kon magsimba kamo sa iban nga mga dios nga wala gid ninyo pagsimbaha sang una. 29Kon#Deut. 27:11-14; Jos. 8:33-35. ang Ginoo magdala sa inyo sa duta nga inyo pagapanag-iyahan, ihambal ninyo ini nga pagbendisyon gikan sa Bukid sang Gerizim kag ang pagpakamalaut sa Bukid sang Ebal. 30Ining duha ka mga bukid yara sa nakatundan sang Suba sang Jordan sa kadutaan sang mga Canaanhon nga nagaestar sa Kapatagan sang Jordan. Yara sila nayon sa nakatundan, nga indi gid man malayo sa balaan nga mga kahoy sang More malapit sa banwa sang Gilgal. 31Manugtabok na kamo sa Suba sang Jordan kag magapanag-iya sang duta nga ginahatag sang Ginoo nga inyo Dios sa inyo. Kon makuha ninyo ini kag mag-estar didto, 32tumana gid ninyo ang tanan nga mga kasugoan nga akon ginahatag sa inyo sini nga adlaw.
Currently Selected:
Deuteronomio 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
