Daniel 9
9
Si Daniel Nagpangamuyo para sa Iya mga Tawo
1Si Dario nga Midianhon nga anak ni Ahasuero naggahom sa ginharian sang Babilonia. 2Sang#Jer. 25:11; 29:10. nahauna nga tuig sang iya paghari, nagtuon ako sang balaan nga mga libro kag nagpanumdom nahanungod sang setenta ka tuig nga ang Jerusalem magapabilin nga guba, subong sang ginsiling sang Ginoo kay Jeremias nga propeta. 3Kag nagpangamuyo ako sing hanuot gid sa Ginoo nga Gamhanan, nagpakitluoy sa iya, nagpuasa, nagbayo sing sako, kag nagpungko sa abo. 4Nagpangamuyo ako sa Ginoo nga akon Dios kag gintuad ko ang mga sala sang akon mga kasimanwa.
Nagsiling ako, “O Ginoong Dios, gamhanan ikaw kag ginapasidunggan namon ikaw. Ginatuman mo ang imo kasugtanan kag nagapakita ka sing malig-on nga paghigugma sa mga nagahigugma sa imo kag nagatuman sang imo sugo.
5“Nagpakasala kami, naghimo kami sing malaut, kag nagsayop. Wala kami magtuman sang imo mga sugo kag nagtalikod kami sa pagkamatarong nga ginpakita mo sa amon. 6Wala gid kami magpamati sa imo mga alagad nga mga propeta, nga sa imo ngalan naghambal sa amon mga hari, amon mga pangulo, amon mga katigulangan, kag sa amon bug-os nga pungsod. 7Ikaw,#Bar. 1:15-17. Ginoo, matarong sa gihapon, kag kami tanan nagginawi sing makahuloya. Matuod ini sa amon tanan nga nagaestar sa Judea kag sa Jerusalem, kag sa tanan nga mga Israelinhon nga imo ginpaalaplaag sa mga pungsod nga malapit kag malayo tungod kay nagbiya sila sa imo. 8Ang amon mga hari, ang amon mga pangulo, kag ang amon mga katigulangan nagginawi sing makahuloya kag nagpakasala batok sa imo, O Ginoo. 9Maluloy-on ka kag mapinatawaron, bisan nagpamatok kami sa imo. 10Wala kami magpamati sa imo, O Ginoo nga amon Dios, sang ginsingganan mo kami sa pagkabuhi suno sa mga kasugoan nga ginhatag mo sa amon paagi sa imo mga alagad nga mga propeta. 11Ang#Bar. 1:19-21. bug-os nga Israel naglapas sang imo mga kasugoan kag indi magpamati sang imo ginsiling. Nagpakasala kami batok sa imo gani ginpadal-an mo kami sang mga kalautan nga nasulat sa Kasugoan ni Moises nga imo alagad. 12Ginhimo mo ang ginsiling mo nga imo himuon sa amon kag sa amon mga pangulo. Ginsilutan mo ang Jerusalem sing labi sang sa iban nga mga siudad diri sa duta. 13Nabaton namon ang tanan nga silot nga ginasiling sa Kasugoan ni Moises. Kag bisan karon, O Ginoo nga amon Dios, wala kami magtinguha sa paglipay sa imo paagi sa pagbiya sang amon mga sala ukon sa pagsunod sang imo kamatuoran. 14Ikaw, O Ginoo nga amon Dios, handa sa pagsilot sa amon, kag ginsilutan mo kami, tungod kay ang tanan nga imo ginahimo matarong kag wala kami magpamati sa imo.
15“O#Bar. 2:11-13. Ginoo nga amon Dios, nagpakita ka sang imo gahom paagi sa imo pagpagwa sang imo mga tawo sa Ehipto, kag ang imo gahom madumdoman sa gihapon. Nagpakasala kami kag nakahimo sing sayop. 16Gin-apinan mo kami sang una, gani indi ka na magkaakig sa Jerusalem. Imo ini siudad, ang imo balaan nga bukid.#9:16 BALAAN NGA BUKID: Bukid sang Sion (tan-awa ang Lista sang mga Pulong). Ang tanan nga mga tawo sang kaingod nga mga pungsod nagapakanubo sang Jerusalem kag sa imo mga tawo tungod sang amon mga sala kag sang malaut nga ginhimo sang amon mga katigulangan. 17O#Bar. 2:14. Dios, pamatii ang akon pangamuyo kag pag-ampo. Patinduga liwat ang imo Templo nga naguba, patinduga ini agod ang tanan makahibalo nga ikaw ang Dios. 18Pamatii#Bar. 2:19. kami, O Dios. Talupangda kami kag tamda ang amon palaligban kag ang pag-antos sang siudad nga nagadala sang imo ngalan. Nagapangamuyo kami sa imo tungod kay maluloy-on ka, indi tungod nga nakahimo kami sing matarong. 19O Ginoo, pamatii kami kag patawara kami. O Ginoo, pamatii kami, kag himua ang nagakaigo sa gilayon! Indi ka magdugay, agod ang tanan makahibalo nga ikaw amo ang Dios! Imo ini nga siudad kag ini nga mga tawo.”
Si Gabriel Nagsaysay sang Tagna
20Nagpadayon ako sa pagpangamuyo, nga nagatuad sang akon mga sala kag sang mga sala sang akon mga kasimanwa nga Israelinhon, kag nagpakitluoy ako sa Ginoo nga akon Dios nga patindugon niya liwat ang iya balaan nga Templo. 21Samtang#Luc. 1:19, 26. nagapangamuyo ako, si Gabriel nga akon nakita sa nahauna nga palanan-awon naglupad paidalom pakadto sa akon. Tion sadto sa pagdulot sang halad sa kahapunanon. 22Nagsiling sia, “Daniel, nag-abot ako diri sa pagbulig sa imo sa paghangop sang tagna. 23Sang pag-ampo mo sa Dios, ginsabat niya ikaw. Nag-abot ako sa pagsugid sa imo sang sabat, kay ang Dios nagahigugma sa imo. Karon magpamati ka samtang ginasaysay ko ang palanan-awon.
24“Ang Dios nagtalana sing kalawigon nga 490 ka tuig sa paghilway sang imo mga tawo kag balaan nga siudad gikan sa sala kag kalautan. Dayon ang sala patawaron kag ang walay katubtoban nga katarungan paluntaron, agod ang palanan-awon kag ang tagna matuman kag ang balaan nga Templo#9:24 Templo: ukonaltar. mahalad liwat sa Dios. 25Talupangda kag hangpa ini: Magaligad ang kwarentay nwebe ka tuig halin sa tion sang paghatag sang mando sa pagpatindog liwat sang Jerusalem tubtob sa pag-abot sang pinili nga pangulo sang Dios. Ang Jerusalem patindugon liwat nga may mga dalan kag malig-on nga mga pamakod. Magatindog ini sa sulod sang 434 ka tuig, pero manginpanahon ini sang mga kagamo. 26Kag sa katapusan sina nga panahon, ang ginpili sang Dios nga pangulo pagapatyon sa indi matarong nga paagi. Ang siudad kag ang Templo pagagub-on sang nagagubat nga mga hangaway sang gamhanan nga pangulo. Ang katapusan magaabot kaangay sang baha, nga nagadala sang inaway kag kalaglagan nga ginmando sang Dios. 27Ina#Dan. 11:31; 12:11; 1 Mac. 1:44-50, 54; Mat. 24:15; Mar. 13:14. nga pangulo magahimo sing malig-on nga kasugtanan sa madamo nga mga tawo sa sulod sang pito ka tuig, kag pauntaton niya ang mga paghalad kag mga pagdulot sa sulod sang tatlo ka tuig kag tunga. Sa labing mataas nga bahin sang Templo makita ang Makakulogmat nga Kangil-aran,#9:27 ANG MAKAKULOGMAT NGA KANGIL-ARAN: Isa ka estatwa sang dios nga ginbutang sa Templo sang Jerusalem, sang mga dumoluong nga nagpanggubat (tan-awa ang 1 Mac. 1:54-61). kag magapabilin ini didto tubtob ang isa nga nagbutang sini didto pagasilutan sang Dios suno sa gin-aman para sa iya.”
Currently Selected:
Daniel 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
