Daniel 8
8
Ang Palanan-awon ni Daniel Nahanungod sang Isa ka Karnero nga Lalaki kag Kanding
1Sa ikatlo nga tuig sang paghari ni Belsasar nakakita ako sang ikaduha nga palanan-awon.#8:1 Sumugod sa 8:1 tubtob sa katapusan ang libro nasulat sa Hebreo (tan-awa ang 2:4). 2Sa palanan-awon nakita ko sa hinali ang akon kaugalingon nga yara sa napadiran nga siudad sang Susa sa probinsya sang Elam. Nagatindog ako sadto sa tupad sang Suba sang Ulai. 3Didto sa tupad sang suba nakita ko ang isa ka karnero nga lalaki. May duha ini ka malaba nga mga sungay, kag ang isa nga ulihi lang magtubo mas malaba pa sang sa nahauna. 4Nakita ko nga ang karnero nagapanungay sa nakatundan, sa aminhan, kag sa bagatnan. Wala sing sapat nga makapugong sa iya ukon makapalagyo sa iya gahom. Ginhimo niya ang luyag niya kag nagbugalon sia.
5Sang nagapalibog ako kon ano ang kahulogan sini, ang isa ka kanding nga lalaki nag-abot nga nagadalagan halin sa katundan. Nagalabad lang sia nga ang iya mga tiil wala nagadapat sa duta. May isa sia ka pinasahi nga sungay sa gintung-an sang iya duha ka mga mata. 6Nagpalapit sia sa karnero nga may duha ka sungay nga nakita ko nga nagatindog sa tupad sang suba, kag dinalasa niya ang karnero sa bug-os niya nga kusog. 7Nagtan-aw ako sang iya pagsungay sa karnero. Naakig gid sia gani sinungay niya ang karnero kag napungal ang duha ka mga sungay sang karnero. Ang karnero wala sing kusog sa pagbato, gani natumba sia sa duta kag gintasak ini. Wala gid sing may makatabang sa iya.
8Ang kanding nagbugalon kag nagbugalon pa gid, pero sang yara sia sa putokputokan sang iya gahom ang iya sungay napungal. Sa lugar sini nga sungay nagtubo ang apat ka pinasahi nga mga sungay nga nagapuntariya sa nagkalainlain nga mga lugar. 9Ang isa ka diutay nga sungay nagtubo sa isa sang apat ka mga sungay. Nagpakita ini sang iya kusog nga naglambot pa nabagatnan kag nasidlangan, kag padulong sa Duta nga Ginsaad. 10Nagdugang#Bug. 12:4. pa gid ang iya kusog nga sarang na sia makasalakay sang mga hangaway sang langit, sang mga bituon kag iya ginpangdagdag sa duta ang iban nga mga bituon kag gintasak ini. 11Ginbatuan pa gani niya ang Prinsipe sang mga hangaway sa langit, ginpauntat niya ang mga halad nga ginahalad adlaw-adlaw sa Prinsipe, kag gindagtaan niya ang Templo. 12Ang mga tawo nagpakasala didto sa baylo nga magdulot sila adlaw-adlaw sang mga halad, kag ang matuod nga pagtuluohan ginhaboy sa duta. Ang sungay nagmadinalag-on sa tanan niya nga ginhimo.
13Dayon nabatian ko ang isa ka anghel nga nagpamangkot sa isa ka anghel, “Tubtob san-o bala magapadayon ang nagkahanabo sa palanan-awon? Tubtob san-o pa bala magapadayon ining makakulogmat nga sala sa baylo sang mga adlaw-adlaw nga halad, kag ang pagtasak sang mga hangaway sang langit kag sang Templo?”
14Nabatian ko ang isa ka anghel nga nagsabat, “Magapadayon ini sa sulod sang 1,150#8:14 1,150 ka adlaw: ukon2,300 ka gab-i kag adlaw. ka gab-i kag adlaw, sa diin ang mga halad sa gab-i kag sa aga indi pag-idulot. Dayon ang Templo pagapatindugon liwat.”
Si Gabriel nga Anghel Nagsaysay sang Palanan-awon
15Nagtinguha ako sa paghangop sang kahulogan sang palanan-awon. Sa hinali ang isa nga daw tawo nagtindog sa atubang ko. 16Nabatian#Luc. 1:19, 26. ko ang tingog nga nagpanawag gikan sa Suba sang Ulai nga nagasiling, “Gabriel, isaysay sa iya ang kahulogan sang iya nakita.” 17Si Gabriel nag-abot kag nagtindog sa tupad ko, kag kinulbaan ako sa bagay nga natumba ako sa duta.
Nagsiling sia sa akon, “Tawo nga mamalatyon, hangpa ang kahulogan sini. Ang palanan-awon may kaangtanan sa katapusan sang kalibutan.” 18Samtang nagahambal sia nalipong ako kag natumba sa duta. Gin-uyatan niya ako kag ginpabangon, 19kag nagsiling, “Ginapakita ko sa imo ang maabutan sang kaakig sang Dios. Ang palanan-awon may kaangtanan sa katapusan nga panahon.
20“Ang karnero nga lalaki nga nakita mo nga may duha ka mga sungay amo ang mga ginharian sang Media kag Persia. 21Ang kanding amo ang ginharian sang Gresia kag ang pinasahi nga sungay sa gintung-an sang iya mga mata amo ang nahauna nga hari. 22Ang apat ka mga sungay nga nagtubo sang mapungal ang nahauna nga sungay amo ang apat ka mga ginharian nga magabahinbahin sa sina nga pungsod, pero indi sila pareho kakusog sang nahauna nga ginharian.
23“Kon ang katapusan sadto nga mga ginharian malapit na, kag nagmalaut gid sila nga dapat silutan, magagahom ang isa ka hari nga matig-a sing ulo, mapintas kag madaya. 24Magabakod sia, pero indi sa iya kaugalingon nga gahom. Magapanglaglag sia kag magamadinalag-on sa tanan nga iya ginahimo. Laglagon niya ang gamhanan nga mga tawo kag ang mga tawo sang Dios. 25Tungod kay maabtik sia, magamadinalag-on sia sa iya mga pagpangdaya. Magapabugal sia sang iya kaugalingon kag magalaglag sang madamo nga mga tawo nga wala sing paandam. Magabato sia bisan sa pinakagamhanan nga Hari, pero pagalaglagon sia indi paagi sa gahom sang tawo. 26Ini nga palanan-awon nahanungod sang mga halad sa gab-i kag sa aga nga ginsaysay sa imo matuman. Karon hupti ini sing tago lang, tungod kay madugay pa kag ini nga palanan-awon matuman.”
27Natublag gid ako kag indi maayo ang akon pamatyag sa sulod sang pila ka adlaw. Sang ulihi nagbangon ako kag nagbalik sa bulohaton nga ginhatag sa akon sang hari. Pero naglibog gid ang akon ulo nahanungod sang palanan-awon kag indi ko mahangpan yadto.
Currently Selected:
Daniel 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
