Daniel 6
6
Si Daniel sa Lungib sang mga Leon
1Si Dario nagpili sing 120 ka mga gobernador sa pagdumala sang bug-os niya nga ginharian. 2Dayon ginpili niya si Daniel kag ang duha pa ka tawo sa pagdumala sang mga gobernador kag sa pag-atipan sang mga butang para sa kaayuhan sang hari. 3Sa wala madugay si Daniel nagpakita nga mas maayo sia magdumala sang sa iban nga mga manugdumala kag mga gobernador. Tungod kay labaw sia sa iban sa abilidad, ginpakamaayo sang hari ang pagpadumala sa iya sang bug-os nga ginharian. 4Dayon ang iban nga mga manugdumala kag mga gobernador nagtinguha sa pagpangita sing sayop sa pagdumala ni Daniel sa ginharian. Pero indi sila makakita sing sayop ukon kalainan, tungod kay si Daniel masaligan kag wala maghimo sing bisan ano nga sayop ukon malain. 5Gani nagsiling sila sa isa kag isa, “Wala kita sing makita nga sarang masumbong batok kay Daniel kon indi nahanungod sa iya pagtuluohan.”
6Gani nagkadto sila sa hari kag nagsiling, “Haring Dario, kabay nga magkabuhi ka sa gihapon! 7Kami tanan nga nagadumala sang imo ginharian: mga manugdumala, mga gobernador, kabulig nga mga gobernador, kag mga palamangkutan, nagkasugot nga ikaw, Mahal nga Hari, magmando kag ipatuman gid ini. Magmando ka nga sa sulod sang traynta ka adlaw wala sing pagatugotan nga magpangamuyo sing bisan ano sa bisan kay sin-o nga dios ukon sa bisan kay sin-o nga tawo luas sa imo, Mahal nga Hari. Ang bisan sin-o nga maglapas sini nga mando pagaihaboy sa lungib sang mga leon. 8Gani kon mahimo, Mahal nga Hari, maghimo ka sini nga mando kag pirmahi ini, kag ipatuman ini kaangay sang mga kasugoan sang mga Midianhon kag mga Persianhon, nga indi na maislan.” 9Gani si Haring Dario nagpirma sang mando. 10Pagkahibalo ni Daniel nga ang mando napirmahan na, nagpauli sia. Sa naibabaw nga kwarto sang iya balay may mga bintana nga nagaatubang sa Jerusalem. Subong sang ginahimo niya pirme nagluhod sia didto nga bukas ang mga bintana kag nagpangamuyo sa Dios sing tatlo ka beses sa isa ka adlaw.
11Dayon yadto nga mga tawo nagpanilag kay Daniel nga nagapangamuyo sa Dios, 12kag tanan sila nagkadto sa hari sa pagsumbong kay Daniel. Nagsiling sila, “Mahal nga Hari, nagpirma ka sang mando nga sa masunod nga traynta ka adlaw ang bisan sin-o nga magpangamuyo sing bisan ano sa kay bisan sin-o nga dios ukon tawo, luas sa imo, pagaihaboy sa lungib sang mga leon.”
Ang hari nagsabat, “Huo, isa ini ka mando nga dapat gid tumanon, kaangay ini sang mga kasugoan sang mga Midianhon kag mga Persianhon nga indi maislan.”
13Dayon nagsugid sila sa hari, “Si Daniel, ang isa ka bihag halin sa Juda, wala nagatahod sa imo, Mahal nga Hari, ukon nagatuman sang imo ginmando. Nagapangamuyo sia gihapon sing tatlo ka beses sa isa ka adlaw.”
14Sang pagkabati sang hari sini, natublag gid sia kag nagtinguha sia sa pagpangita sing paagi tubtob sa kahapunanon sa pagluwas kay Daniel. 15Dayon ang mga tawo nagbalik sa hari kag nagsiling sa iya, “Mahal nga Hari, nakahibalo ikaw nga suno sa mga kasugoan sang Media kag Persia, wala sing mando ang hari nga sarang maislan.”
16Dayon ang hari nagmando nga dakpon si Daniel kag ihaboy sa lungib sang mga leon. Nagsiling sia kay Daniel, “Kabay nga ang imo Dios nga imo ginaalagad sing matutom magluwas sa imo.” 17Nagkuha sila sing bato kag gintakop sa baba sang lungib. Ginmarkahan sang hari ang bato sang iya harianon nga selyo kag sang selyo sang iya dungganon nga mga tawo agod wala sing may makaluwas kay Daniel. 18Dayon ang hari nagbalik sa palasyo kag sa bilog nga gab-i wala sia magkaon ukon maghimo sang masunson niya nga ginahimo nga pagpangalipay. Indi gid sia makatulog.
19Sang kaagahon ang hari nagbangon kag nagdalidali pakadto sa lungib. 20Sang malapit na sia, nagsinggit sia sa daku nga kasubo, “Daniel, alagad sang buhi nga Dios! Naluwas bala ikaw sang Dios nga imo ginaalagad sing matutom gikan sa mga leon?”
21Si Daniel nagsabat, “Mahal nga Hari, kabay nga magkabuhi ka sa gihapon! 22Ang#Tob. 4:17; 12:14, 15. Dios nagpadala sang iya anghel sa pagpakipot sa mga baba sang leon agod nga indi nila ako maano. Ginhimo niya ini tungod kay nakahibalo sia nga wala ako sing sala, kag tungod kay wala ako sing malain nga nahimo sa imo, Mahal nga Hari.”
23Ang hari nalipay gid kag nagmando sia nga kuhaon si Daniel sa lungib. Gani ginkuha nila sia kag nakita nila nga wala gid sia maano kay nagsalig sia sa Dios. 24Dayon ang hari nagmando nga ang tanan nga mga tawo nga nagsumbong kay Daniel pagaihaboy sa lungib sang mga leon upod sa ila mga asawa kag mga kabataan. Wala pa gani sila makatupa sa idalom sang lungib, ang mga leon nagsalo na sa ila kag nag-usap sang ila mga tul-an.
25Dayon si Haring Dario nagsulat sa mga tawo sang tanan nga mga pungsod, rasa, kag linggwahe sa bug-os nga duta. Amo ini ang iya sulat:
“Pag-abiabi! 26Nagamando ako nga sa bug-os ko nga ginharian ang tanan magkahadlok kag magtahod sa Dios ni Daniel.
“Buhi sia nga Dios
kag magagahom sa walay katubtoban.
Ang iya ginharian indi gid malaglag,
kag ang iya gahom walay katapusan.
27Nagaluwas sia kag nagatabang,
nagahimo sia sing mga katingalahan kag mga milagro sa langit kag sa duta.
Ginluwas niya si Daniel sa gahom sang mga leon.”
28Si Daniel nag-uswag sang paghari ni Dario kag ni Ciro nga Persianhon.
Currently Selected:
Daniel 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
