Daniel 5
5
Si Belsasar Naghiwat sing Bangkite
1Isa ka gab-i si Haring Belsasar nag-agda sang 1,000 ka mga dungganon nga mga tawo sa isa ka daku nga bangkite, kag nag-ininom sila sang bino. 2Sang nagaininom sila, si Belsasar nagmando sa pagkuha sang mga kupa kag mga yahong nga pilak kag bulawan nga gindala sang iya amay#5:2 AMAY: May iban pa nga mga hari sang Babilonia halin kay Nabucodonosor tubtob kay Belsasar. Ang pulong ngaamay nga ginagamit diri nagakahulogan sang ginbuslan nga hari. nga si Nabucodonosor halin sa Templo sa Jerusalem. Ginpakuha ini sang hari agod nga sia, ang iya dungganon nga mga bisita, ang iya mga asawa, kag ang iya mga babayi, makainom sa amo nga ilimnan. 3Sa gilayon ang mga kupa kag mga yahong nga bulawan gindala sa ila kag ila ini gin-imnan. 4Nag-inom sila sang bino kag nagdayaw sa mga dios nga nahimo sa bulawan, pilak, bronsi, salsalon, kahoy kag bato.
5Sa hinali, may isa ka kamot sang tawo nga nagpakita kag nagsulat sa dingding sang palasyo sa diin ang suga masanag kaayo. Nakita sang hari ang kamot samtang nagasulat ini. 6Nagpalanglapsi sia, kag hinadlukan gid sa bagay nga ang iya mga tuhod nagkulurog. 7Nagsinggit sia nga dalhon sa iya ang mga madyikero, ang mga mangin-alamon, kag ang mga manugpakot. Sang pagsulod nila ang hari nagsiling sa ila, “Ang bisan sin-o nga makabasa sini nga sinulat kag makasugid sa akon kon ano ang kahulogan sini pabayuan ko sang granate nga bayu sang hari, pakulintasan ko sang bulawan nga kulintas sa pagpasidungog sa iya, kag mangin-ikatlo sa gahom sa ginharian.” 8Ang tanan nga mga palamangkutan sang hari nag-abot, pero wala sing isa sa ila nga makabasa sang sinulat ukon makasugid sa hari kon ano ang kahulogan sini. 9Gani si Haring Belsasar natublag kag nagpalanglapsi pa gid, kag ang iya mga dungganon nga mga opisyales indi makahibalo kon ano ang ila himuon.
10Ang rayna nga iloy sang hari nakabati sang kinagahod sang hari kag sang iya dungganon nga mga opisyales, gani nagsulod sia sa lugar nga ginahiwatan sang bangkite. Nagsiling sia, “Kabay nga magkabuhi ka sa gihapon, Mahal nga Hari! Kon mahimo indi ka magkatublag kag indi ka magpalanglapsi. 11May isa ka tawo sa imo ginharian nga may espiritu sang balaan nga mga dios.#5:11 mga dios: ukonDios. Amo man ini sa bersikulo 14. Sang hari pa ang imo amay, ini nga tawo nagpakita sing maayo nga panimuot, ihibalo, kag kaalam kaangay sang kaalam sang mga dios. Kag si Haring Nabucodonosor nga imo amay#5:11 imo amay: (Tan-awa ang 5:2). naghimo sa iya nga pangulo sang mga manughimalad, mga madyikero, mga mangin-alamon kag mga manugpakot. 12May pinasahi sia nga abilidad kag kaalam kag makahibalo sia magsaysay sang mga damgo, magsabat sang mga paktakon, kag magpaathag sang mga misteryo. Gani ipatawag ini nga tawo nga si Daniel nga ginhingalanan sang hari kay Beltesasar kag ipasaysay sa iya kon ano ang kahulogan sini tanan.”
Ginsaysay ni Daniel ang Nasulat sa Dingding
13Sa gilayon si Daniel gindala sa atubang sang hari. Ang hari nagsiling sa iya, “Ikaw bala si Daniel, ang isa sang mga bihag nga Judio nga gindala halin sa Judea sang akon amay nga hari? 14Nakabati ako nga ang espiritu sang mga dios yara sa imo kag ikaw may abilidad, ihibalo kag kaalam. 15Ang mga palamangkutan kag mga madyikero gindala diri sa pagbasa sang nasulat kag sugiran ako kon ano ang kahulogan sini, pero indi sila makahibalo. 16Karon nakabati ako nga mahibal-an mo ang tinago nga mga kahulogan kag makasaysay ka sang mga misteryo. Kon mabasa mo ini nga sinulat kag kon masugiran mo ako sang kahulogan sini, pabayuan ko ikaw sang granate nga bayu sang hari, pakulintasan ko ikaw sang kulintas nga bulawan sa pagpasidungog sa imo, kag mangin-ikatlo ka sa gahom sa ginharian.”
17Si Daniel nagsabat, “Dira na lang sa imo ang imo mga regalo, ukon ihatag ina sa iban. Pero basahon ko para sa imo, Mahal nga Hari, kon ano ang nasulat kag sugiran ko ikaw kon ano ang kahulogan sini.
18“Ang Labing Mataas nga Dios naghimo sa imo amay nga si Nabucodonosor nga isa ka gamhanan nga hari kag ginhatagan sia sing kadungganan kag pagkahalangdon. 19Tama sia ka gamhanan, gani ang mga tawo sang tanan nga mga pungsod, rasa, kag mga linggwahe nagkahadlok kag nagkurog sa iya. Kon gusto niya nga patyon ang isa ka tawo ginapatay niya, kon gusto niya nga mabuhi ang isa ka tawo iya ini ginahimo. Ginapasidunggan ukon ginapakahuy-an niya ang bisan sin-o nga gusto niya. 20Pero tungod nga nagbugalon sia kag nagpatig-a sang iya ulo, kag nagpamintas, ginpahalin sia sa pagkahari kag nadulaan sia sing kadungganan. 21Gintabog sia gikan sa katilingban sang mga tawo, kag ang iya panghunahuna nanginkaangay sang iya sang sapat. Nag-estar sia upod sa talunon nga mga asno, nagkaon sang hilamon kaangay sang baka, kag nagtulog sa wayang nga wala sing may makaapin sa iya sa tun-og. Sang ulihi ginkilala niya nga ang Labing Mataas nga Dios nagagahom sa tanan nga mga ginharian sang mga tawo, kag ginahimo niya nga hari ang bisan sin-o nga luyag niya.
22“Kag ikaw nga iya anak wala magpaubos sang imo kaugalingon, bisan nga nahibaluan mo ini tanan. 23Naghimo ka sang mga butang nga batok sa Ginoo sang langit, kag gindala mo diri ang mga kupa kag mga yahong nga ginkuha halin sa iya Templo. Ikaw, ang imo dungganon nga mga opisyales, ang imo mga asawa, kag ang imo mga babayi nag-inom sing bino sa sini nga mga gamit kag gindayaw ninyo ang mga dios nga nahimo sa bulawan, pilak, bronsi, salsalon, kahoy, kag bato—mga dios nga indi makabati, indi makakita kag indi makahibalo bisan ano. Pero wala mo ginpasidunggi ang Dios nga nagagahom sang imo kabuhi kag sang tanan nga imo ginahimo. 24Amo ini ang kabangdanan kon ngaa ang Dios nagpadala sang kamot sa pagsulat sini nga mga pulong.
25“Amo ini ang ginsulat: ‘Numero, numero, kabug-at, pagbahinbahin.’ 26Karon amo ini ang ila kahulogan: ang numero nagakahulogan nga ang Dios nag-isip na sang mga inadlaw sang imo ginharian kag gintapos na niya ini; 27ang kabug-at nagakahulogan nga gintimbang na ikaw kag nasapwan nga tama ikaw kamag-an, 28ang mga pagbahinbahin nagakahulogan nga ang imo ginharian ginbahinbahin na kag ginhatag ini sa mga Midianhon kag mga Persianhon.”#5:28 MGA PERSIANHON: Sa Aramico, ang pulong para sa “mga Persianhon” daw pareho sang pulong para sa “pagbahinbahin.”
29Sa gilayon si Belsasar nagmando sa iya mga tinawo nga pabayuan si Daniel sang granate nga bayu sang hari kag pakulintasan sang bulawan sa pagpasidungog sa iya. Kag ginhimo niya sia nga ikatlo sa gahom sa ginharian. 30Sa amo gid nga gab-i si Belsasar nga hari sa Babilonia ginpatay, 31kag si Dario nga Midianhon nag-agaw sang ginharian. Si Dario nagaedad na sing sesentay dos ka tuig.
Currently Selected:
Daniel 5: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
