2 Mga Hari 20
20
Ang Balatian ni Haring Ezequias kag ang Iya Pag-ayo
(Isa. 38:1-8, 21-22; 2 Cron. 32:24-26)
1Sa sadto man nga tion, si Haring Ezequias nagmasakit kag diutayan na lang mapatay. Ang propeta nga si Isaias nga anak ni Amoz nagkadto sa pagpakigkita sa iya kag nagsiling, “Ang Ginoo nagasiling nga husayon mo ang imo pagkabutang, tungod kay indi na ikaw mag-ayo. Maghanda ka kay ikaw mapatay.”
2Si Ezequias nag-atubang sa dingding kag nagpangamuyo: 3“O Ginoo, dumdoma nga nag-alagad ako sa imo sing matutom kag mainunongon, kag nagtinguha ako sa paghimo pirme sang luyag mo.” Kag naghilibion gid sia sing tudo.
4Naghalin si Isaias sa atubang sang hari, pero sa wala pa sia makaagi sa tunga nga pasiyuhan sang palasyo, ang Ginoo nagsiling sa iya 5sa pagbalik kay Ezequias, ang pangulo sang mga tawo sang Ginoo, kag singganon sia, “Ako ang Ginoo, ang Dios sang isa sang imo mga katigulangan nga si David, nakabati sang imo pangamuyo kag nakakita sang imo mga luha. Ayuhon ko ikaw, kag sa sulod sang tatlo ka adlaw magakadto ikaw sa Templo. 6Palawigon ko ang imo kabuhi sing kinse pa ka tuig. Luwason ko ikaw kag ining siudad sang Jerusalem gikan sa hari sang Asiria. Apinan ko ining siudad, para sa akon kadungganan kag tungod sang ginsaad ko sa akon alagad nga si David.”
7Dayon si Isaias nagsiling sa mga suloguon sang hari nga hampulan sang binukbok nga higos ang hubag sang hari kag sia magaayo.#20:7 Ang isa ka dumaan nga pagbadbad (kag tan-awa ang Isa. 38:21) hampulan sang binukbok nga higos ang hubag sang hari kag sia magaayo; sa Hebreohampulan sing binukbok nga higos ang hubag sang hari. Ginhimo nila ini kag nag-ayo sia. 8Nagpamangkot si Haring Ezequias, “Ano ang tanda sa pagpamatuod nga ang Ginoo magaayo sa akon kag sa sulod sang tatlo ka adlaw makakadto ako sa Templo?”
9Nagsabat si Isaias, “Ang Ginoo magahatag sa imo sang tanda sa pagpamatuod nga sia magatuman sang iya saad. Karon, luyag mo bala nga ang landong sa hagdanan magaabanse sing napulo ka halintang ukon magaisol sing napulo ka halintang?”#20:9 hagdanan…halintang…: ukonorasan magaabanse sa ika-10 nga gutlo ukonmagaisol sa ika-10 nga gutlo.
10Si Ezequias nagsabat, “Mahapos nga mag-abanse ang landong sing napulo ka gutlo! Pero paisula ini sing napulo ka gutlo.”
11Nagpangamuyo si Isaias sa Ginoo, kag ginpabalik sang Ginoo ang landong sing napulo ka halintang sa hagdanan#20:11 hagdanan: ukonorasan. nga ginpatindog ni Haring Acaz.
Mga Embahador halin sa Babilonia
(Isa. 39:1-8)
12Sa sadto man nga tion ang hari sang Babilonia nga si Merodac-baladan nga anak ni Baladan, nakabati nga si Haring Ezequias nagmasakit, gani nagpadala sia sing sulat kag regalo sa iya. 13Gin-abiabi ni Ezequias ang mga mensahero kag ginpakita sa ila ang iya tanan nga manggad—ang iya pilak kag bulawan, ang iya mga agwa kag mga pahamot, kag ang tanan niya nga mga gamit sa inaway. Wala sing pagkabutang nga yara sa iya mga talaguan ukon bisan diin nga bahin sang iya ginharian nga wala niya ginpakita sa ila. 14Dayon si Isaias nga propeta nagkadto kay Haring Ezequias kag nagpamangkot, “Diin maghalin ini nga mga tawo, kag ano ang ila ginsiling sa imo?”
Si Ezequias nagsabat, “Naghalin sila sa malayo nga pungsod, sa Babilonia.”
15“Ano ang ila nakita sa palasyo?”
“Nakita nila ang tanan. Wala sing pagkabutang nga yara sa mga talaguan nga wala ko pag-ipakita sa ila.”
16Dayon si Isaias nagsiling sa hari, “Ang Ginoo nagasiling nga 17ang#2 Hari 24:13; 2 Cron. 36:10. tion magaabot nga ang tanan nga mga butang sa imo palasyo, ang tanan nga mga butang nga gintago sang imo mga katigulangan tubtob sini nga adlaw, pagadalhon sa Babilonia. Wala sing mabilin. 18Ang#2 Hari 24:14-15; Dan. 1:1-7. iban sang imo mga kaliwat pagabihagon kag pagakapunon sa pag-alagad sa palasyo sang hari sang Babilonia.”
19Si Haring Ezequias naghangop sini nga may paghidait kag kalig-unan sa iya panahon, gani nagsiling sia, “Ang mga pulong nga imo ginhatag sa akon nga gikan sa Ginoo maayo.”
Ang Katapusan sang Paggahom ni Ezequias
(2 Cron. 32:32-33)
20Ang tanan nga ginhimo ni Haring Ezequias, ang iya bantog nga mga binuhatan, kag ang iya paghimo sing pulondohan sang tubig kag ang pagpakutkot sang kanal sa pagdala sang tubig sa siudad, nasulat ini tanan sa Maragtas sang mga Hari sang Juda. 21Si Ezequias napatay, kag ang iya anak nga si Manases nagbulos sa iya subong hari.
Currently Selected:
2 Mga Hari 20: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
