2 Mga Hari 21
21
Si Haring Manases sang Juda
(2 Cron. 33:1-20)
1Si Manases nagaedad sing dose ka tuig sang paghari niya sa Juda, kag naggahom sia sa Jerusalem sa sulod sang singkwentay-singko ka tuig. Ang iya iloy amo si Hefziba. 2Nagpakasala#Jer. 15:4. sia batok sa Ginoo paagi sa iya pagsunod sa makahuloya nga mga butang nga ginhimo sang mga pungsod nga gintabog sang Ginoo paggwa samtang ang iya mga tawo nagapasulod sa duta. 3Ginpatindog liwat ni Manases ang mga lugar sa diin ginsimba ang mga diosdios nga ginguba sang iya amay nga si Ezequias. Nagpatindog sia sing mga altar nga ginasimbahan kay Baal, kag naghimo sang imahen sang diosa nga si Asera, subong sang ginhimo ni Haring Acab sang Israel. Si Manases nagsimba man sa mga bituon. 4Nagpatindog#2 Sam. 7:13. sia sang mga altar para sa mga diosdios sa Templo, ang lugar sa diin ang Ginoo nagsiling nga sia pagasimbahon. 5Sa duha ka pasiyuhan sang Templo nagpatindog sia sang mga altar agod simbahan sing mga bituon. 6Gindulot niya ang iya anak nga lalaki subong halad nga sinunog. Naghimo sia sang mga bulohaton sang mga salamangkero kag sang mga babaylan, kag nagpamangkot sia sa mga manugpakot kag sa mga espiritista.#21:6 nagpamangkot sia…espiritista: ukonginpabalik niya ang mga manugpakot kag ang mga espiritista. Nagpakasala sia sing daku kag ginpaakig ang Ginoo. 7Ginbutang#1 Hari 9:3-5; 2 Cron. 7:12-18. niya sa Templo ang imahen sang diosa nga si Asera sa lugar diin ang Ginoo nagsiling kay David kag sa iya anak nga si Solomon: “Diri sa Jerusalem, sa sini nga Templo amo ang lugar nga akon ginpili sa bug-os nga kadutaan sang dose ka tribo sang Israel subong isa ka lugar sa diin ako pagasimbahon. 8Kag kon ang mga tawo sang Israel magtuman sang akon tanan nga mga sugo, kag maghimo sang bug-os nga Kasugoan nga ginhatag sa ila ni Moises nga akon alagad, dayon indi ako magtugot nga tabugon sila paggwa sa duta nga ginhatag ko sa ila mga katigulangan.” 9Pero ang mga tawo sang Juda wala magtuman sa Ginoo, kag si Manases nagpangulo sa ila sa paghimo sang mas dalagku pa nga mga sala sang sa ginhimo sang mga kapungsoran nga gintabog sang Ginoo paggwa samtang ang iya mga tawo nagapasulod sa duta.
10Paagi sa iya mga alagad kag mga propeta ang Ginoo nagsiling, 11“Si Haring Manases naghimo sining makahuloya nga mga butang, nga mas malain pa sang sa ginhimo sang mga Canaanhon, kag paagi sa iya mga diosdios gindala niya ang mga tawo sang Juda sa pagpakasala. 12Gani ako, ang Ginoo ang Dios sang Israel, magapadala sining kalalat-an sa Jerusalem kag sa Juda nga ang tagsatagsa nga makabati nahanungod sini maurongan. 13Silutan ko ang Jerusalem subong sang akon ginhimo sa Samaria, kag subong sang akon ginhimo kay haring Acab sang Israel kag sa iya mga kaliwat. Pagatinluan ko ang Jerusalem sing iya mga tawo subong katinlo sang pinggan nga ginpahiran kag ginpakulob. 14Patumbayaan ko ang mga tawo nga nagkalabilin nga buhi, kag itugyan ko sila sa ila mga kaaway, nga magadaog sa ila kag magaagaw sang mga pagkabutang sang ila duta. 15Himuon ko ini sa akon mga tawo tungod kay nagpakasala sila batok sa akon kag nagpaakig sa akon, halin sang tion nga ang ila mga katigulangan naggwa sa Ehipto tubtob sini nga adlaw.”
16Si Manases nagpamatay sang madamo nga mga tawo nga wala sing sala, kag ang mga dalan sa Jerusalem nagbaha sang dugo. Ginhimo niya ini wala labot sang pagdala niya sang mga tawo sang Juda sa pagsimba sa mga diosdios kag pagpakasala batok sa Ginoo.
17Ang tanan nga mga butang nga ginhimo ni Manases, lakip ang mga sala nga ginhimo niya nasulat sa Maragtas sang mga Hari sang Juda. 18Si Manases napatay kag ginlubong sa hardin sang palasyo, ang hardin ni Uza, kag ang iya anak nga si Amon nagbulos sa iya subong hari.
Si Haring Amon sang Juda
(2 Cron. 33:21-25)
19Si Amon nagaedad sang baynte-dos ka tuig sang paghari niya sa Juda, kag naggahom sia sa Jerusalem sa sulod sang duha ka tuig. Ang iya iloy amo si Mesulemet, ang anak ni Haruz, halin sa banwa sang Jotba. 20Kaangay sang iya amay nga si Manases nagpakasala sia batok sa Ginoo. 21Ginsunod niya ang mga ginhimo sang iya amay, kag nagsimba sia sa mga diosdios nga ginsimba sang iya amay. 22Ginsikway niya ang Ginoo, ang Dios sang iya mga katigulangan kag wala sia magtuman sa mga sugo sang Ginoo.
23Ang mga opisyales ni Amon nagplano batok sa iya kag ginpatay sia sa iya palasyo. 24Pero ang mga tawo sang Juda nagpatay man sang mga nagpatay sa iya, kag ginhimo ang iya anak nga si Josias subong hari.
25Ang tanan nga ginhimo ni Amon nasulat sa Maragtas sang mga Hari sang Juda. 26Si Amon ginlubong sa lulobngan sa hardin ni Uza, kag ang iya anak nga si Josias nagbulos sa iya subong hari.
Currently Selected:
2 Mga Hari 21: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
