2 Mga Hari 14
14
Si Haring Amasias sang Juda
(2 Cron. 25:1-24)
1Sa ikaduha nga tuig sang paggahom ni Jehoas nga anak ni Joacaz subong hari sang Israel, si Amasias nga anak ni Joas nanginhari sang Juda. 2Nagaedad sia sing baynte-singko ka tuig, kag naggahom sia sa Jerusalem sa sulod sing baynte-nwebe ka tuig. Ang iya iloy amo si Jehoadin nga taga-Jerusalem. 3Naghimo sia sing matarong sa panulok sang Ginoo, pero indi sia pareho sang isa sang iya mga katigulangan nga si Haring David, sa baylo ginhimo niya ang ginhimo sang iya amay nga si Joas. 4Wala niya pagpanggub-a ang mga altar nga ginasimbahan sa mga diosdios, kag ang mga tawo nagpadayon sa pagdulot sing mga halad kag sa pagsunog sing insyenso sa sini nga mga altar.
5Sang malig-on na ang paggahom ni Amasias, ginpapatay niya ang mga opisyales nga nagpatay sang iya amay nga hari. 6Walay#Deut. 24:16. sapayan sini, wala niya pagpamatya ang ila mga kabataan kundi ginsunod niya ang ginmando sang Ginoo sa Kasugoan ni Moises nga nagasiling: “Ang mga ginikanan indi pagpamatyon tungod sang mga sala sang ila mga kabataan, kag ang mga kabataan indi pagpamatyon tungod sang mga sala sang ila mga ginikanan. Ang tawo pagapatyon lamang tungod sang iya nahimo nga sala.”
7Si Amasias nagpamatay sing 10,000 ka Edomnon nga mga hangaway sa Kapatagan sang Asin. Gin-agaw niya ang Siudad sang Sela sa inaway, kag ginhingalanan ini nga Jocteel tubtob sini nga adlaw.
8Dayon si Amasias nagpadala sing mga mensahero kay Haring Jehoas sang Israel, nga nagahangkat sa iya sa pag-away#14:8 nagahangkat sa iya sa pag-away: ukonnagaagda sa iya sa isa ka sinapol. 9Pero si Haring Jehoas nagpadala pabalik sini nga sabat: “Sang una, sa Kabukiran sang Libano, ang talungon nagpadala sing mensahe sa kahoy nga sedro: ‘Ipaasawa ang imo anak nga babayi sa akon anak nga lalaki.’ Ang isa ka sapat nga talunon nakaagi kag gintasak ang talungon. 10Karon ikaw, Amasias, naglutos sang mga Edomnon, kag nagpabugal ka. Magkuntento ka sang imo pagkabantog, kag magpabilin sa imo balay. Ngaa magtuga ka sing kagamo nga magadala lamang sing kalalat-an sa imo kag sa imo mga tawo?”
11Pero si Amasias indi magpamati, gani si Haring Jehoas naglakat upod sa iya mga tinawo kag nagpakig-away kay Haring Amasias sa Bet-semes sa Juda. 12Ang mga hangaway ni Amasias nalutos, kag ang tanan niya nga mga soldado nagpalagyo pauli sa ila mga balay. 13Gindakop ni Jehoas si Amasias, nagpadayon sia sa Jerusalem kag ginguba ang pader halin sa Pwerta sang Efraim pakadto sa Pamusod nga Pwerta nga may kalayuon nga 200 ka yarda. 14Ginkuha niya ang tanan nga pilak kag bulawan nga iya makita, ang tanan nga mga galamiton sa Templo kag ang tanan nga manggad sang palasyo, kag gindala pabalik sa Samaria. Gindala man niya ang mga bihag upod sa iya.
15Ang tanan nga ginhimo ni Jehoas, lakip ang iya kaisog sa inaway batok kay Haring Amasias sang Juda, nasulat sa Maragtas sang mga Hari sang Israel. 16Si Jehoas napatay kag ginlubong sa lulobngan sang mga hari sa Samaria, kag ang iya anak nga si Jeroboam II nagbulos sa iya subong hari.
Ang Pagkapatay ni Haring Amasias sang Juda
(2 Cron. 25:25-28)
17Si Haring Amasias sang Juda nagkabuhi sing kinse pa ka tuig sa tapos nga mapatay si Jehoas nga hari sang Israel. 18Ang tanan nga ginhimo ni Amasias nasulat sa Maragtas sang mga Hari sang Juda.
19May isa ka pagplano sa Jerusalem sa pagpatay kay Amasias, gani nagpalagyo sia sa siudad sang Lakis, pero ang iya mga kaaway nagsunod sa iya didto kag ginpatay sia. 20Ang iya bangkay ginbalik sa Jerusalem nga nakarga sa kabayo, kag ginlubong didto sa mga lulobngan sang mga hari sa Siudad ni David. 21Dayon ang mga tawo sang Juda nagkorona subong hari kay Uzias ang iya anak nga nagaedad sang desi-sais ka tuig. 22Gin-agaw kag ginpatindog liwat ni Uzias ang Elat sa tapos mapatay ang iya amay.
Si Haring Jeroboam II sang Israel
23Sa ika-15 nga tuig sang paggahom ni Amasias nga anak ni Joas subong hari sang Juda, si Jeroboam nga anak ni Jehoas nanginhari sang Israel, kag naggahom sia sa Samaria sa sulod sang kwarentay-uno ka tuig. 24Nagpakasala sia batok sa Ginoo, nagsunod sa mga malaut nga ginhimo ni Haring Jeroboam nga anak ni Nebat, nga nagdala sang Israel sa pagpakasala. 25Ginbawi#Jon. 1:1. niya ang tanan nga kadutaan sang Israel, halin sa Alagyan sang Hamat sa naaminhan pakadto sa Patay nga Dagat sa nabagatnan. Amo ini ang ginsaad sang Ginoo, ang Dios sang Israel paagi sa iya alagad nga propeta nga si Jonas, anak ni Amitai nga taga-Gat-heper.
26Nakita sang Ginoo ang tama kapait#14:26 Ang iban nga dumaan nga mga pagbadbadtama kapait; sa Hebreomabinatuon. nga pag-antos sang mga Israelinhon. Wala gid sing isa nga makatabang sa ila. 27Pero ang katuyoan sang Ginoo sa mga Israelinhon indi ang paglaglag sa ila sing bug-os kag wala sing katapusan, gani, ginluwas niya sila paagi kay Haring Jeroboam II.
28Ang tanan nga ginhimo ni Jeroboam II, ang iya kaisog sa mga inaway, ang pagpabalik niya sang Damasco kag Hamat sa Israel,#14:28 Ang isa ka dumaan nga pagbadbadsa Israel; sa Hebreopara sa Juda sa Israel. nasulat sa Maragtas sang mga Hari sang Israel. 29Napatay si Jeroboam kag ginlubong sa mga lulobngan sang mga hari, kag ang iya anak nga si Zacarias nagbulos sa iya subong hari.
Currently Selected:
2 Mga Hari 14: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
