2 Mga Hari 15
15
Si Haring Uzias sang Juda
(2 Cron. 26:1-23)
1Sa ika-27 nga tuig sang paggahom ni Haring Jeroboam II sang Israel, si Uzias nga anak ni Amasias nanginhari sang Juda. 2Nagaedad sia sing desi-sais ka tuig, kag naggahom sia sa Jerusalem sa sulod sang singkwentay-dos ka tuig. Ang iya iloy amo si Jecolia nga taga-Jerusalem. 3Ginhimo niya ang matarong sa panulok sang Ginoo kag nagsunod sia sa ginhimo sang iya amay. 4Pero ang mga lugar sa diin ginasimba ang mga diosdios wala malaglag kag ang mga tawo nagpadayon sa pagdulot sing mga halad kag sa pagsunog sing insyenso sa sini nga mga lugar. 5Ang Ginoo naghatag kay Uzias sang balatian sa panit nga makalalaton nga wala mag-ayo tubtob sa iya kamatayon. Nag-estar sia sa separado nga balay nga hilway sa iya tanan nga mga katungdanan, samtang ang iya anak nga si Jotam amo ang naggahom sa pungsod.
6Ang tanan nga ginhimo ni Uzias nasulat sa Maragtas sang mga Hari sang Juda. 7Napatay#Isa. 6:1. si Uzias kag ginlubong sa mga lulobngan sang mga hari sa Siudad ni David, kag ang iya anak nga si Jotam nagbulos sa iya subong hari.
Si Haring Zacarias sang Israel
8Sa ika-38 nga tuig sang paggahom ni Haring Uzias sang Juda, si Zacarias nga anak ni Jeroboam II nanginhari sang Israel, kag naggahom sia sa Samaria sa sulod sang anom ka bulan. 9Kaangay sang mga hari nga una sa iya, nagpakasala sia batok sa Ginoo. Ginsunod niya ang malaut nga ginhimo ni Haring Jeroboam nga anak ni Nebat, nga nagdala sa Israel sa pagpakasala. 10Si Sallum nga anak ni Jabes nagplano batok kay Haring Zacarias, ginpatay niya sia sa Ibleam,#15:10 Ang isa ka dumaan nga pagbadbadsa Ibleam; sa Hebreosa atubang sang mga tawo. kag nagbulos sa iya subong hari.
11Ang tanan nga ginhimo ni Zacarias nasulat sa Maragtas sang mga Hari sang Israel.
12Gani#2 Hari 10:30. natuman ang saad nga ginhimo sang Ginoo sa kay Haring Jehu nga nagasiling: “Ang imo mga kaliwat tubtob sa ikap-at nga kaliwatan.#15:12 IKAP-AT NGA KALIWATAN: Si Zacarias apo sa tuhod ni Jehu. magahari sa Israel.”
Si Haring Sallum sang Israel
13Sa ika-39 nga tuig sang paggahom ni Haring Uzias sang Juda, si Sallum nga anak ni Jabes nanginhari sang Israel, kag naggahom sia sa Samaria sa sulod sang isa ka bulan.
14Si Menahem nga anak ni Gadi naghalin sa Tirsa pakadto sa Samaria, ginpatay niya si Sallum kag ginbuslan subong hari. 15Ang tanan nga ginhimo ni Sallum, lakip ang iya pagplano batok sa hari, nasulat sa Maragtas sang mga Hari sang Israel. 16Samtang nagalakat si Menahem halin sa Tirsa, ginlaglag niya sing bug-os ang siudad sang Tappua,#15:16 Ang isa ka dumaan nga pagbadbadTappua; sa HebreoTipsa. ang mga pumoluyo sini, kag ang kadutaan palibot, tungod kay wala nila sia ginpasulod sa siudad. Iya pa gani ginririan ang tiyan sang tanan nga mga babayi nga nagabusong.
Si Haring Menahem sang Israel
17Sa ika-39 nga tuig sang paggahom ni Haring Uzias sang Juda, si Menahem nga anak ni Gadi nanginhari sang Israel, kag naggahom sia sa Samaria sa sulod sang napulo ka tuig. 18Nagpakasala sia batok sa Ginoo tubtob sa iya kamatayon, tungod kay nagsunod sia sa mga malaut nga ginhimo ni Haring Jeroboam nga anak ni Nebat, nga nagdala sang Israel sa pagpakasala. 19Si Tiglat-piliser nga hari sang Asiria naggubat sang Israel kag si Menahem naghatag sa iya sing trayntay-otso ka tonelada nga pilak agod si Tiglat-piliser magbulig palig-on sang iya gahom sa bug-os nga pungsod. 20Si Menahem nagkuha sini nga mga pilak sa manggaranon nga mga tawo sang Israel paagi sa pagpilit sa tagsatagsa sa ila sa pag-amot sing singkwenta ka bilog nga pilak. Gani si Tiglat-piliser nagbalik sa iya kaugalingon nga pungsod.
21Ang tanan nga ginhimo ni Menahem nasulat sa Maragtas sang mga Hari sang Israel. 22Napatay sia kag ginlubong, kag ang iya anak nga si Pecaya nagbulos sa iya subong hari.
Si Haring Pecaya sang Israel
23Sa ika-50 nga tuig sang paggahom ni Haring Uzias sang Juda, si Pecaya nga anak ni Menahem nanginhari sang Israel, kag naggahom sia sa Samaria sa sulod sang duha ka tuig. 24Nagpakasala sia batok sa Ginoo, nagsunod sa malaut nga ginhimo ni Haring Jeroboam nga anak ni Nebat, nga nagdala sa Israel sa pagpakasala. 25Ang isa ka opisyal sang mga hangaway ni Pecaya nga si Peca nga anak ni Remalias, nagplano batok sa hari upod sa singkwenta ka lalaki halin sa Galaad. Ginpatay nila si Pecaya sa nasulod nga pamakod sang palasyo sa Samaria, kag nagbulos si Reca sa iya subong hari.
26Ang tanan nga ginhimo ni Pecaya nasulat sa Maragtas sang mga Hari sang Israel.
Si Haring Peca sang Israel
27Sa ika-52 nga tuig sang paggahom ni Haring Uzias sang Juda, si Peca nga anak ni Remalias nanginhari sang Israel, kag naggahom sia sa Samaria sa sulod sang baynte ka tuig. 28Nagpakasala sia batok sa Ginoo, nagsunod sa malaut nga ginhimo ni Haring Jeroboam nga anak ni Nebat, nga nagdala sa Israel sa pagpakasala.
29Sa panahon nga si Peca amo ang hari, si Tiglat-piliser, ang hari sang Asiria nag-agaw sang mga siudad sang Ijon, Abel-Bet-Maaca, Janoa, Kedes, kag Hasor, kag ang mga kadutaan sang Galaad, Galilea, kag Neftali, kag gindala ang mga tawo sa Asiria subong mga bihag.
30Sa ika-20 nga tuig sang paggahom ni Jotam nga anak ni Uzias subong hari sang Juda, si Oseas nga anak ni Ela nagplano batok kay Haring Peca, ginpatay kag ginbuslan sia subong hari. 31Ang tanan nga ginhimo ni Peca nasulat sa Maragtas sang mga Hari sang Israel.
Si Haring Jotam sang Juda
(2 Cron. 27:1-9)
32Sa ikaduha nga tuig sang paggahom ni Peca nga anak ni Remalias subong hari sang Israel, si Jotam nga anak ni Uzias nanginhari sang Juda. 33Nagaedad sia sing baynte-singko ka tuig kag naggahom sia sa Jerusalem sa sulod sang desi-sais ka tuig. Ang iya iloy amo si Jerusa nga anak ni Sadoc. 34Si Jotam nga naghimo sing matarong sa panulok sang Ginoo, nagsunod sa ginhimo sang iya amay nga si Uzias. 35Pero ang mga lugar sa diin ginasimba ang mga diosdios wala niya paglaglaga, kag ang mga tawo nagpadayon sa pagdulot sing mga halad kag nagsunog sing insyenso sa sini nga mga lugar. Si Jotam amo ang nagpatindog sang Naaminhan nga Pwerta sang Templo.
36Ang tanan nga ginhimo ni Jotam nasulat sa Maragtas sang mga Hari sang Juda. 37Sa panahon sang iya anay paghari ginpadala sang Ginoo si Haring Rezin sang Siria kag Haring Peca sang Israel sa pagsalakay sang Juda. 38Si Jotam napatay kag ginlubong sa mga lulobngan sang mga hari sa Siudad ni David, kag ang iya anak nga si Acaz nagbulos sa iya subong hari.
Currently Selected:
2 Mga Hari 15: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
