2 Mga Hari 13
13
Si Haring Joacaz sang Israel
1Sa ika-23 nga tuig sang paggahom ni Joas nga anak ni Ocozias subong hari sang Juda, si Joacaz nga anak ni Jehu nanginhari sang Israel, kag naggahom sia sa Samaria sa sulod sang desi-siete ka tuig. 2Kaangay kay Haring Jeroboam nga nauna sa iya, nagpakasala sia sa Ginoo, kag gindala niya ang Israel sa pagpakasala. Wala gid siya magbiya sa malaut niya nga mga pagginawi. 3Gani ang Ginoo naakig sa Israel, kag gintugotan niya si Haring Hazael sang Siria kag ang iya anak nga si Benhadad sa paglutos sa Israel sa tagsa ka pagsalakay sa ila. 4Dayon si Joacaz nagpangamuyo sa Ginoo, kag ang Ginoo nga nakakita kon daw ano ang pagpigos sang hari sang Siria sa mga Israelinhon, nagsabat sa iya pangamuyo. 5Ang Ginoo nagpadala sing isa ka pangulo sa Israel, nga naghilway sa ila sa mga Sirianhon, kag gani ang mga Israelinhon nag-estar sing malinong subong sang una. 6Pero wala nila gihapon ginsikway ang mga sala nga ginhimo nila sa pagpangulo ni Jeroboam nga hari sa Israel, kundi nagpadayon sila#13:6 Ang iban nga dumaan nga mga pagbadbadnagpadayon sila; sa Hebreonagpadayon sia. sa paghimo sini, kag ang imahen sang diosa nga si Asera nagpabilin sa Samaria.
7Si Joacaz wala sing nabilin nga mga hangaway luas lamang sa singkwenta ka manugkabayo, napulo ka mga karwahi, kag 10,000 ka mga soldado nga nagalakat lang, tungod kay ang hari sang Siria naglaglag sang nabilin kag gintasak sila kaangay sang yab-ok.
8Ang tanan nga ginhimo ni Joacaz, kag ang tanan nga bantog nga mga hinimuan niya nasulat sa Maragtas sang mga Hari sang Israel. 9Napatay sia kag ginlubong sa Samaria, kag ang iya anak nga si Jehoas nagbulos sa iya subong hari.
Si Haring Jehoas sang Israel
10Sa ika-37 nga tuig sang paggahom ni Joas nga hari sang Juda, si Jehoas nga anak ni Joacaz nanginhari sang Israel, kag naggahom sia sa Samaria sa sulod sang desi-sais ka tuig. 11Nagpakasala man sia batok sa Ginoo kag nagsunod sa malaut nga pagginawi ni Haring Jeroboam, nga nagdala sang Israel sa pagpakasala. 12Ang iban pa gid nga hinimuan ni Jehoas, lakip ang iya kaisog batok sa pag-away kay Haring Amasias sang Juda ginsulat sa Maragtas sang mga Hari sang Israel. 13Si Jehoas napatay kag ginlubong sa lulobngan sang mga hari sa Samaria, kag ang iya anak nga si Jeroboam II nagbulos sa iya subong hari.
Ang Pagkapatay ni Eliseo
14Si#2 Hari 2:12. Eliseo nga propeta nagbalatian sang grabe kag sang tagumatayon sia, si Haring Jehoas sang Israel nagbisita sa iya. Naghibi sia kag nagsiling, “O amay ko! Amay ko! Ikaw nangingamhanan nga manug-apin sang Israel!”
15Si Eliseo nagsugo sa iya, “Kuha ka sing pana kag mga baslay.” Nagkuha si Jehoas sini, 16kag si Eliseo nagsiling sa iya nga maghanda sa pagpana. Gintuman ini sang hari, kag si Eliseo nagbutang sang iya mga kamot sa mga kamot sang hari. 17Dayon, sa pagtuman sang mga sugo sang propeta, gin-abrihan niya ang bintana nga nagaatubang sa Siria. Nagsugo si Eliseo, “Magpana ka!” Sa tapos nga makapana ang hari, ang propeta nagsiling, “Ikaw amo ang pana sang Ginoo, nga paagi sini dag-on niya ang Siria. Magapakig-away ka sa mga Sirianhon sa Afec tubtob nga lutoson mo sila.”
18Dayon si Eliseo nagsugo sa hari sa pagkuha pa gid sang iban nga mga baslay kag itibsok ini sa duta. Gintibsok ini sang hari sa duta sing tatlo ka beses kag dayon nag-untat. 19Naakig si Eliseo sini, kag nagsiling sia sa hari, “Kuntani gintibsok mo ini sing lima ukon anom ka beses, kag dayon may bug-os ikaw nga pagdaog sa mga Sirianhon pero karon lutoson mo lang sila sing tatlo ka beses.”
20Napatay si Eliseo kag ginlubong.
Sa tagsa ka tuig ginagubat sang mga Moabnon ang duta sang Israel. 21Sang isa ka tion, sa tion sang paglubong, nakita nila ang mga nagapanggubat, kag ginhaboy sang mga tawo ang bangkay sa lulobngan ni Eliseo kag nagpalagyo.#13:21 Ang isa ka dumaan nga pagbadbadkag nagpalagyo; sa Hebreokag nagpalagyo sia. Sang pagduot sang bangkay sa mga tul-an ni Eliseo, ang tawo nabuhi kag nagtindog.
Ang Inaway sa Tunga sang Israel kag Siria
22Sa bug-os nga panahon sang paghari ni Joacaz si Haring Hazael sang Siria nagpigos sa mga Israelinhon, 23pero ang Ginoo nanginmaayo kag nagkaluoy sa ila. Tungod sang iya kasugtanan kay Abraham, kay Isaac kag kay Jacob ginbuligan niya sila kag indi sia luyag nga malaglag sila. Wala gid niya ginsikway ang iya mga tawo.
24Sang pagkapatay ni Hazael nga hari sang Siria, ang iya anak nga si Benhadad nanginhari. 25Dayon si Haring Joacaz sang Israel naglutos kay Benhadad sing makatlo, kag ginbawi niya ang mga siudad nga gin-agaw anay ni Benhadad sa tion sang paggahom ni Jehoahas, nga amay ni Jehoas.
Currently Selected:
2 Mga Hari 13: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
