2 Mga Taga-Corinto 10
10
Si Pablo Nagapangapin sang Iya Pag-alagad
1Ako, si Pablo, nagapangabay gid sa inyo. Ginakabig ako nga mapainuboson kon yara dira sa inyo pero maisog kon malayo sa inyo. Tungod sang pagkamapainuboson kag pagkalulo ni Cristo, 2nagapakitluoy ako sa inyo nga indi ninyo ako pagpilita sa paghambal sing masakit kon mag-abot ako dira, kay siguro gid nga sarang ako makahambal sing masakit sa mga nagasiling nga ang amon tinutuyo sa pagpangabudlay kalibutanon. 3Matuod nga nagakabuhi kami sa kalibutan, pero ang amon mga tinutuyo sa pagpakig-away indi kalibutanon. 4Ang mga armas nga amon ginagamit sa pagpakig-away indi iya sang kalibutan, kundi iya sang Dios, kag ini may gahom sa pagguba sang mga pamakod sang kaaway. Ginaguba namon ang indi matuod nga mga rason. 5Ginarumpag namon ang tagsa ka upang nga ginagamit sang bugalon nga mga tawo batok sa pagkilala sa Dios. Ginabihag namon ang tagsa ka panghunahuna kag ginahimo namon ini nga magtuman kay Cristo. 6Kag sa tapos nga napamatud-an ninyo ang inyo bug-os nga pagkamatinumanon, handa kami sa pagsilot sang bisan ano nga buhat sang pagkadi-matinumanon.
7Ang inyo ginatan-aw amo lamang ang mga butang nga yara sa gwa. Kon may yara sa inyo nga nagakabig sang iya kaugalingon nga iya sia ni Cristo, dapat niya dumdomon nga sa amo man nga bagay kami iya man ni Cristo. 8Kay wala ako nahuya, bisan nga daw sobra ang akon pagpabugal sang awtoridad nga ginhatag sa amon sang Ginoo—ini nga awtoridad nagapalig-on sa inyo, kag wala nagaguba sa inyo. 9Indi ako gusto nga maghunahuna kamo nga ginapahog ko kamo sang akon mga sulat. 10May isa nga magasiling, “Ang mga sulat ni Pablo masakit kag gamhanan, pero kon yari sia diri sa aton maluya sia kag wala gid sing pulos ang iya mga ginapanghambal!” 11Dapat mahibaluan sina nga tawo nga kon ano man ang amon mga ginasulat kon malayo kami, amo man ina ang amon himuon kon yara kami dira sa inyo.
12Kay indi kami amon makahimo sa pagkabig sang amon kaugalingon pareho sa iban, ukon sa pagpaanggid sang amon kaugalingon sa iban nga nagadayaw sang ila kaugalingon sing tama gid. Mga buangbuang sila! Sila lang ang nagahimo sang ila mga talaksan sa pagtakos sang ila kaugalingon, kag nagahukom sang ila kaugalingon sa ila mga talaksan! 13Pero kon parti sa amon, ang amon pagpabugal wala nagasobra sa nagakaigo nga dulonan, kundi suno lamang sa dulonan sang bulohaton nga ginpat-od sang Dios sa amon, kag ina nagalakip sang amon hilikuton sa inyo. 14Kag tungod nga nasakop kamo sina nga dulonan, wala kami nagpanglakbang sang pagkadto namon dira sa inyo, nga nagadala sang Maayong Balita nahanungod kay Cristo. 15Gani wala kami nagapabugal sang hilikuton nga nahimo sang iban sa gwa sang dulonan nga ginpat-od sang Dios sa amon. Sa baylo, nagalaom kami nga ang inyo pagtuo magtubo, kag kami makahimo sing mas daku pa gid nga hilikuton dira sa inyo, pirme sa sulod sang dulonan nga ginpat-od sang Dios. 16Dayon makawali kami sang Maayong Balita sa iban nga mga pungsod sa unhan sang Corinto kag indi kami dapat magpabugal sang hilikuton nga nahimo na sa palangabudlayan sang iban nga tawo.
17Pero#Jer. 9:24. subong sang ginasiling sang kasulatan, “Ang bisan sin-o nga luyag magpabugal, dapat magpabugal sang nahimo sang Ginoo.” 18Kay indi ang tawo nga nagadayaw sang iya kaugalingon ang ginabaton sang Dios, kundi ang tawo nga ginadayaw sang Ginoo.
Currently Selected:
2 Mga Taga-Corinto 10: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
