2 Mga Taga-Corinto 11
11
Si Pablo kag ang Indi Matuod nga mga Apostoles
1Kabay nga pahanugotan ninyo ang akon diutay nga kabuangan. Kon mahimo, tugoti ninyo ako! 2Ginapangimunan ko kamo subong sang pagpangimon sang Dios. Kay kasubong kamo sang isa ka birhen nga nobya nga ginsaad ko nga ipakasal sa isa lang ka lalaki nga amo si Cristo. 3Nagakahadlok#Gen. 3:1-5, 13. ako nga ang inyo mga panghunahuna patalangon subong sang pagpatalang sang man-og kay Eva paagi sa daya, kag kamo magabiya sang inyo bug-os kag putli nga katutom kay Cristo. 4Kay ginapagustohan lang ninyo ang bisan sin-o nga nagakadto sa inyo kag nagawali sing iban nga Jesus sang sa amon ginwali. Kag ginabaton ninyo ang espiritu kag maayong balita nga lain gid iya sang sa Espiritu kag sa Maayong Balita nga nabaton ninyo sa amon.
5Kon sa akon lang, indi gid man ako pinakakubos sang sa ginakabig ninyo nga pinasahi nga mga “apostoles”! 6Ayhan indi ako maayo maghambal, pero indi ako kubos sa kinaalam. Ginpaathag namon ini sa inyo sa tanan nga tion kag sa tanan nga kahimtangan.
7Wala ako nagpabayad sa inyo sang pagwali ko sa inyo sang Maayong Balita sang Dios. Nagpaubos ako agod mabayaw kamo. Malain bala inang ginhimo ko? 8Sang pagpangabudlay ko sa inyo, ang iban nga mga iglesia amo ang nagsakdag sa akon, kag pareho lang nga ginkawatan ko sila agod makabulig ako sa inyo. 9Kag#Fil. 4:15-18. sang dira ako kaupod sa inyo wala ako nagpangayo sa inyo sing bulig sang nagkinahanglan ako sing kwarta, kay ang mga kautoran nga nag-abot halin sa Macedonia naghatag sa akon sang tanan ko nga mga kinahanglanon. Subong sang sa nagligad, amo man sa palaabuton: indi gid ako magpabug-at sa inyo! 10Nagasaad ako tungod sang kamatuoran ni Cristo nga yari sa akon, nga ining akon pagpabugal indi mapauntat bisan diin sa bug-os nga Acaya. 11Ngaa bala nagasiling ako sini! Tungod bala nga wala ako nagahigugma sa inyo? Ang Dios nakahibalo nga ginahigugma ko kamo!
12Padayunon ko ang ginahimo ko subong, agod nga yadtong iban nga mga “apostoles” wala sing rason sa pagpabugal kag sa pagsiling nga nagapangabudlay sila pareho man sa amon. 13Ina nga mga tawo indi matuod nga mga apostoles, kundi nagapakunokuno nga mga apostoles, nga nagabinutig nahanungod sang ila ginahimo kag nagapakaapostoles ni Cristo. 14Indi ini katingalahan! Kay bisan gani si Satanas nagapakunokuno subong nga anghel sang kapawa! 15Gani indi katingalahan kon ang iya mga alagad magpakunokuno nga mga alagad sang katarungan. Sa katapusan magabaton sila sang silot nga nagakaigo sa ila mga ginahimo.
Ang mga Pag-antos ni Pablo subong Isa ka Apostol
16Nagasiling ako liwat: wala sing may maghunahuna nga buangbuang ako. Pero kon amo ini ang panghunahuna ninyo, batuna ninyo ako subong isa ka buangbuang, agod bisan diutay lang may ipabugal man ako. 17Sa pagkamatuod ang ginasiling ko karon indi iya sang Ginoo, kundi sa sining pagpabugal ko, nagahambal ako subong isa ka buangbuang. 18Pero tungod madamo ang nagapabugal sa tawhanon lamang nga mga kabangdanan, amo man ang himuon ko. 19Kamo mismo mga maalam gid, amo ina nga ginapagustohan lang ninyo ang mga buangbuang! 20Kay ginapabay-an lang ninyo ang bisan sin-o nga mag-ulipon, magpamintaha, magsiod, magpakanubo sa inyo ukon magtampa sa inyo sa guya. 21Nahuya ako sa pag-ako nga kami amon mga maluya sa paghimo sina!
Pero kon may mangahas sa pagpabugal sang bisan ano, ako may amo man nga kakahas sa pagpabugal. Nagahambal ako nga daw buangbuang. 22Mga Hebreo bala sila? Ako amo man. Mga Israelinhon bala sila? Ako amo man. Mga kaliwat bala sila ni Abraham? Ako amo man. 23Mga#Bin. 16:23. alagad bala sila ni Cristo? Daw buang ako sa paghambal sini, pero mas maayo pa ako nga alagad sang sa ila! Nakapangabudlay ako sing labi pa sang sa ila, nabilanggo ako sing mas madamo nga beses, ginhanot ako sing labi pa, kag sa madamo nga tion sa bibi sang kamatayon. 24Kalima#Deut. 25:3. gid ako makaagi sing tag-trayntay nwebe ka lapdos sa mga kamot sang mga pangulo sang mga Judio. 25Katatlo#Bin. 16:22; Bin. 14:19. gid ako makaagi sang pagbunal sang mga Romanhon, kag makaisa ako ginbato. Katatlo gid malunod ang sakayan sa dagat nga ginasakyan ko, kag sa isa sini baynte kwatro ka oras gid ako nga nagpabilin sa tubig. 26Sa#Bin. 9:23; Bin. 14:5. akon madamo nga pagpanglakaton masunson yara ako sa katalagman sang mga baha kag mga buyong, sa katalagman sa akon kapareho nga mga Judio kag katalagman sa mga Hentil. Madamo nga beses nga yara ako sa katalagman sa mga siudad kag mga desierto, sa katalagman sa dagat kag sa di-matuod nga mga kautoran. 27Nag-obra ako sing tuman gid kag masunson wala ako sing tinulogan. Gingutom ako kag gin-uhaw kag sa masunson indi ako makakaon sa tuman nga ulobrahon. Sa masami wala ako sing dalayunan, ukon bayu. 28Wala labot sang iban pa nga mga butang, ang akon kabalaka para sa tanan nga mga iglesia naghatag sa akon sing dugang nga palas-anon adlaw-adlaw. 29Kon may yara nga maluya, nagabatyag man ako sing kaluya. Kon may magpakasala, nagakalisod gid ako.
30Kon magpabugal gid man ako, magapabugal ako sang mga butang nga nagapakita kon daw ano ako kaluya. 31Ang Dios kag Amay ni Ginoong Jesus nakahibalo nga wala ako nagabutig. Dayawon ang iya ngalan sa gihapon! 32Sang#Bin. 9:23-25. didto ako sa Damasco, ang gobernador sa idalom ni Haring Aretas nagpagwardya sang mga pwertahan sang siudad sa pagdakop sa akon. 33Pero gintunton ako sa isa ka tabig, paagi sa bintana sa pader, kag nakapalagyo ako sa iya.
Currently Selected:
2 Mga Taga-Corinto 11: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
