2 Mga Taga-Corinto 1
1
1Ako#Bin. 18:1. si Pablo, apostol ni Cristo Jesus suno sa kabubot-on sang Dios, kag si Timoteo nga aton utod nagasulat sa iglesia sang Dios nga yara sa Corinto, kag sa tanan nga mga tumoluo sa bug-os nga probinsya sang Acaya:
2Kabay nga ang Dios nga aton Amay kag si Jesu-Cristo nga aton Ginoo maghatag sa inyo sing pagpakamaayo kag paghidait.
Si Pablo Nagapasalamat sa Dios
3Magpasalamat kita sa Dios kag Amay sang aton Ginoong Jesu-Cristo, ang maluloy-on nga Amay, ang Dios nga ginahalinan sang tanan nga bulig! 4Ginabuligan niya kita sa tanan naton nga mga kalisdanan, agod nga paagi sa bulig nga aton nabaton sa Dios, makabulig man kita sa iban sa tanan nila nga mga kalisdanan. 5Subong nga nagaambit kita sa madamo nga mga pag-antos ni Cristo, amo man paagi kay Cristo nagaambit kita sang daku nga bulig sang Dios. 6Kon kami nagaantos, ini para sa pagbulig sa inyo kag para sa inyo kaluwasan. Kon kami nabuligan, ti kamo man nabuligan kag nahatagan sing kusog sa pagbatas nga may pagpailob sang amo man nga mga pag-antos nga amon ginabatas. 7Gani, malig-on ang amon pagsalig sa inyo. Nakahibalo kami nga subong nga kamo nagaambit sang amon mga pag-antos, kamo man nagaambit sang bulig nga amon ginabaton.
8Mga#1 Cor. 15:32. utod, luyag namon nga mahibaluan ninyo ang mga kabudlayan nga amon naagihan sa probinsya sang Asia. Ang mga palas-anon nga ginpapas-an sa amon tama gid kadako kag kabug-at, sa bagay nga wala na kami maglaom nga mabuhi pa. 9Nagbatyag kami nga indi na kami makalikaw sa kamatayon. Pero natabo ini, agod indi kami dapat magsalig sa amon kaugalingon, kundi sa Dios lamang nga nagabanhaw sang mga patay. 10Ginluwas niya kami sa daku nga katalagman sang kamatayon, kag magaluwas sia sa amon sa palaabuton. Kag nagasalig kami sa iya, nga sia magapadayon sa pagluwas sa amon, 11subong nga kamo nagabulig sa amon paagi sa inyo mga pangamuyo. Gani ang madamo nga mga pangamuyo para sa amon pagasabton sang Dios kag sia magabendisyon sa amon. Kag madamo ang magapasalamat sa iya para sa amon.
Pagbaylo sa mga Plano ni Pablo
12Amo ini ang amon ginapabugal: ang amon konsensya nagapasalig sa amon nga ang amon kabuhi sa sini nga kalibutan, kag labi na gid ang amon kaangtanan sa inyo, ginagamhan sang pagkamaminatud-on#1:12 pagkamaminatud-on: Ang iban nga mga manuskrito maypagkabalaan. kag pagkasinsero, paagi sa kaayo sang Dios, kag indi tungod sang tawhanon nga kaalam. 13Kay ang inyo lamang mabasahan kag mahangpan amo ang ginasulat namon sa inyo. Kag nagalaom ako nga mahangpan gid ninyo sing bug-os sa palaabuton 14ang indi pa ninyo mahangpan karon, agod nga sa Adlaw ni Ginoong Jesus sarang ninyo kami mapabugal subong nga mapabugal man namon kamo.
15May pagsalig gid ako sini tanan, sa bagay nga nagplano ako una sa pagduaw sa inyo, agod nga makabaton kamo sing doble nga mga kaayuhan. 16Kay#Bin. 19:21. nagplano ako sa paghapit dira sa inyo sa akon pagkadto sa Macedonia kag sa paghapit liwat sa inyo sa akon pagbalik, agod sa pagpangayo sing bulig sa inyo para sa akon pagkadto sa Judea. 17Sang pagplano ko sini, nagpakita bala nga madali lang ako magbaylo? Kon nagaplano ako, ginahimo ko bala ini sa maiyaiyahon nga tinutuyo nga handa sa pagsiling, “Huo” ukon “Indi” sa amo man nga tion? 18Subong nga ang Dios nagahambal sang matuod, ang akon saad sa inyo indi “Huo” kag “Indi.” 19Kay#Bin. 18:5. si Jesu-Cristo, ang Anak sang Dios, nga ginwali namon ni Silas kag ni Timoteo sa inyo, indi “Huo” kag “Indi” sa amo man nga tion. Sa baylo, sia amo ang “Huo” sang Dios. 20Si Cristo amo ang kalig-unan nga ang Dios magatuman sang iya mga saad sa iya mga katawhan. Amo ini ang kabangdanan nga paagi kay Jesu-Cristo nagasiling kita “Kabay pa” sa kadayawan sang Dios. 21Kay ang Dios gid amo ang nagapalig-on sang amon kag sang inyo kabuhi sa kay Cristo. Ang Dios gid amo ang nagpain sa aton, 22kag nagbutang sing marka sa aton nga iya kita. Sia ang naghatag sang Espiritu Santo sa aton mga tagipusoon subong nga kalig-unan sang tanan nga iya gintigana para sa aton.
23Ang Dios amo ang akon saksi. Nakahibalo sia sang akon tagipusoon! Wala ako magkadto sa Corinto agod nga malikaw kamo sa masakit nga balatyagon. 24Wala kami nagadikta sa inyo kon ano ang inyo dapat tuohan, kay nakahibalo kami nga malig-on kamo sa inyo pagtuo. Sa baylo, nagapangabudlay kami kaupod ninyo para sa inyo kalipay.
Currently Selected:
2 Mga Taga-Corinto 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
