2 Mga Taga-Corinto 2
2
1Gani, ginpakamaayo ko nga indi ako magkadto sa inyo liwat sa pagpakasubo sa inyo. 2Kay kon ako ang kabangdanan sang inyo kasubo, sin-o na lang ang magalipay sa akon? Ang mga tawo lang nga akon ginpakasubo. 3Amo ina nga nagsulat ako sadto sa inyo. Wala ako luyag magkadto sa inyo kay pagapasuboon man lang ako sang mga tawo nga amo kuntani ang dapat maglipay sa akon. Kay nagasalig gid ako nga kon ako nagakalipay, ti kamo tanan nagakalipay man. 4Nagsulat ako sa inyo sa daku nga kasubo kag kasakit sang tagipusoon nga nagahilibion, indi sa pagpakasubo sa inyo, kundi sa pagpakilala sa inyo kon daw ano ang akon paghigugma sa inyo tanan.
Ang Pagpatawad sa Nakasala
5Karon, kon may isa nga nagpakasubo sa bisan kay sin-o, wala niya ini ginhimo sa akon, kundi sa inyo tanan, ukon sa pila lang sa inyo. Ginahambal ko ini tungod kay indi ako luyag magpatama sa sina nga tawo. 6Tuman na sa sina nga tawo nga nasilutan sia sa sini nga paagi sang kalabanan sa inyo. 7Pero karon, patawaron ninyo sia kag lipayon, agod indi sia magpangasubo sing tuman kag indi madulaan sing paglaom. 8Gani, nagapakitluoy ako sa inyo, pabatyaga ninyo sia nga inyo gid sia ginahigugma. 9Kay amo ini ang kabangdanan nga nagpadala ako sa inyo sina nga sulat: luyag ko mahibaluan kon bala nagdaog kamo sa pagtilaw, ukon handa kamo sa gihapon sa pagsunod sang akon mga ginapatuman. 10Kon ginapatawad ninyo ang isa ka tawo tungod sang iya ginhimo, ginapatawad ko man sia. Kay kon magpatawad ako—ina kon nakapatawad gid man ako sang bisan ano nga sayop—ginahimo ko ini tungod sa inyo, sa atubang ni Cristo, 11agod nga indi kita madaog ni Satanas, kay nakahibalo kita kon ano ang iya mga plano.
Ang Kabalaka ni Pablo sa Troas
12Sang#Bin. 20:1. pag-abot ko sa Troas sa pagwali sang Maayong Balita nahanungod kay Cristo, nasapwan ko nga ang Ginoo naghatag sa akon sing kahigayunan sa pagpangabudlay didto. 13Pero naglibog gid ang akon ulo, tungod kay wala ko makita ang aton utod nga si Tito. Gani nagpaalam ako sa mga tawo didto, kag nagpadayon pakadto sa Macedonia.
Ang Pagdaog paagi kay Cristo
14Pero salamat sa Dios! Kay sa aton paghiusa kay Cristo, ang Dios amo sa gihapon ang nagapangulo sa aton subong nga mga priso nga ginaparada sa pagsaulog sang pagdaog ni Cristo. Kaangay sang pahamot nga nagatugob sa tanan nga lugar, ang Dios nagagamit sa aton sa pagpakilala kay Cristo sa tanan nga mga tawo. 15Kay kaangay kita sang kahamot sang sinunog nga insyenso nga ginahalad ni Cristo sa Dios kag nagapangamyon sa mga nagakalaluwas kag sa mga nagakalawala. 16Para sa ila nga nagakalawala, baho ini nga nagapatay. Pero para sa ila nga linuwas, kahamot ini nga nagadala sing kabuhi. Ti sin-o karon ang makasarang sini nga hilikuton? 17Indi kamo pareho sang madamo nga mga tawo, nga ang pagkabig nila sang mensahe sang Dios pareho sang baratuhon nga baligya. Pero tungod kay kami iya ginpadala sang Dios, nagahambal kami sing maminatud-on sa iya presensya subong nga mga alagad ni Cristo.
Currently Selected:
2 Mga Taga-Corinto 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
