1 Samuel 8
8
Ang mga Tawo Nagpangayo sang Isa ka Hari
1Sang tigulang na si Samuel, ginhimo niya ang iya mga anak nga lalaki nga mga hukom sa Israel. 2Ang magulang niya nga anak amo si Joel, kag ang manghod amo si Abias; sila mga hukom sa Beerseba. 3Pero wala sila makasunod sa kaayo sang ila amay, kundi maki-kwarta sila. Gani nagabaton sila sing hamham kag wala sila nagahukom sing matarong.
4Karon ang tanan nga mga pangulo sang Israel nagtipon sing tingob, kag nagkadto kay Samuel sa Rama 5kag#Deut. 17:14. nagsiling sa iya, “Tan-awa, nagatigulang na ikaw kag ang imo mga anak wala makasunod sang imo kaayo. Gani, pili ka sang isa ka hari sa paggahom sa amon subong sang iban nga mga pungsod.” 6Naglain ang buot ni Samuel sa ila pagpangayo sang isa ka hari, gani nagpangamuyo sia sa Ginoo, 7kag ang Ginoo nagsiling, “Pamatii ang tanan nga ginasiling sang mga tawo sa imo. Indi ikaw ang ila ginsikway, kundi ako ang ila ginsikway subong hari. 8Halin sang akon pagdala sa ila pa gwa sa Ehipto, ginsikway nila ako kag nagsimba sila sa iban nga mga dios, kag karon ginahimo nila sa imo ang ila sa gihapon ginhimo sa akon. 9Gani karon, ihatag sa ila ang ila ginapangayo, pero paandami kag isaysay sa ila kon paano ang ila mga hari magatratar sa ila.”
10Ginsugid ni Samuel sa mga tawo nga nagpangayo sa iya sing hari ang tanan nga ginsiling sa iya sang Ginoo. 11Si Samuel nagsiling, “Amo ini ang himuon sang inyo hari sa inyo. Himuon niya ang inyo mga anak nga lalaki nga mga hangaway, ang iban sa ila magaalagad subong manugkarwahi, ang iban sa ila mga manugkabayo, kag ang iban sa ila magauna sa mga karwahi sa pagsalakay. 12Himuon niya ang iban sa ila nga mga opisyales nga magadumala sang 1,000 ka mga hangaway, kag ang iban singkwenta ka mga hangaway. Ang inyo mga anak nga lalaki magaarado sang iya mga uma, magaani sang iya mga patubas, kag magahimo sang iya mga armas kag mga gamit para sa iya mga karwahi. 13Ang inyo mga anak nga babayi magahimo sing mga agwa, kag mga manginmanugluto sang pagkaon kag tinapay. 14Kuhaon niya ang pinakamaayo ninyo nga mga uma, mga katamnan sang ubas, kag mga katamnan sang olivo kag ihatag niya ini sa iya mga opisyales. 15Kuhaon niya ang ikapulo sang inyo mga patubas kag sang inyo mga ubas para sa iya mga opisyales sa palasyo kag sa iban pa nga mga opisyales. 16Kuhaon niya ang inyo mga alagad, ang inyo mga pinakamaayo nga baka#8:16 Ang isa ka dumaan nga pagbadbadbaka; sa Hebreomga pamatan-on nga lalaki. kag mga asno sa pag-obra para sa iya. 17Kuhaon niya ang ikapulo sang inyo mga panong kag kamo mismo mangin-ulipon niya. 18Kon ina nga tion mag-abot, magareklamo gid kamo tungod sang inyo hari nga inyo mismo ginpili, pero ang Ginoo indi magpamati sa inyo mga reklamo.”
19Ang mga tawo wala magpamati kay Samuel, sa baylo nagsabat sila, “A, indi mahimo! Luyag namon nga may hari kami, 20agod manginkaangay kami sa iban nga mga pungsod, nga may kaugalingon nga hari sa paggahom sa amon, kag sa pagpangulo sa amon sa gira kag sa mga inaway.” 21Ginpamatian ni Samuel ang tanan nga ila ginsiling. Dayon nagkadto sia sa Ginoo kag ginsugid ini. 22Ang Ginoo nagsabat, “Himua ang ila luyag kag hatagi sila sing hari.” Sa tapos sini ginsingganan ni Samuel ang mga tawo sang Israel sa pagpauli.
Currently Selected:
1 Samuel 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
