1 Samuel 7
7
1Gani#2 Sam. 6:2-4; 1 Cron. 13:5-7. ang mga tawo sang Kiryat-jearim nagkuha sang Kaban sang Kasugtanan sang Ginoo kag gindala nila ini sa balay ni Abinadab, nga yara sa ibabaw sang bakulod. Ginpakabalaan nila ang iya anak nga si Eleazar sa pagbantay sini.
Si Samuel Naggahom sa Israel
2Ang Kaban sang Kasugtanan sang Ginoo nagpabilin sa Kiryat-jearim sing madugay, mga baynte ka tuig. Sa sini nga mga tinuig ang bug-os nga Israel nagpangayo sing bulig sa Ginoo.
3Si Samuel nagsiling sa mga tawo sang Israel, “Kon magbalik kamo sa Ginoo sa bug-os ninyo nga tagipusoon, kinahanglan isikway ninyo ang tanan nga mga dios kag ang mga imahen sang diosa nga si Astarot. Itugyan ninyo sing bug-os ang inyo kaugalingon sa Ginoo kag magsimba sa iya lamang, kag luwason niya kamo sa gahom sang mga Filistinhon.” 4Gani ginsikway sang mga Israelinhon ang ila mga diosdios nga si Baal kag si Astarot, kag ang Ginoo lamang ang ila ginsimba.
5Dayon si Samuel nagtawag sang tanan nga mga Israelinhon sa pagtipon sa Mispa kag ginsingganan sila, “Magapangamuyo ako didto sa Ginoo para sa inyo.” 6Gani nagtipon sila tanan sa Mispa. Nagsag-ob sila sing tubig kag gin-ula ini subong halad sa Ginoo, kag nagpuasa sila sa bug-os nga adlaw. Nagsiling sila, “Nakasala kita batok sa Ginoo.” Kag ang mga kasuayon sang mga Israelinhon ginhusay ni Samuel sa Mispa.
7Sang pagkabati sang mga Filistinhon nga ang mga Israelinhon nagtipon sa Mispa, ang mga hari sang Filistinhon upod ang ila mga tinawo naglakat sa pagsalakay sa ila. Ang mga Israelinhon nakabati nahanungod sini kag hinadlukan, 8kag nagsiling sila kay Samuel, “Magpadayon ka sa pagpangamuyo sa Ginoo nga aton Dios nga luwason niya kita sa mga Filistinhon.” 9Si Samuel#Sir. 46:16-18. nag-ihaw sang isa ka kordero kag ginsunog ini sing bilog subong halad sa Ginoo. Dayon nagpangamuyo sia sa Ginoo nga buligan ang Israel, kag ang Ginoo nagsabat sang iya pangamuyo. 10Samtang nagahalad si Samuel sang iya dulot, ang mga Filistinhon nagsugod sa pagsalakay, pero ang Ginoo nagpadaguob sing mabaskog gikan sa langit batok sa ila. Nagsalangisag sila sing bug-os kag nagpalalagyo. 11Ang mga Israelinhon naggwa sa Mispa kag naglagas sa ila tubtob sa Betkar, nga nagapamatay sa ila sa dalanon.
12Dayon nagkuha si Samuel sing bato, ginbutang niya ini sa gintung-an sang Mispa kag Sen kag nagsiling, “Ang Ginoo nagbulig sa aton tubtob nakalambot kita diri”—kag ginhingalanan niya ini sing “Bato sang Pagbulig.” 13Gani nalutos ang mga Filistinhon kag ang Ginoo wala na magtugot sa ila sa paggubat sa Israel sang si Samuel buhi pa. 14Ang tanan nga mga siudad, halin sa Ekron tubtob sa Gat nga gin-agaw anay sang mga Filistinhon gin-uli sa Israel, kag ang Israel nagbawi sang tanan niya nga mga kadutaan. Kag wala man sing inaway sa tunga sang mga Israelinhon kag sang mga Canaanhon.
15Si Samuel naggahom sa Israel sa iya bug-os nga kabuhi. 16Sa tagsa ka tuig nagalibot sia sa Betel, Gilgal, kag Mispa, kag sa sini nga mga lugar nagahusay sia sang mga kasuayon. 17Dayon nagabalik sia sa iya balay sa Rama, sa diin nag-alagad sia subong hukom sang Israel. Didto nagpatindog sia sing altar sa Ginoo.
Currently Selected:
1 Samuel 7: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
