1 Samuel 9
9
Si Saul Nagpakigkita kay Samuel
1May isa ka tawo gikan sa tribo ni Benjamin nga ginahingalanan kay Kis, anak nga lalaki ni Abiel, apo ni Seror, sa panimalay ni Bekorat, sa kabarangayan ni Apia. Si Kis manggaranon kag kinilala nga tawo. 2May anak sia nga lalaki nga ginahingalanan kay Saul, pamatan-on sia kag gwapo. Taga-abaga lang niya ang bisan sin-o, kag pinakagwapo sia sa Israel.
3Karon ang iban sang mga asno ni Kis nadula, gani nagsiling sia kay Saul, “Dalha ang isa sa mga suloguon kag pangitaa ang mga asno.” 4Naglakat sila sa mga kabakuloran sang Efraim kag sa mga kadutaan sang Salisa, pero wala nila makita ang mga asno didto. Gani nagpadayon sila sa kadutaan sang Saalim, pero ang mga asno wala didto. Dayon nagpadayon sila sa kadutaan sang Benjaminhon, pero wala man nila makita didto ang mga asno. 5Sang pag-abot nila sa kadutaan sang Zuf, si Saul nagsiling sa iya suloguon, “Dali mapauli na kita, basi si tatay magpalibog na indi sa mga asno kundi sa aton.”
6Ang suloguon nagsabat, “Hulat anay, may isa ka balaan nga tawo diri sa banwa kag ginatahod gid sia, kay ang tanan nga iya ginasiling nagamatuod. Makadto kita sa iya, kag ayhan makasugid sia kon diin naton makita ang mga asno.”
7Nagpamangkot si Saul, “Kon magkadto kita sa iya, ano bala ang aton ihatag sa iya? Wala na sing pagkaon nga nabilin sa aton balalunan, kag wala kita sing ihatag sa iya.”
8Ang suloguon nagsabat, “May sensilyo ako nga pilak nga sarang ko mahatag sa iya, kag magasugid sia kon diin naton makita ang mga asno.”
9-11Si Saul nagsabat, “Maayo gid! Dali na.” Gani naglakat sila sa banwa nga ginaestaran sang balaan nga tawo. Sang nagapataklad sila sa bakulod pakadto sa banwa, may nasugata sila nga mga dalaga nga naggwa sa pagsag-ob sang tubig. Nagpamangkot sila sa mga dalaga, “Yara bala ang palamangkutan?”
(Sang una, kon may mamangkot nahanungod sa Dios, magasiling sia, “Makadto kita sa palamangkutan,” kay sa sadto nga tion ang propeta ginatawag nga palamangkutan.)
12Nagsabat sila, “Huo yara sia. Dalidali kamo; bag-o lang sia nag-abot sa banwa. Unauna lang sia sa inyo, kay ang mga tawo magadulot karon nga adlaw sang ila halad sa altar didto sa bakulod. 13Sa inyo gid pagsulod sa banwa makita ninyo sia, sa wala pa sia makataklad sa bakulod sa pagkaon. Ang mga tawo indi pa magkaon kon wala pa sia makaabot didto, kay iya anay ginabendisyunan ang halad kag dayon ang mga inagda magakaon. Taklad na kamo didto, kag inyo sia dayon makita.” 14Gani nagderetso si Saul kag ang iya suloguon sa banwa, kag sang nagapasulod sila, nakita nila si Samuel nga nagapagwa pakadto sa ila sang nagapakadto sia sa lugar nga ginasimbahan.
15Karon, sa adlaw nga wala pa makaabot si Saul, ang Ginoo nagsiling na kay Samuel, 16“Buas sa amo gid nga takna magapadala ako sa imo sing isa ka tawo halin sa tribo ni Benjamin. Haplasan mo sia subong pangulo sang akon mga tawo nga Israelinhon, kag sia magaluwas sa ila sa mga Filistinhon. Nakit-an ko ang mga pag-antos sang akon mga tawo, kag nabatian ko ang ila pagpangayo sing bulig.”
17Sang makita ni Samuel si Saul, ang Ginoo nagsiling sa iya, “Amo ini sia ang tawo nga ginsiling ko sa imo. Magagahom sia sa akon mga tawo.” 18Dayon si Saul nagkadto kay Samuel malapit sa pwerta kag namangkot, “Diin bala nagaestar ang palamangkutan?”
19Si Samuel nagsabat, “Ako amo ang palamangkutan. Una ka lang sa akon sa lugar nga ginasimbahan. Magakaon kamo nga duha upod sa akon karon nga adlaw. Buas sa aga pagasabton ko ang tanan mo nga mga pamangkot kag palakton ko ikaw sa imo kaladtuan. 20Kon nahanungod sa mga asno nga nadula sang tatlo na ka adlaw nga nagligad, indi ka magpalibog kay nakita na sila. Pero sin-o gid bala ang naluyagan sang mga tawo sang Israel?#9:20 sin-o…Israel?: ukonsin-o ang may labing pinakaayo nga butang sa Israel? Ikaw gid, kag ang panimalay sang imo amay.”
21Si Saul nagsabat, “Katapo ako sang tribo ni Benjamin, ang labing diutay sa tribo sang Israel, kag ang akon panimalay amo ang pinakakubos sa amo nga tribo. Ngaa man nagahambal ikaw sing subong sini sa akon?”
22Dayon gindala ni Samuel si Saul kag ang iya suloguon sa sulod sang daku nga hulot-kalan-an kag ginhatagan sila sing lugar sa kabesera sa diin may mga inagda nga traynta ka mga tawo nga nagapungko. 23Si Samuel nagsiling sa kusinero, “Dalha diri ang linuto nga karne nga ginhatag ko sa imo kag ginpapain ko sa imo.” 24Gani gindala sang kusinero ang paa kag ginbutang sa atubang ni Saul. Si Samuel#9:24 Ang iban nga dumaan nga mga pagbadbadSi Samuel; sa HebreoSia (ang kusinero). nagsiling, “O, yari ang parti nga gintigana para sa imo. Kauna ini, kay gintigana ini para sa imo nga kaunon sa sini nga tion upod sa mga tawo nga akon gin-agda.”
Gani nagkaon si Saul upod kay Samuel sadto nga adlaw. 25Sang magdulhog sila halin sa lugar nga ginasimbahan pakadto sa banwa, nag-aman sila sing tulogan para kay Saul#9:25 Ang isa ka dumaan nga pagbadbadnag-aman sila sing tulogan para kay Saul; sa Hebreonagpakighambal sia kay Saul. sa ibabaw sang atop,#9:25 SA IBABAW SANG ATOP: Sadto nga panahon ang mga balay may matapan nga mga atop, kag ang mga tawo masunson nagatulog sa atop. 26kag nagtulog sia didto.#9:26 Ang iban nga dumaan nga mga pagbadbadkag nagtulog sia didto; sa Hebreokag nagbangon sila sing aga pa.
Si Samuel Naghaplas kay Saul subong nga Hari
Sang kaagahon ginpukaw ni Samuel si Saul didto sa ibabaw sang atop, “Bangon na, kay palakton ko ikaw.” Nagbugtaw si Saul, kag sila nga duha ni Samuel naggwa sa kalsada. 27Sang makaabot sila sa dulonan sang banwa, nagsiling si Samuel kay Saul, “Singgana ang suloguon sa pag-una sa aton.” Ang suloguon naglakat kag si Samuel nagpadayon sa pagsiling kay Saul, “Dulog anay sing makadali kag isugid ko sa imo ang ginsiling sang Dios.”
Currently Selected:
1 Samuel 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
