1 Samuel 31
31
Ang Pagkapatay ni Saul kag sang Iya mga Anak nga Lalaki
(1 Cron. 10:1-12)
1Ang mga Filistinhon nagpakig-away batok sa mga Israelinhon sa Bukid sang Gilboa. Madamo nga mga Israelinhon ang nagkalamatay didto, kag ang iban sa ila nagpalalagyo. 2Kag ang mga Filistinhon naglagas kay Saul kag sang iya mga anak, kag ginpatay ang iya mga anak nga amo sanday Jonatan, Abinadab kag Malkisua. 3Ang inaway malapuyot gid sa palibot ni Saul kag naigo sia sing malubha sang mga baslay sang kaaway. 4Dayon nagsiling sia sa pamatan-on nga lalaki nga nagadala sang iya mga hinganiban, “Gabuta ang imo espada kag patya ako, agod ining di-diosnon nga mga Filistinhon indi makayaguta kag magpatay sa akon.” Pero ang pamatan-on nga lalaki nahadlok gid sa paghimo sini sa iya. Gani ginkuha ni Saul ang iya kaugalingon nga espada kag ginhap-an niya ini. 5Nakita sang pamatan-on nga lalaki nga si Saul patay na, gani ginhap-an man niya ang iya kaugalingon nga espada kag napatay sia upod kay Saul. 6Gani si Saul, ang iya tatlo ka mga anak nga lalaki, kag ang pamatan-on nga lalaki napatay. Ang tanan nga mga tinawo ni Saul nagkalamatay sadto nga adlaw. 7Sang pagkahibalo sang mga Israelinhon sa pihak sang Kapatagan sang Jezreel kag sa sidlangan sang Suba sang Jordan nga ang mga hangaway nga mga Israelinhon nagpalalagyo, kag ang mga anak ni Saul nagkalamatay, ginbayaan nila ang ila mga banwa kag nagpalalagyo. Dayon ang mga Filistinhon nag-abot kag nag-agaw sini nga mga kabanwahanan.
8Sang madason nga adlaw sa tapos ang inaway ang mga Filistinhon nag-abot kag nagpanguha sang mga pagkabutang sang mga patay, kag ila nasapwan ang mga bangkay ni Saul kag sang iya tatlo ka mga anak nga lalaki nga nagahamyang sa Bukid sang Gilboa. 9Ginpugotan nila si Saul kag ginkuha ang iya mga hinganiban, kag nagpadala sing mga mensahero sa Filistia, sa pagsugid sang maayong balita sa ila mga diosdios kag sa ila mga pumoluyo. 10Dayon gindala nila ang iya mga hinganiban sa templo sang ila diosa nga si Astarot, kag ginlansang ang iya bangkay sa pader sa siudad sang Bet-san.
11Sang pagkabati sang mga tawo sang Jabes sa Galaad sang ginhimo sang mga Filistinhon kay Saul, 12ang isganan nga mga lalaki naggwa kag naglakat sa bug-os nga gab-i pakadto sa Bet-san. Ginkuha nila ang mga bangkay ni Saul kag sang iya mga anak nga lalaki sa pader. Gindala nila ini pabalik sa Jabes, kag ginsunog didto. 13Dayon ginkuha nila ang mga tul-an kag ginlubong sa idalom sang kahoy nga tamariska sa banwa, kag nagpuasa sila sa sulod sang pito ka adlaw.
Currently Selected:
1 Samuel 31: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
