1 Samuel 30
30
Ang Inaway batok sa mga Amaleknon
1Pagkaligad sang duha ka adlaw si David kag ang iya mga tinawo nag-abot sa Ziklag. Sang wala pa sila makaabot, ang mga Amaleknon naggubat sang nabagatnan sang Juda kag nagsalakay sang Ziklag. Ginsunog nila ang banwa, 2kag ginpangdakop ang tanan nga mga babayi. Wala sila sing ginpatay bisan isa, pero gindala nila ang tanan nga mga pumoluyo sang ila paghalin. 3Sang pag-abot ni David kag sang iya mga tinawo, nakita nila nga ang banwa ginsunog kag ang ila mga asawa, mga anak nga lalaki kag babayi ginbihag. 4Si David kag ang iya mga tinawo naghibi, kag nagpadayon sa paghibi tubtob nga wala na sila sing luha. 5Ang#1 Sam. 25:42-43. duha ka asawa ni David, si Ahinoam kag si Abigail, gindala man.
6Karon may daku gid nga palaligban si David, tungod kay ang iya mga tinawo naakig gid tungod sang pagkadula sang ila mga kabataan, kag daw batuhon nila sia. Pero ang Ginoo nga iya Dios naghatag sa iya sing kaisog. 7Nagsiling#1 Sam. 22:20-23. si David kay Abiatar nga pari nga anak ni Ahimelek, “Dalha diri ang bestidora,” kag gindala ini ni Abiatar sa iya. 8Si David nagpamangkot sa Ginoo, “Lagson ko bala yadtong mga nagpanggubat? Kag malambot ko bala sila?”
Nagsabat sia, “Lagsa sila kay malambot nimo kag maluwas mo ang mga ginbihag.”
9Gani si David kag ang iya 600 ka mga tinawo naglakat kag nag-abot sa Sapa sang Besor kag ang iban sa ila nagpabilin didto. 10Nagpadayon sa paglagas si David upod sang 400 ka mga tinawo, ang 200 ka mga tinawo nga kapoy gid wala na magtabok sa sapa kundi nagpabilin. 11Ang mga tinawo ni David nakakita sang isa ka bata nga lalaki nga Ehiptohanon sa latagon kag gindala nila kay David. Ginhatagan nila sia sing pagkaon kag tubig, 12sang binulad nga higos kag duha ka pungpong nga pasas. Sa tapos sia makakaon, naulian sia, kay wala gid sia makakaon ukon makainom sa sulod sang tatlo ka adlaw. 13Ginpamangkot sia ni David, “Sin-o ang imo agalon, kag taga-diin ka?”
Nagsabat sia, “Taga-Ehipto ako, ulipon sang isa ka Amaleknon. Ginbayaan ako sang akon agalon sing tatlo na ka adlaw tungod kay nagmasakit ako. 14Gingubat namon ang kadutaan sang mga Keretnon, ang nabagatnan nga bahin sang Juda, kag ang kadutaan sang tribo ni Caleb, kag ginsunog namon ang Ziklag.”
15Nagpamangkot si David sa iya, “Updan mo bala ako kag tudloan kon diin nagkadto yadtong mga nagpanggubat?”
Nagsabat sia, “Huo, kon magsumpa ka sa akon sa ngalan sang Dios nga indi mo ako pagpatyon ukon itugyan sa kamot sang akon agalon.” 16Nag-upod sia kay David kag gintudloan niya kon diin sila.
Didto nakita nila nga nagakinaon sila, nagaininom kag nagakinasadya bisan diin tungod sang madamo nga ila naagaw gikan sa Filistia kag sa Juda. 17Sang kaagahon sang madason nga adlaw ginsalakay sila ni David kag nagpakig-away sila tubtob sa kahapunanon. Wala sing may nakapalagyo sa ila, luas sang 400 ka pamatan-on nga mga lalaki nga nagsakay sa kamelyo kag nagpalagyo. 18Ginluwas ni David sila tanan lakip ang iya duha ka asawa kag nabawi niya ang tanan nga mga pagkabutang nga ginkuha sang mga Amaleknon. 19Wala gid sing may nadula, nabawi ni David ang tanan nga mga anak nga lalaki, mga anak nga babayi sang iya mga tinawo, kag ang tanan nga mga ginpang-agaw sang mga Amaleknon. 20Nabawi man niya ang tanan nga mga karnero kag mga baka. Gintabog sang iya mga tinawo ang tanan nga mga kasapatan sa pag-una sa ila kag nagsiling, “Iya ini ni David!”
21Dayon nagbalik sia sa 200 ka mga tinawo nga tama na kaluya sa pag-upod sa iya kag nagpabilin sa Sapa sang Besor. Naggwa sila sa pagsugata kay David kag sang iya mga tinawo, kag si David nagsugata sa ila kag nagpangamusta sa ila. 22Pero may mga tawo nga huroshuros kag wala sing pulos nga nakaupod kay David nga nagsiling, “Wala sila mag-upod sa aton, gani indi naton sila pagpartihan sang mga inagaw. Sarang nila makuha ang ila mga asawa kag mga kabataan kag maglakat.”
23Pero si David nagsabat, “Mga kautoran ko, indi ninyo ini mahimo sa ginhatag sang Ginoo sa aton! Ginluwas niya kita kag ginpadaog sa mga manuggubat. 24Wala sing isa nga maluyag sang inyo ginsiling! Ang tanan magpartida sing palareho: ang parti sang nagpabilin nga nagbantay sang mga pagkabutang pareho man sang nagkadto sa inaway.” 25Ginhimo ini ni David nga pagsulondan, kag gintuman ini sa Israel halin sadto.
26Sang pagbalik ni David sa Ziklag, ginpadala niya ang iban sang mga inagaw sa iya mga abyan nga mga pangulo sang Juda upod sini nga mensahe, “Yari ang regalo para sa inyo gikan sa mga inagaw nga nakuha namon sa mga kaaway sang Ginoo.” 27Ginpadala niya ini sa mga pumoluyo sang Betel, sa Rama sa nabagatnan nga bahin sang Juda, sa mga pumoluyo sa mga banwa sang Hatir, 28Aroer, Sipmot, Estemoa, 29kag Rakal; sa mga pumoluyo sa mga banwa sang tribo ni Jerameel kag sang mga Kenhanon, 30kag sa mga pumoluyo sang mga banwa sang Horma, Borasan, Atak, 31kag Hebron. Ginpadala niya ini sa mga lugar sa diin sia kag ang iya mga tinawo nakakadto.
Currently Selected:
1 Samuel 30: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
