1 Macabeo 9
9
Ang Pagkapatay ni Judas Macabeo
1Si Demetrio nakabati nga si Nicanor kag ang iya mga hangaway nagkalamatay sa inaway, kag iya ginpadala liwat si Baquides kag si Alcimo sa duta sang Juda upod sa natuo nga bahin sang iya mga hangaway. 2Nag-agi sila sa dalan pakadto sa Gilgal kag ginkibon ang Mesaloth sa Arbela, kag gin-agaw ini, kag ginpamatay ang madamo nga mga tawo. 3Sang nahauna nga bulan sang tuig 152#9:3 TUIG 152: Ini nagasanto sa tuig 160 sa wala pa matawo ang Cristo. nagpatindog sila sang kampo sa atubangan sang Jerusalem. 4Dayon naglakat sila padulong sa Berea upod sa 20,000 ka mga nagalakat lang nga mga hangaway kag 2,000 ka mga soldado nga nagasakay sa kabayo.
5Si Judas nagpatindog sang iya kampo sa Elasa upod sa 3,000 ka pinili nga mga soldado. 6Sang makita nila ang madamo nga mga hangaway sang kaaway hinadlukan gid sila, kag madamo ang nagpalalagyo paggwa sa kampo tubtob nga ang nabilin sang iya hangaway indi na magsobra sa 800. 7Sang mahibaluan ni Judas nga ang iya mga hangaway naglalapta kag ang pagsalakay indi mapunggan nagsalasala sia, kay wala na sia sing tion sa pagtipon sa ila. 8Pero, bisan nadulaan sia sang paglaom nagsiling sia sa mga nabilin, “Tindog kamo. Atubangon naton ang mga kaaway, ayhan makasarang pa kita sa pag-away sa ila.”
9Ang iya mga hangaway nagtinguha sa pagpalas-ay sa iya nga nagasiling, “Indi kita makasarang, malagyo kita sa pagluwas sang aton kabuhi sa sini nga tion, kag ugaling magbalik upod sa aton mga kautoran sa pagbato sa mga kaaway. Kon kita lang diutay kita katama.”
10Si Judas nagsiling, “Ipahilayo lang sang Dios nga maghimo ako sina nga butang sa pagpalagyo sa ila! Kon aton na gid man ini tion, upod kita tanan nga mapatay nga may kaisog para sa aton mga kasimanwa kag indi kita magbilin sing dagta sa aton dungog.”
11Dayon ang hangaway ni Baquides naggwa sa ila kampo, kag ang mga Judio nag-aman sang ila mga lugar sa pagpakig-away sa ila. Ang mga hangaway nga nagasakay sa kabayo gintunga sa duha ka grupo, kag ang mga manuglabyog kag mga manugpana nag-una sa mga hangaway nga nagaatubang na sa pagpakig-away. 12Si Baquides yara sa tuo nayon. Ang nagakubay nga mga hangaway nagaabanse sa tunga sang duha ka grupo samtang ginapatunog ang mga trumpeta. Ang mga hangaway ni Judas nagpatunog man sang ila mga trumpeta, 13kag ang duta nag-uyog sa kagahod sang mga hangaway. Ang inaway nagpadayon halin sa aga tubtob maggab-i.
14Sang makita ni Judas nga si Baquides yara sa tuo upod ang daku nga kusog sang iya hangaway, ang tanan nga maisog nga mga soldado ni Judas nag-upod sa iya, 15kag ginpalapta nila ang natuo nga bahin kag ginlagas nila ini tubtob sa malayo nga kunsaran sang mga kabakuloran. 16Pero sang pagkakita sang mga Sirianhon nga yara sa wala, nga ang tuo nga bahin naglalapta, nagliso sila kag ginsunod ang mga hangaway ni Judas sa ulihi. 17Ang inaway naglapuyot gid, kag madamo ang nagkalamatay sa duha ka bahin sang mga hangaway. 18Si Judas mismo napatay kag ang nabilin nagpalalagyo. 19Si Jonatan kag si Simon nagkuha sang ila utod nga si Judas kag ginlubong sia sa lulobngan sang ila mga katigulangan sa Modein. 20Kag didto sa lulobngan naghibi sila para sa iya. Ang tanan nga mga Israelinhon naghaya kag naglalaw sa iya kag sa malawig nga mga inadlaw ginsulit-sulit nila ini nga mga panalambiton, 21“Daw ano nga pagkapierde sang isa ka isganan nga tawo, ang tawo nga nagluwas sa Israel!”
22Ang iban nga mga binuhatan ni Judas, ang inaway nga iya gin-agihan, ang iya ginpanghimo nga may kaisog, kag ang iya pagkagamhanan wala ini masulat, kay madamo ini kaayo.
Si Jonatan Nagbulos kay Judas
23Sang mapatay si Judas, ang mga Judio nga naglapas sa kasugoan naggulowa sa ila ginapanaguan sa bug-os nga Israel kag ang tanan nga nagahimo sing malaut nagpakita man. 24Sa sadto nga tion may tama nga gutom, kag ang tanan nga mga tawo nag-upod sa ila. 25Si Baquides nagpili sing hungod sang mga kaaway sang pagtuluohan kag ginhimo sila nga mga gobernador sang pungsod. 26Ini sila nagpangita kag nagpangdakop sang mga abyan ni Judas kag gindala sila kay Baquides, nga nagbalos kag nagpakahuya sa ila. 27Ang tama nga pagpamigos nag-abot sa Israel, nga wala pa gid sing may natabo kaangay sini halin sang pagkadula sang mga propeta sa tunga nila.
28Dayon ang tanan nga mga abyan ni Judas nagkadto sing tingob kay Jonatan kag nagsiling, 29“Halin sang napatay ang imo utod nga si Judas, wala na gid sing kaangay sa iya nga nagpangulo sa pagbato sa kaaway nga si Baquides kag yadtong nagdumot sa aton pungsod. 30Gani karon nga adlaw, ginapili namon ikaw sa pagbulos sa iya, subong nga amon manuggahom kag pangulo sa pagpakig-away sang aton mga kaaway.” 31Sugod sadto nga adlaw ginbaton ni Jonatan ang pagpangulo kag sia na ang nagkuha sang katungdanan sang iya utod nga si Judas.
Ang mga Pagpanggubat ni Jonatan
32Sang pagkabati ni Baquides sini nga balita, nagplano sia sa pagpatay kay Jonatan. 33Pero nahibal-an ini ni Jonatan, sang iya utod nga si Simon kag sang tanan nga nagasakdag sa iya kag nagpalagyo sila sa desierto sang Tekoa. Nagpatindog sila sang ila kampo malapit sa tuboran sang Aspar. 34Nahibal-an ini ni Baquides sang Adlaw nga Inugpahuway, kag nagtabok man sia sa Jordan upod sang iya bug-os nga mga hangaway. 35Si Jonatan nagpadala sang iya utod nga si Juan nga amo ang nagapangulo sang bantay, sa pagpangabay sang mga Nabateanhon nga iya mga abyan sa pagtago sang ila madamo nga mga dala. 36Pero ang mga anak ni Jambri nga gikan sa Medeba naggubat sa ila, gindakop nila si Juan kag gindala nila ang tanan niya nga mga pagkabutang. 37Sa tapos ini matabo, ginsugid ini kay Jonatan kag kay Simon nga iya utod, “Ang mga anak ni Jambri nagasaulog sang isa ka daku nga kasal, kag nagaubay sa nobya nga anak sang isa ka dungganon nga tawo sang Canaan, gikan sa Nadabat nga may madamo sang nagaupod.” 38Si Jonatan kag si Simon luyag magtimalos tungod sang kamatayon ni Juan nga ila utod, gani nagtaklad sila kag nagpanago sa bukid. 39Samtang nagabantay sila, nag-agi ang nagaginahod nga mga tawo nga may madamo nga mga dala, upod ang nobyo kag ang iya mga kaubay kag ang iya panimalay sa pagsugata sa nobya kag sa iya mga kaupod. May mga dala sila nga mga tamborin, upod ang banda, kag madamo nga mga armas. 40Ang mga Judio naggwa sa ila ginapanaguan kag ginsalakay sila kag ginpamatay, kag ang nagkalabilin nga buhi nagpalalagyo sa bukid nga ginbayaan ang ila mga dala, kag ang mga Judio nagpanguha sini tanan. 41Gani ang kasal ginbayluhan sang paglalaw, kag ang pagkinanta sang pagpanalambiton. 42Sang makatimalos sila sa sini nga paagi sa kamatayon sang ila utod nagbalik sila sa katunggan sang Jordan.
43Sang pagkabati sini ni Baquides, nagkadto sia upod ang madamo nga mga hangaway sa Adlaw nga Inugpahuway sa mataas nga pangpang sang Jordan. 44Si Jonatan nagsiling sa iya mga tinawo, “Mag-aman kamo! Magpakig-away kita para sa aton kabuhi, kay karon nga adlaw indi pareho sang kahapon kag sang isa ka adlaw. 45Makita ninyo nga magapakig-away kita sa atubangan kag sa likod. Ang tubig sang Jordan yara sa aton kilid kag sa pihak nga kilid ang katunggan kag mga tunok. Wala kita sang palagyuhan. 46Amo ini ang tion nga magpanawag sa Ginoo agod luwason kita sa kamot sang aton mga kaaway.”
47Ang inaway ginsugdan ni Jonatan kag ginsalakay si Baquides, pero si Baquides naglikaw kag nagpalagyo. 48Dayon si Jonatan kag ang iya mga hangaway naglumpat sa Jordan kag naglangoy patabok, pero ang mga kaaway wala nagtabok sa Jordan sa paglagas sa ila. 49Sa sadto nga adlaw mga 1,000 ka mga hangaway ni Baquides ang nagkalamatay.
50Si Baquides nagbalik sa Jerusalem kag nagpatindog sang pamakod sa Judea, sa Jerico, sa Emaus, sa Bet-horon, sa Betel, sa Timnat, sa Paraton, kag sa Tipon nga may matag-as nga mga pader kag may mga pwerta nga napintalan. 51Ginpatindugan niya sing mga garison sa tagsa sini ka lugar sa pagpamatok sa Israel. 52Ginpamakuran man niya ang mga banwa sang Betzur, Gezer kag subong man ang pamakod sa Jerusalem, kag ginbutangan ini sing mga soldado kag mga kalan-on. 53Ginkuha niya ang mga anak nga lalaki sang dungganon nga mga tawo sa pungsod subong panagang, kag ginpagwardyahan sila sa pamakod sa Jerusalem.
54Sang tuig 153,#9:54 TUIG 153: Ini nagasanto sa tuig 159 sa wala pa matawo ang Cristo. sa ikaduha nga bulan, si Alcimo nagmando sa pagguba sang pader sang nasulod nga pasiyuhan sang santuaryo. Ginpaguba man niya ang binuhatan sang mga propeta. Nagasugod pa lang si Alcimo sa pagpaguba, 55sang gin-atake sia sang balatian kag nauntat ang iya pagpaguba. Nagpukol sia kag nanginparalitiko sa bagay nga indi sia makamando sa iya panimalay. 56Sa wala lamang madugay napatay sia sa daku nga pag-antos. 57Sang mahibal-an ni Baquides nga napatay si Alcimo, nagbalik sia sa hari, kag ang duta sang Juda naglinong sa sulod sang duha ka tuig.
58Dayon ang tanan nga mga naglapas sa kasugoan nagplano kag nagsiling, “Karon amo ang tion sa pagdala pabalik kay Baquides, samtang si Jonatan kag ang iya mga sumolunod nagakabuhi sing malinong kag may daku nga pagsalig. Sarang niya madakop sila tanan sa isa lang ka gab-i.” 59Gani nagkadto sila sa iya kag nagkasugot. 60Si Baquides naggwa gilayon upod sang madamo nga mga hangaway, kag nagpadala sang sekrito nga mga sugo sa tanan niya nga mga kadampig sa Judea sa pagdakop kay Jonatan kag sa iya mga sumolunod. Pero wala nila mahimo ini tungod kay nahibal-an ang ila plano, 61kag si Jonatan kag ang iya mga tinawo nagdakop sang singkwenta ka mga tawo sang pungsod nga amo ang mga pangulo sang nagplano kag ginpamatay sila. 62Dayon si Jonatan kag si Simon upod sang ila mga hangaway nagpahuway sa desierto sang Betbasi. Ginkaayo nila ang mga bahin nga nagguba kag ginpamakuran ini. 63Sang mabatian ini ni Baquides, gintipon niya ang bug-os niya nga hangaway kag ginpahibalo niya ang iya mga sakop sa Judea. 64Dayon nagpadayon sia kag ginkibon ang Betbasi, ginsalakay niya ini sing malawig nga mga inadlaw kag nagpatindog sing mga gamit sa pagkibon. 65Pero ginbilin ni Jonatan ang iya utod nga si Simon sa banwa, kag naglakat sia sa uma upod ang pila ka mga tawo. 66Ginsalakay niya si Odomera kag ang iya mga utod, kag ang mga anak ni Parison sa ila mga tolda. Nagpadayon sia sa pagsalakay kag nagbuylog sa iya ang ila iban nga mga hangaway. 67Sa pihak nga bahin, si Simon kag ang iya mga tinawo nagkalit sa paggwa sa banwa kag gintutdan ang mga gamit sa pagkibon. 68Ginsulong nila si Baquides kag ginlutos sia. Natublag gid si Baquides nga ang iya plano kag pagsalakay nanginwala sing pulos, 69kag ginpaupok niya ang iya kaakig sa mga malinapason sa kasugoan nga naghaylo sa iya sa pagsulod sa pungsod kag ginpamatay niya ang madamo sa ila.
Dayon nagpamat-od sia sa pagbalik sa iya kaugalingon nga pungsod. 70Sang mahibal-an ini ni Jonatan, nagpadala sia sing mga tawo sa paghimo sing kasugtanan sang paghidait kag sa pagbuhi sang mga bihag upod sa iya. 71Si Baquides nagsugot sini nga hingyo kag nagsumpa sia nga indi na maghalit kay Jonatan sa bug-os niya nga kabuhi. 72Sa tapos nga gintugyan niya ang mga priso kay Jonatan, nga iya anay gindala halin sa Judea nagbalik sia sa iya kaugalingon nga pungsod, kag wala na gid sia magpalapit sa ila duta. 73Gani natapos ang inaway sa Israel, kag si Jonatan nag-estar sa Mikmas sa diin naggahom sia sa mga tawo kag ginpapas ang mga di-diosnon sa Israel.
Currently Selected:
1 Macabeo 9: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012