1 Macabeo 8
8
Ang Kasugtanan sa mga Romanhon
1Karon nakabati si Judas sang pagkabantog sang mga Romanhon, ang kusog sang ila mga hangaway kag ang ila kaalwan sa tanan nga nagadampig sa ila. Luyag sila nga magpakig-abyan sa bisan kay sin-o nga magpalapit sa ila, 2tungod sang kusog sang ila mga hangaway. Ginsugiran sia sang ila mga inaway kag sang ila maisog nga binuhatan batok sa mga taga-Gaul nga ila gindaog kag ginpabayad sang buhis, 3kag sang tanan nga ila ginhimo sa probinsya sang España agod nga ila makuha ang mga minahan sang pilak kag bulawan didto. 4Ginhimo nila ang ila kaugalingon nga mga manuggahom sang bug-os nga pungsod paagi sa ila plano kag mapinadayunon nga pagpanghikot, bisan nga ang lugar malayo sa ila. Ginlutos man nila ang mga hari nga naggubat sa ila halin sa malayo nga mga lugar, kag ginhatagan sing tama nga kapahamakan, kag ang iban nagbayad sang tuigan nga buhis. 5Si Felipe kag si Perseo nga mga hari sang Macedonia, kag ang iban nga nagtinguha sa pagpakig-away sa ila, ginlutos kag gingamhan sila. 6Bisan si Antioco nga gamhanan nga hari sang Asia, nga naggubat kag nagsalakay sa ila nga may 120 ka mga elepante, mga soldado nga nagasakay sa kabayo, mga karwahi sa inaway, kag madamo nga mga hangaway nalutos man sa ila gahom. 7Gindakop nila sia nga buhi kag ginpilit sia kag ang mga nagbulos sa iya sa pagbayad sing mataas nga buhis, kag sa paghatag sang mga bihag kag sa pagtugyan 8sang mga kadutaan sang India, upod ang Media, Lidya, kag ang iban sang ila maayo nga mga probinsya, nga ila ginkuha sa iya kag ginhatag kay Eumenes nga hari.#8:8 EUMENES NGA HARI: Ini amo si Haring Eumenes II nga naghari sa Pergamo halin sang tuig 197 tubtob 158 sa wala pa matawo ang Cristo.
9Ginsugiran man si Judas nga sang pagplano sang mga Grecianhon sa paggubat kag sa pagpapas sa ila, 10ang mga Romanhon nakabati sini kag nagpadala sila sing isa lang ka heneral nga nag-away batok sa ila. Madamo ang napilasan kag nagkalamatay kag gindala ang ila mga babayi kag mga kabataan subong mga bihag, ginpanguha ang ila mga pagkabutang, gin-agaw ang ila duta, ginpangguba ang ila mga pamakod kag gin-ulipon sila tubtob karon nga adlaw. 11Ang iban nga mga ginharian kag mga isla nga nagpamatok sa ila ginlaglag man kag gin-ulipon. 12Pero ang mga nagpakig-abyan sa ila kag ang mga nagsalig sa ila ginpadayon nila ang ila pagpakig-abyan. Gindaog nila ang mga hari sa malayo kag sa malapit kag ang tanan nga nakabati sang ila ngalan nagkahadlok sa ila. 13Ang isa ka tawo nga luyag nila buligan nga manginhari, magapungko gid sa trono, pero kon luyag nila ang isa ka tawo nga sikwayon mahimo nila kay ginakilala gid sila. 14Walay sapayan sini tanan, wala sing isa sa ila nga nagsuksok sang korona kag nagsuksok sang kapa para sa iya kaugalingon. 15Nagpatindog sila sang isa ka senado, sa diin ang 320 ka mga senador nagasinapol adlaw-adlaw, nga nagapatugsiling kon ano ang maayo para sa mga katawhan. 16Gintugyan nila sa isa ka tawo ang pagdumala sang gubyerno sa kada tuig, nga may gahom sa bug-os nga ginharian, kag ini nga tawo ginatuman nga wala sing kaibog kag kahisa.
17Gani#2 Mac. 4:11. si Judas nagpili kay Eupolemo, anak ni Juan, sa panimalay ni Accos, kag kay Jason nga anak ni Eleazar, kag ginpadala niya sila sa Roma sa paghimo sing kasugtanan sa pag-abyanay kag pagdampiganay sa sining mga tawo. 18Ginhimo niya ini agod makuha ang ila palas-anon kon mahangpan nila nga ang ginharian sang Gresia nagaulipon sa Israel. 19Ang mga tawo nga ginpadala nagpanglakaton sing malawig pakadto sa Roma kag ginpakilala nila ang ila kaugalingon sa senado kag naghambal sining masunod, 20“Si Judas Macabeo kag ang iya mga utod nga lalaki, upod ang mga Judio, nagpadala sa amon sa inyo sa paghimo sing kasugtanan sang pagdampiganay kag paghidait, kag sa paglista sang amon kaugalingon subong kadampig ninyo kag abyan.” 21Ini nga hingyo ginpakamaayo sang mga senador, 22kag#1 Mac. 14:18. amo ini ang kopya sang sabat nga ila ginsinsil sa lapida nga bronsi kag ginpadala sa Jerusalem agod taguon sang mga Judio subong kalig-unan sang paghidait kag pagdampiganay:
23“Kabay nga ang maayo nga kapalaran amo ang magaabot sa mga Romanhon kag sa pungsod sang mga Judio, sa dagat kag sa duta sa walay katapusan; kabay ang espada kag ang kaaway magmalayo sa ila! 24Kon ang inaway una nga mag-abot sa Roma ukon sa bisan kay sin-o sa iya mga kadampig sa bug-os niya nga sakop, 25ang pungsod sang mga Judio magabulig sa iya subong iya kadampig suno sa ginakinahanglan sang hitabo kag himuon nila ini sing tinagipusoon. 26Indi sila maghatag sing trigo, armas, pilak, ukon mga sakayan sa mga nagagubat suno sa pamat-od sang Roma, kag tumanon nila ang ila katungdanan nga wala nagapaabot sing balos.
27“Sa amo man nga bagay, kon ang inaway una nga mag-abot sa mga Judio, ang mga Romanhon magabulig man sa ila sing tinagipusoon suno sa ginakinahanglan sang hitabo, 28kag ang mga nagagubat indi paghatagan sing trigo, armas, pilak ukon mga sakayan. Amo ini ang pamat-od sang Roma, kag tumanon nila ini nga wala sing pagdaya.
29“Amo ini ang mga kasugtanan nga ginhimo sang mga Romanhon para sa mga Judio. 30Pero sa tapos nga mapatuman na ini, ang mga Romanhon ukon mga Judio may luyag idugang ukon iiban sa sini, himuon nila ini suno sa ila luyag, kag ang bisan ano nga ila idugang kag iiban pagasundon man.
31“Nahanungod sa mga sayop nga nahimo sa ila ni Demetrio nga hari, nagsulat kami sini sa iya, ‘Ngaa imo gid ginpabug-atan ang amon mga abyan kag ang amon kadampig nga mga Judio? 32Kon magreklamo sila liwat batok sa imo, amon nga sakdagon ang ila kinamatarong kag magpakig-away kami sa imo sa dagat ukon sa duta.’”
Currently Selected:
1 Macabeo 8: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012